ໃນວັນທີ 21 ພະຈິກ 2022 ຢູ່ທີ່ ຫ້ອງຮັບຮອງ ຂອງຫ້ອງວ່າການແຂວງວຽງຈັນ, ທ່ານ ຄຳພັນ ສິດທິດຳພາ ກຳມະການສູນກາງພັກ, ເຈົ້າແຂວງໆວຽງຈັນ ພ້ອມຄະນະ, ໄດ້ຕ້ອນຮັບການມາຢ້ຽມຢາມຂອງ ອົງການໄຈກາ ປະຈຳ ສປປ ລາວ, ເຊິ່ງນໍາໂດຍ ທ່ານ ໂທຊິໂອະ ນາກາເຊະ ຫົວໜ້າອົງການໄຈກາ ປະຈຳ ສປປ ລາວ ພ້ອມຄະນະ.

ໃນໂອກາດທີ່ທ່ານພ້ອມຄະນະເດີນ ທາງມາຢ້ຽມຢາມ ແຂວງວຽງຈັນ ສປປ ລາວ ໃນຄັ້ງນີ້ ທ່ານເຈົ້າແຂວງໆວຽງຈັນ ກໍ່ໄດ້ສະແດງຄວາມຍິນດີຕ້ອນຮັບຊົມເຊີຍ ແລະ ຕີລາຄາສູງຕໍ່ ທ່ານ ໂທຊິໂອະ ນາກາເຊະ ພ້ອມຄະນະ ທີ່ເດີ່ນທາງມາຢ້ຽມຢາມ ແຂວງວຽງຈັນ ໃນຄັ້ງນີ້, ຊື່ງທ່ານໄດ້ນຳເອົາຄວາມຄິດຮອດຄິດເຖິງ ແລະ ມີຄວາມປິຕິຊົມຊື່ນຢ່າງອົບອຸ່ນຈາກທ່ານພ້ອມດ້ວຍຄະນະ ມາສູ່ແຂວງວຽງຈັນ. ໂອກາດນີ້ທ່ານເຈົ້າແຂວງ ກໍໄດ້ລາຍງານສະພາບການໂດຍຫຍໍ້ກ່ຽວກັບຂົງເຂດກະສິກຳ, ສາທາລະນະສຸກ ແລະ ການສຶກສາ ເພື່ອການພັດທະນາໂດຍສະເພາະຕົວຊີ້ວັດກ່ຽວກັບວຽກງານດ້ານຕ່າງໆ ບັນລຸຕາມຄາດໝາຍທີ່ວາງໄວ້, ບໍ່ພຽງແຕ່ເທົ່ານັ້ນ ຍັງເປັນການສະແດງເຖິງຄວາມເປັນຫ່ວງເປັນໄຍ ເອົາໃຈໃສ່ຢ່າງຈົດຈໍ່ ຈາກລັດຖະບານຢີ່ປຸ່ນ, ກໍ່ຄືຫົວໜ້າອົງການໄຈກາ ທີ່ມີຕໍ່ປະເທດລາວ, ເປັນສັນຍາລັກແຫ່ງການພົວພັນຮ່ວມມື ລາວ-ຢີ່ປຸ່ນ ເວົ້າລວມ, ເວົ້າສະເພາະ ອົງການໄຈກາ ຢີ່ປຸ່ນ ກັບແຂວງວຽງຈັນໃຫ້ນັບມື້ນັບມີການພັດທະນາໃນຫຼາຍຂົງເຂດວຽກງານ.

ທ່ານ ໂທຊິໂອະ ນາກາເຊະ ຫົວໜ້າອົງການໄຈກາ ປະຈຳ ສປປ ລາວ ກໍໄດ້ກ່າວສະແດງຄວາມຂອບໃຈຕໍ່ທ່ານເຈົ້າແຂວງໆວຽງຈັນ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ລາຍງານໂດຍຫຍໍ້ກ່ຽວກັບ ການຈັດຕັ້ງປະຕິບັດວຽກງານໃນຂົງເຂດກະສິກຳ, ສາທາລະນະສຸກ ແລະ ການສຶກສາ ໃນໄລຍະຜ່ານມາໃຫ້ທ່ານພ້ອມດ້ວຍຄະນະ ຮັບຊາບ.