ແຂວງວຽງຈັນ ເລົ່າມູນເຊື້ອວັນຊາດ ຄົບຮອບ 47 ປີ ແລະ ຄ້າຍວັນເກີດ ທ່ານ ໄກສອນ ພົມວິຫານ ຄົບຮອບ 102 ປີ.

ພິທີເລົ່າມູນເຊື້ອວັນຊາດ ຄົບຮອບ 47 ປີ ແລະ ຄ້າຍວັນເກີດ ທ່ານ ໄກສອນ ພົມວິຫານ ຄົບຮອບ 102 ປີ ຢູ່ແຂວງວຽງຈັນ ໄດ້ຈັດຂຶ້ນໃນວັນທີ 1 ທັນວາ 2022 ໂດຍເລີ່ມຕົ້ນຈາກການເຂົ້າວາງກະຕ່າດອກໄມ້ຢູ່ຕໍ່ໜ້າຮູບຫຼ່ໍຂອງທ່ານປະທານໄກສອນພົມວິຫານທີ່ອານຸສອນສະຖານປະທານໄກສອນພົມວິຫານແຂວງວຽງຈັນນຳພາໂດຍທ່ານ ຄຳພັນ ສິດທິດຳພາ ກຳມະການສູນກາງພັກ ເລຂາພັກແຂວງ,ເຈົ້າແຂວງວຽງຈັນ,ພ້ອມດ້ວຍຄະນະນຳຂອງແຂວງເຂົ້າຮ່ວມ ເພຶ່ອພ້ອມກັນລະນຶກເຖິງຄຸນງາມຄວາມດີ,ຄວາມພິລະອາດຫານຂອງທ່ານປະທານໄກສອນພົມວິຫານແລະຜູ້ນຳທ່ານອື່ນໆທີ່ໄດ້ເສຍສະຫຼະຊິວິດເລຶອດເນື້ອເຂົ້າໃນການປົດປ່ອຍປະເທດຊາດ, ຫຼັງຈາກນັ້ນ ທ່ານ ຄຳພັນ ສິດທິດຳພາ ກຳມະການສູນກາງພັກ ເລຂາພັກແຂວງ, ເຈົ້າແຂວງວຽງຈັນ ໄດ້ໃຫ້ກຽດເລົ່າມູນເຊື້ອວັນຊາດ ຄົບຮອບ 47 ປີ ແລະ ຄ້າຍວັນເກີດ ທ່ານ ໄກສອນ ພົມວິຫານ ຄົບຮອບ 102 ປີ ຢູ່ທີ່ສະໂມສອນໃຫຍ່ຫ້ອງວ່າການແຂວງ,ໂດຍມີບັນດາເລຂາໜ່ວຍພັກ,ເລຂາຊາວໜຸ່ມ,ພ້ອມດ້ວຍສະມາຊິກຊາວໜຸ່ມຈາກພະແນກການ,ອົງການ,ກົມກອງອ້ອມຂ້າງແຂວງເຂົ້າຮ່ວມຮັບຟັງ.

ກ່ອນອື່ນໄດ້ພ້ອມກັນຮັບຊົມຮູບເງົາສາລະຄະດີກ່ຽວກັບມູນເຊື້ອການຕໍ່ສູ້ກູ້ຊາດຂອງບັນດາການນຳຮຸ່ນກ່ອນ ແລະ ທ່ານເຈົ້າແຂວງໄດ້ເລົ່າປະຫວັດຄວາມເປັນມາຂອງຊົນຊາດລາວ, ມູນເຊື້ອບັນພະບູຫລຸດລາວ, ນັບແຕ່ເຈົ້າຟ້າງຸ່ມທີ່ໄດ້ທ້ອນໂຮມແຜ່ນດິນລາວແຕ່ປີ 1353 ເລົ່າເຖິງກະສັດລາວຫຼາຍອົງທີ່ໄດ້ເສຍສະຫຼະເລືອດເນື້ອຊິວິດອິນຊີ ຕໍ່ສູ້ຕ້ານຈັກກະພັດຜູ້ມາຮຸກຮານປະເທດລາວ ໃນສະໄໝກ່ອນ, ພ້ອມກັນນັ້ນຍັງໄດ້ເລົ່າປະຫວັດສາດຂອງໂລກກໍ່ຄື ສົງຄາມໂລກທີ່ເກີດຂຶ້ນ ໄດ້ສົ່ງຜົນກະທົບຕໍ່ປະເທດຊາດລາວຕະຫຼອດ ໄລຍະການຕໍ່ສູ້. ວັນຊາດທີ 2 ທັນວາແມ່ນວັນສຳຄັນຂອງຊາດເຮົາ ເປັນວັນສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ. ກ່ອນຈະມີວັນນີ້ ແມ່ນຜ່ານຂະບວນການຕໍ່ສູ້ອັນເດັດດ່ຽວ ພິລະອາດຫານຂອງນັກຮົບ ນັກປະຕິວັດທົ່ວປະເທດ ທີ່ໄດ້ຮ່ວມແຮງ ຮ່ວມໃຈກັນລຸກຮື້ຂຶ້ນ ລົບລ້າງລະບອບແອກປົກຄອງທີ່ມີການກົດຂີ່ຂົ່ມເຫັງ ທັງຈັກກະພັດແບບເກົ່າ ແລະ ໃຫມ່. ແຕ່ຍ້ອນການນຳພາອັນສະຫຼາດສ່ອງໃສຂອງພັກປະຊາຊົນປະຕິວັດລາວ ທີ່ມີຄວາມຄ່ອງແຄ່ວ ແບບບົວບໍ່ຊ້ຳ ນ້ຳບໍ່ຂຸ່ນ ແຕ່ຈັບປາໄດ້ທຸກໂຕ ໃນທີ່ສຸດກໍ່ສາມາດປົດປ່ອຍປະເທດຊາດ ແລະ ໄດ້ຮັບໄຊຊະນະຢ່າງສະຫງ່າງາມ ດ້ວຍຄວາມສາມັກຄີຂອງປວງຊົນລາວທັງຊາດ ແລະ ພ້ອມກັນຕັ້ງໜ້າປະຕິບັດ 2 ໜ້າທີ່ຍຸດທະສາດຄື:ປົກປັກຮັກສາ ແລະ ສ້າງສາພັດທະນາປະເທດຊາດໃຫ້ມີຄວາມຈະເລີນສີວິໄລ. ທັງນີ້ກໍ່ ເພື່ອທົບທວນຫວນຄືນມູນເຊື້ອ ແລະ ໄຊຊະນະປະຫວັດສາດຂອງພາລະກິດແຫ່ງການຕໍ່ສູ້ ປົດປ່ອຍຊາດໃນເມື່ອກ່ອນ ແລະ ຜົນສຳເລັດໃນພາລະກິດປົກປັກຮັກສາ ແລະ ພັດທະນາປະເທດຊາດ ພາຍໃຕ້ການຊີ້ນຳ - ນໍາພາຂອງພັກ - ລັດ, ເປັນການເພີ່ມທະວີສຶກສາອົບຮົມ ໃຫ້ພະນັກງານລັດຖະກອນ, ສະມາຊິກພັກ, ທະຫານ, ຕຳຫຼວດ, ນັກຮຽນ, ນັກສຶກສາ ແລະ ປະຊາຊົນບັນດາເຜົ່າພາຍໃນແຂວງໃຫ້ກຳແໜ້ນເນື້ອໃນ, ມູນເຊື້ອສາມັກຄີປອງດອງຂອງປະຊົນບັນດາເຜົ່າ ແລະ ຊັ້ນຄົນ, ນໍ້າໃຈຕໍ່ສູ້ອັນອົງອາດ ພິລະອາດຫານຂອງກອງທັບ ແລະ ປະຊາຊົນລາວ, ເພື່ອຄົ້ນຄວ້າຮ່ຳຮຽນເອົາມູນເຊື້ອປະຕິວັດ, ຄຸນທາດການເມືອງ, ຄຸນສົມບັດສິນທຳປະຕິວັດ, ແບບແຜນວິທີເຮັດວຽກ, ການດຳລົງຊີວິດ, ຄວາມເປັນແບບຢ່າງນຳໜ້າ ຂອງປະທານ ໄກສອນ ພົມວິຫານ ເປັນທິດນຳໃນການຈັດຕັ້ງປັບປຸງ ແລະ ເຄື່ອນໄຫວວຽກງານຕົວຈິງຢູ່ແຕ່ລະຂົງເຂດທີ່ຕົນເອງຮັບຜິດຊອບ ແລະ ເພື່ອສຶບຕໍ່ບຸກທະລຸທາງດ້ານແນວຄິດຈິນຕະນາການ, ສ້າງໃຫ້ມີການຫັນປ່ຽນຢ່າງແຂງແຮງ, ເລິກເຊິ່ງ ແລະ ຮອບດ້ານ, ສ້າງຄວາມຮັບຮູ້, ແນວຄິດ ແລະ ການກະທຳ, ສົ່ງເສີມດ້ານດີ ແລະ ແກ້ໄຂບັນຫາຄົງຄ້າງ ແລະ ສິ່ງທ້າທາຍຕ່າງໆທີ່ເກີດຂຶ້ນ, ສ້າງຄວາມເຊື່ອໝັ້ນຂອງພະນັກງານ, ສະມາຊິກພັກ ແລະ ປະຊາຊົນບັນດາເຜົ່າຕໍ່ການນຳພາຂອງພັກ, ການຄຸ້ມຄອງຂອງລັດ, ເພີ່ມທະວີຄວາມຮັບຜິດຊອບ ປະກອບສ່ວນເຂົ້າໃນພາລະກິດປົກປັກຮັກສາ ແລະ ພັດທະນາປະເທດຊາດ ກໍ່ຄືແຂວງວຽງຈັນໃຫ້ກ້າວຂຶ້ນສູ່ຄວາມພັດທະນາ.