header

ໜ່ວຍສະຫະພັນແມ່ຍິງ ຫ້ອງວ່າການ ປົກຄອງ ແຂວງວຽງຈັນ ຫວນຄືນມູນເຊື້ອ ວັນສ້າງຕັ້ງສະຫະພັນ ແມ່ຍິງລາວ ຄົບຮອບ 60 ປີ.

ໃນວັນທີ 16 ກໍລະກົດ 2015 ນີ້, ໜ່ວຍສະຫະພັນແມ່ຍິງ ຫ້ອງວ່າການປົກຄອງ ແຂວງວຽງຈັນ ໄດ້ຈັດພິທີປາຖະກະຖາວັນສ້າງຕັ້ງ ສະຫະພັນແມ່ຍິງລາວ ຄົບຮອບ 60 ປີ(20/7/1955-20/7/2015) ຂຶ້ນທີ່ຫ້ອງປະຊຸມເບີ2, ເຂົ້າຮ່ວມພິທີ ໃນຄັ້ງນີ້ມີ ທ່ານ ນາງ ສິງຄຳ ຄົງສະຫວັນ ຄະນະປະຈຳພັກແຂວງ, ຮອງເຈົ້າແຂວງໆວຽງຈັນ, ທ່ານ ວິນັດ ສີສຸວົງ ກຳມະ ການພັກແຂວງ, ຫົວຫນ້າຫ້ອງວ່າການ ປົກຄອງແຂວງ, ທ່ານ ນາງ ວັນພອນ ຈັນທະລາສີ ປະທານໜ່ວຍ ສະຫະພັນແມ່ຍິງ ຫ້ອງວ່າການ ປົກຄອງແຂວງ, ມີບັນດາເອື້ອຍນ້ອງແມ່ຍິງ ພາຍໃນໜ່ວຍສະຫະພັນແມ່ຍິງ ຫ້ອງວ່າການປົກຄອງ ແຂວງວຽງຈັນເຂົ້າຮ່ວມ ຢ່າງພ້ອມພຽງ.

ເນື່ອງໃນໂອກາດນີ້ ທ່ານ ນາງ ສິງຄຳ ຄົງສະຫວັນ ຮອງເຈົ້າແຂວງໆວຽງຈັນ ໄດ້ໃຫ້ກຽດປາຖະກະຖາວັນດັ່ງກ່າວ ເຊິ່ງ ທ່ານໄດ້ຍົກໃຫ້ເຫັນ ປະຫວັດມູນເຊື້ອ ການກຳເນີດເຕີບໃຫຍ່ຂະຫຍາຍຕົວ ແລະ ຜົນງານການເຄື່ອນໄຫວທີ່ພົ້ນເດັ່ນ ຂອງສະຫະພັນແມ່ຍິງລາວ ບັນດາເຜົ່າ ໃນພາລະກິດຕໍ່ສູ້ ເພື່ອປົດປ່ອຍປະເທດຊາດ ໃນໄລຍະປີ 1955-1975, ການປະ ກອບສ່ວນຂອງແມ່ຍິງລາວ ໃນພາລະກິດປົກປັກຮັກສາ ແລະ ສ້າງສາພັດທະນາ ປະເທດຊາດ ໃນໄລຍະປີ1975-2015, ພ້ອມນີ້ທ່ານຍັງຍົກໃຫ້ເຫັນ ການເຕີບໃຫຍ່ຂະຫຍາຍຕົວ ຂອງສະຫະພັນແມ່ຍິງ ແຂວງວຽງຈັນເປັນຕົ້ນມາ ຮອດປະຈຸບັນທົ່ວແຂວງ ສາມາດປະກາດເປັນເມືອງແມ່ຍິງ 3 ດີ ໄດ້ 8 ເມືອງ, ບ້ານ 3 ດີ ໄດ້ 348 ບ້ານ, ໜ່ວຍ 3 ດີ ໄດ້ 235 ໜ່ວຍ ແລະ ແມ່ຍິງ 3 ດີ ໄດ້ 45.054 ຄົນ. ນອກນີ້ ທ່ານຮອງເຈົ້າແຂວງ ຍັງຊີ້ນຳໃຫ້ເອື້ອຍນ້ອງແມ່ຍິງ ຫ້ອງວ່າການປົກຄອງແຂວງ ຈົ່ງເອົາໃຈໃສ່ ໃນການປະຕິບັດຂໍ້ແຂ່ງຂັນ 3 ດີຂອງແມ່ຍິງລາວວາງອອກ ໃຫ້ປະກົດຜົນເປັນຈິງ, ສືບຕໍ່ພັດທະນາຕົນເອງໃນທຸກດ້ານ ໃຫ້ມີຄວາມເຂັ້ມແຂງກວ່າເກົ່າ, ຖືເອົາການສຶກສາອົບຮົມ ການເມືອງແນວຄິດ ໃຫ້ເອື້ອຍນ້ອງແມ່ຍິງຂອງຕົນເປັນກົກ, ການປະຕິບັດຫນ້າທີ່ວຽກງານ ຕ້ອງມີໂຄງການ ແລະ ແຜນງານເພື່ອຍົກລະດັບ ຄວາມຮູ້ຄວາມສາມາດ ໃຫ້ເອື້ອຍນ້ອງແມ່ຍິງ; ເປັນໃຈກາງ ໃນການເຕົ້າໂຮມຄວາມສາມັກຄີ ຂອງປະຊາຊົນບັນດາເຜົ່າ, ກໍ່ຄືອົງ ການຈັດຕັ້ງຂອງຕົນ, ເປັນເຈົ້າການ ໃນການປົກປັກຮັກສາ ເຄົາລົບທຳທຽມ, ຮີດຄອງປະເພນີອັນດີຂອງ ແມ່ຍິງລາວ, ສ້າງຄອບຄົວ ໃຫ້ມີຄວາມຜາສຸກ, ຕັ້ງຫນ້າປະຕິບັດຫນ້າທີ່ວຽກງານຂອງຕົນ ເພື່ອເປັນການປະກອບສ່ວນ ເຂົ້າໃນການ ປົກປັກຮັກສາ ແລະ ສ້າງສາປະເທດ ກໍ່ຄືກົມກອງຂອງຕົນເອງ  ໃຫ້ມີຄວາມເຂັ້ມແຂງຂຶ້ນເລື້ອຍໆ.