header

ທ່ານ ເຈົ້າແຂວງໆວຽງຈັນ ຕ້ອນຮັບຫົວໜ້າກົມຕິດຕາມກວດກາຄ້າຍຄຸ້ມຂັງ-ດັດສ້າງ

ໃນຕອນເຊົ້າຂອງວັນທີ 20 ກັນຍາ 2022 ນີ້, ທ່ານ ຄຳພັນ ສິດທິດຳພາ ກຳມະການສູນກາງພັກ ເລຂາພັກແຂວງ ເຈົ້າແຂວງໆວຽນຈັນ, ໄດ້ຕ້ອນຮັບທ່ານ ຂັນທະວີ ວິໄລສັກ ຫົວໜ້າກົມຕິດຕາມກວດກາຄ້າຍຄຸມຂັງ-ດັດສ້າງ ຂອງອົງການໄອຍະການປະຊາຊົນສູງສຸດ ພ້ອມດ້ວຍຄະນະ, ຢູ່ທີ່ຫ້ອງຮັບຮອງຂອງຫ້ອງວ່າການແຂວງ.

ໂອກາດດັ່ງກ່າວ ທ່ານ ຂັນທະວີ ວິໄລສັກ, ໄດ້ລາຍງານເຖິງຈຸດປະສົງທີ່ລົງມາເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງວຽງຈັນ ໃຫ້ທ່ານ ເຈົ້າແຂວງໄດ້ຮັບຊາບ, ໂດຍອີງຕາມຂໍ້ຕົກລົງຂອງຫົວໜ້າອົງການໄອຍະການປະຊາຊົນສູງສຸດ ວ່າດ້ວຍການແຕ່ງຕັ້ງພະນັກງານຂັ້ນຫົວໜ້າກົມ, ຫົວໜ້າພະແນກ ແລະ ພະນັກງານວິຊາການລົງເຄື່ອນໄຫວສົມທົບວຽກງານຕິດຕາມກວດກາ ແລະ ຄຸ້ມຄອງສະຖານທີ່ກັກຂັງ ຄ້າຍຄຸມຂັງ-ດັດສ້າງ. ຊຶ່ງຄະນະດັ່ງກ່າວຈະໄດ້ລົງເຄື່ອນໄຫວເຮັດວຽກຕົວຈິງກຳນົດເວລາ 04 ວັນຮ່ວມກັບໄອຍະການປະຊາຊົນແຂວງວຽງຈັນຢູ່ຄ້າຍດັດສ້າງສາຍນ້ຳງື່ມ(ດອນທ້າວ-ດອນນາງ), ຄ້າຍຄຸມຂັງໂພນເງິນ, ຄ້າຍຄຸມຂັງຕານປ່ຽວ, ຄ້າຍກັກຂັງນາຂ່າ ກ່ຽວກັບວຽກງານຕິດຕາມກວດກາຄ້າຍຄຸມຂັງ-ດັດສ້າງ ທີ່ສູນກາງຄຸ້ມຄອງ, ຈາກນັ້ນກໍ່ໄດ້ເຂົ້າພົບຫົວໜ້າກອງບັນຊາການ ປກສ ແຂວງວຽງຈັນ ແລະ ລົງເຮັດວຽກກັບຄ້າຍຄຸມຂັງ-ດັດສ້າງສາຍນ້ຳງື່ມ.