ໃນຕອນບ່າຍ ຂອງວັນທີ 24 ຕຸລາ 2022 ສະຫາຍ ເຈິ່ນ ຮຸຍ ຕ໋ວນ ຮອງເລຂາພັກແຂວງ, ປະທານອົງການປົກຄອງປະຊາຊົນແຂວງອ້ຽນບ້າຍ ພ້ອມດ້ວຍຄະນະ ຈາກ ສສ ຫວຽດນາມ ລົງຢ້ຽມຢາມ ແລະ ເຮັດວຽກຢູ່ແຂວງວຽງຈັນ ເຊິ່ງໃຫ້ກຽດຕ້ອນຮັບໂດຍ ສະຫາຍ ທອງສະຫວັນ ວົງສຳພັນ ຮອງເລຂາພັກແຂວງ ຜູ້ຊີ້ນຳວຽກພັກ-ພະນັກງານ ປະທານສະມາຄົມມິດຕະພາບລາວ-ຫວຽດນາມ ແຂວງວຽງຈັນ.

ໃນການຢ້ຽມຢາມໃນຄັ້ງນີ້ສະຫາຍ ເຈິ່ນ ຮຸຍ ຕ໋ວນ ຮອງເລຂາພັກແຂວງ ຍັງໄດ້ເຂົ້າຢ້ຽມຂໍ່ານັບ ສະຫາຍ ຄຳພັນ ສິດທິດຳພາ ກຳມະການສູນກາງພັກ ເລຂາພັກແຂວງ ເຈົ້າແຂວງໆວຽງຈັນ ພ້ອມທັງຮັບຟັງການລາຍງານ ໂດຍຫຍໍ້ໃນການພັດທະນາເສດຖະກິດ-ສັງຄົມ ຂອງແຂວງວຽງຈັນ. ໃນໂອກາດດຽວກັນຍັງໄດ້ປຶກສາຫາລືແລກປ່ຽນບົດຮຽນເຊິ່ງກັນ ແລະ ກັນໃນຫຼາຍດ້ານ ເພື່ອສ້າງສາພັດທະນາແຂວງຂອງຕົນ ແລະ ທົບທວນຫວນຄືນມູນເຊື້ອການພົວພັນຮ່ວມມືໃນຕະຫຼອດໄລຍະຜ່ານມາ ໂດຍສະເພາະການສ້າງສາພັດທະນາຮ່ວມມືກັນຂອງທັງສອງປະເທດກໍ່ຄື ສສ ຫວຽດນາມ ແລະ ສປປ ລາວ ເພື່ອເປັນການຫວນຄືນມູນເຊື້ອແຫ່ງສາຍພົວພັນມິດຕະພາບ, ຄວາມສາມັກຄີພິເສດ, ການຮ່ວມມືຮອບດ້ານ, ສືບຕໍ່ປົກປັກຮັກສາ ແລະ ເສີມຂະຫຍາຍມູນເຊື້ອສາຍພົວພັນມິດຕະພາບລະຫວ່າງ ລາວ-ຫວຽດນາມ ໃຫ້ໝັ້ນຄົງທະນົງແກ່ນ ຍືນຍົງຄົງຕົວຕະຫຼອດ ແລະ ເຕັມໄປດ້ວຍຄວາມໝາຍຄວາມສຳຄັນໃຫ້ກາຍເປັນສັນຍາລັກແຫ່ງການພົວພັນມິດຕະພາບອັນຍິ່ງໃຫຍ່ ໃຫ້ແກ່ການ ສະເຫຼີມສະຫຼອງປີສາມັກຄີມິດຕະພາບ ການຮ່ວມມື ລາວ-ຫວຽດນາມ ປີ 2022 ກໍ່ຄືວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດ ຄົບຮອບ 45 ປີ ( 18 ກໍໍລະກົດ 1977-18 ກໍລະກົດ 2022 ) ແລະ ວັນສ້າງຕັ້ງສາຍພົວພັນການທູດລາວ-ຫວຽດນາມ ຄົບຮອບ 60 ປີ ( 5 ກັນຍາ 1962-5 ກັນຍາ 2022 ).

ໃນໂອກາດດຽວກັນ ສະຫາຍ ເຈິ່ນ ຮຸຍ ຕ໋ວນ ຮອງເລຂາພັກແຂວງ, ປະທານອົງການປົກຄອງປະຊາຊົນ ແຂວງອ້ຽນບ້າຍ ໄດ້ສະແດງຄວາມຍິນດີຊົມເຊີຍ ແລະ ກ່າວຂອບໃຈ ໃນການຕ້ອນຮັບອັນແສນອົບອຸ່ນ ຈະສືບຕໍ່ພົບປະແລກປ່ຽນບົດຮຽນ ເພື່ອສ້າງສາຍພົວພັນມິດຕະພາບໃຫ້ແໜ້ນແກ່ນງົດງາມຕະຫຼອດໄປ ພ້ອມກັນນີ້ກໍ່ໄດ້ມອບຊຸດຄອມພິວເຕີຈຳນວນ 35 ຊຸດໃຫ້ແກ່ແຂວງວຽງຈັນ.