header

ແຂວງວຽງຈັນ ຈັດງານບຸນຊ່ວງເຮືອປະຈຳປີ

ງານບຸນຊ່ວງເຮືອປະເພນີປະຈຳປີ ຂອງແຂວງວຽງຈັນຄັ້ງນີ້ ໄດ້ດຳເນີນໄປເປັນເວລາ 3 ວັນ, ເລີ່ມແຕ່ວັນທີ 21-23 ຕຸລາ 2022 ຢູ່ທີ່ທ່ານ້ຳຫາດຊາຍທຽມ ບ້ານເກີນກາງ ເມືອງທຸລະຄົມ ແຂວງວຽງຈັນ ໂດຍການເປັນກາດເຂົ້າຮ່ວມຂອງ ທ່ານ ຄຳພັນ ສິດທິດຳພາ ເຈົ້າແຂວງໆວຽງຈັນ, ທ່ານ ບົວສອນ ບູບຜາວັນ ອະດີດນາຍົກລັດຖະມົນຕີ, ມີບັນດາການນຳ-ອາດີດການນຳຂັ້ນແຂວງ, ຂັ້ນເມືອງ, ຂັ້ນບ້ານ, ຕະຫຼອດຮອດພໍ່ແມ່ປະຊາຊົນຊາວແຂວງວຽງຈັນ ແລະ ຕ່າງແຂວງ ເຂົ້າຮ່ວມຢ່າງຫຼວງຫຼາຍ ແລະ ມ່ວນຊື່ນ.

ທ່ານ ພູວົງ ບຸນຊູ ຮອງເຈົ້າແຂວງໆວຽງຈັນ, ປະທານຄະນະກຳມະການຈັດງານບຸນຊ່ວງເຮືອຄັ້ງນີ້ໄດ້ກ່າວວ່າ: ໃນງານຄັ້ງນີ້ ໄດ້ມີຫຼາຍກິດຈະກຳ ເພື້ອສ້າງສີສັນ, ຄວາມເບີກບານມ່ວນຊື່ນ ແລະ ທັງເປັນການອະນຸລັກຮັກສາວັດທະນະທຳ, ຮີດຄອງປະເພນີອັນດີງາມຂອງຊາວລ້ອງງື່ມແຂວງວຽງຈັນ ໂດຍສະເພາະແມ່ນ ກິດຈະກໍາການສະແດງຟ້ອນລາຍງ້າວ ຂອງຊາວບ້ານປາກກະຍຸງ, ເມືອງວຽງຄຳການສະແດງຟ້ອນລາຍງ້າວຂອງຊາວບ້ານປາກກະຍຸງ, ເມືອງວຽງຄຳແຂວງວຽງຈັນ, ການສະແດງສິນລະປະດົນຕີພື້ນເມືອງຂອງຊາວໜຸ່ມ-ເຍົາວະຊົນຈາກສູນວັດທະນະທຳເດັກ ແຂວງ, ກິດຈະກຳງານຕະຫຼາດນັດວາງສະແດງຂາຍຜົນຜະລິດກະສິກຳ, ຫັດຖະກຳ-ສິນຄ້າໂອດ໌ອບ ຂອງບັນດາເມືອງຕ່າງໆ, ສິນຄ້າອຸປະໂພກ-ບໍລິໂພກ ແລະ ອາຫານພື້ນບ້ານຈຳນວນໜື່ງ, ການວາງສະແດງ ແລະ ໂຄສະນາຜະລິດຕະພັນຂອງບັນດາຫົວໜ່ວຍທຸລະກິດ, ລັດວິສາຫະກິດໂທລະຄົມມະນາຄົມ, ບູ໌ດຂອງທະນາຄານຕ່າງໆ ທີ່ມີສາຂາຢູ່ແຂວງວຽງຈັນ, ມີການຄົບງັນດ້ວຍວົງດົນຕີຊື່ດັງຈຳນວນໜື່ງ ເພື່ອສ້າງຄວາມມ່ວນຊື່ນໃນງານຄັ້ງນີ້.

ໃນງານແຂ່ງຂັນເຮືອຊ່ວງປະເທດ 55 ສີພາຍຄັ້ງນີ້ມີຄະນະເຮືອຊ່ວງ ທີ່ມາຈາກບັນດາບ້ານເຂດລ້ອງງື່ມເມືອງທຸລະຄົມ ລວມທັງໝົດ 14 ລຳ ເຂົ້າຮ່ວມການແຂ່ງຂັນ. ຜ່ານການແຂ່ງຂັນເຮືອຊ່ວງທີ່ໄດ້ຊະນະເລີດອັນດັບທີ 1 ໄດ້ແກ່ເຮືອຊ່ວງບ້ານຫາດສ້ຽວ ໄດ້ຮັບເງິນລາງວັນ 15,000,000 ລ້ານກີບ, ຂັນກິລາ 1 ໜ່ວຍ ແລະ ຂັນເງິນ ນ້ຳໜັກ 1 ກິໂລ 1 ໜ່ວຍ (ເປັນຂັນໝູນວຽນ), ເຮືອຊ່ວງທີ່ໄດ້ອັນດັບທີ 2 ໄດ້ແກ່ເຮືອຊ່ວງບ້ານຕານປ່ຽວ ໄດ້ຮັບເງິນລາງວັນ 13,000,000 ກີບ ພ້ອມຂັນກິລາ 1 ໜ່ວຍ, ເຮືອຊ່ວງທີ່ໄດ້ອັນດັບທີ 3 ໄດ້ແກ່ເຮືອຊ່ວງບ້ານຫາດສວນ ໄດ້ຮັບເງິນລາງວັນ 10,000,000 ກີບ ພ້ອມຂັນກິລາ 1 ໜ່ວຍ. ເຮືອຊ່ວງທີ່ໄດ້ຮັບອັນດັບທີ 4 ໄດ້ແກ່ເຮືອຊ່ວງບ້ານຫາດໄຊ ໄດ້ຮັບເງິນລາວວັນ 8,000,000 ກີບ ພ້ອມຂັນກິລາ 1 ໜ່ວຍ.

ນອກຈາກນັ້ນຍັງມີລາງວັນຕົບແຕ່ງເອ້ຢ້ອງເຮືອງາມ, ລາງວັນເຊີ້ງມ່ວນ ແລະ ລາງວັນຊົມເຊີຍຈຳນວນໜື່ງ ເພື່ອເປັນການຊົມເຊີຍ ແລະ ຊຸກຍູ້ເປັນຂວັນກຳລັງໃຈ ໃຫ້ກັບບັນດາເຮືອ ແລະ ສີພາຍຂອງບັນດາບ້ານ ທີ່ໄດ້ພ້ອມພຽງສາມັກຄີກັນ ທຸມເຫືອເທແຮງເຂົ້າໃນການແຂ່ງຂັນດ້ວຍຄວາມຮັບຜິດຊອບ ແລະ ມີນ້ຳໃຈນັກກິລາສູງສົ່ງ ເຮັດໃຫ້ງານບຸນໃນຄັ້ງນີ້ມີບັນຍາກາດຟົດຟື້ນ ເບີກບານມ່ວນຊື່ນ ເຕັມໄປດ້ວຍຮອຍຍິ້ມອັນສົດໃສຂອງບັນດາທ່ານແຂກ, ພໍ່ແມ່ປະຊາຊົນ ມວນຊົນທີ່ໄດ້ເຂົ້າຮ່ວມງານໃນຄັ້ງນີ້.

ມູນຄ່າລາງວັນການແຂ່ງຂັນເຮືອຊ່ວງລວມທັງໝົດເກືອບ 80 ລ້ານກີບໂດຍການສະໜັບສະໜຸນຂອງ ກຸ່ມບໍລິສັດ ມາລີນີ ແລະ ການປະກອບສ່ວນຊຸກຍູ້ອຸປະຖຳເຮືອຊ່ວງແຕ່ລະບ້ານທີ່ເຂົ້າຮ່ວມແຂ່ງຂັນຈາກບັນດາພະແນກການ, ອົງການ, ກົມກອງ, ຫົວໜ່ວຍວິສາຫະກິດຂັ້ນແຂວງອີກຈຳນວນໜື່ງ.