header

ທ່ານ ຄຳພັນ ພົມມະທັດ ກຳມະການກົມການເມືອງສູນກາງພັກ ເລຂາທິການສູນກາງພັກ ພ້ອມຄະນະຢ້ຽມຢາມ ແລະເຮັດວຽກຢູ່ແຂວງວຽງຈັນ

 

ດ້ວຍຄວາມເປັນຫ່ວງ ເປັນໃຍ ຂອງຄະນະພັກຂັ້ນເທິງ ກໍ່ຄືການນຳພັກ-ລັດ ທີ່ມີຕໍ່ພະນັກງານ-ລັດຖະກອນ ກໍ່ຄືພໍ່ແມ່ປະຊາຊົນບັນດາເຜົ່າຊາວແຂວງວຽງຈັນ, ໃນວັນທີ 7 ກັນຍາ 2022ນີ້ ທ່ານ ຄຳພັນ ພົມມະທັດ ກຳມະການກົມການເມືອງສູນກາງພັກ ເລຂາທິການສູນກາງພັກ ປະທານຄະນະກວດກາສູນກາງພັກ ປະທານກວດກາແຫ່ງລັດ ແລະ ຫົວໜ້າອົງການຕ້ານການສໍ້ລາດບັງຫລວງຂັ້ນສູນກາງ ພ້ອມຄະນະຢ້ຽມຢາມ ແລະເຮັດວຽກຢູ່ແຂວງວຽງຈັນ, ໃຫ້ກຽດຕ້ອນຮັບຢ່າງອົບອຸ່ນຂອງທ່ານ ຄຳພັນ ສິດທິດຳພາ ກຳມະການສູນກາງພັກ ເລຂາພັກແຂວງ ເຈົ້າແຂວງວຽງຈັນ ພ້ອມດ້ວຍບັນດາຄະນະປະຈຳພັກແຂວງ, ກຳມະການພັກແຂວງ, ຫົວໜ້າ ຮອງຫົວໜ້າພະແນກການ, ທະຫານ, ຕຳຫລວດ ແລະ ພະນັກງານ-ລັດຖະກອນພາຍໃນແຂວງຮ່ວມຕ້ອນຮັບ ຢູ່ທີ່ສະໂມສອນໃຫຍ່ຂອງແຂວງ.

ທ່ານ ຄໍາພັນ ສິດທິດໍາພາ ກໍາມະການສູນກາງພັກ ເລຂາພັກແຂວງ ເຈົ້າແຂວງວຽງຈັນ ໄດ້ຂຶ້ນລາຍງານໂດຍຫຍໍ້ກ່ຽວກັບສະພາບການຈັດຕັ້ງປະຕິບັດວຽກງານໃນຫລາຍດ້ານ ທັງດ້ານທີ່ມີຜົນສຳເລັດ ຂໍ້ຄົງຄ້າງ ພ້ອມທັງແຜນພັດທະນາໃນຕໍ່ຫນ້າ ຂອງແຂວງວຽງຈັນ.

ຈາກນັ້ນທ່ານ ຄໍາພັນ ພົມມະທັດ ກໍໄດ້ກ່າວຍ້ອງຍໍຊົມເຊີຍມາຍັງຜົນງານທີ່ແຂວງສາມາດເຮັດໄດ້, ພ້ອມທັງຍົກໃຫ້ເຫັນສະພາບການລວມຕ່າງໆ ຂອງໂລກກໍ່ຄືຂອງຊາດລາວເຮົາທີ່ກຳລັງປະເຊີນກັບບັນຫາວິກິດເສດຖະກິດ, ບັນຫາຂາດແຄນນ້ຳມັນ, ບັນຫາຄ່າເງິນກີບອ່ອນຄ່າ ແລະ ບັນຫາອື່ນໆ,ເຊິ່ງເຮັດໃຫ້ສົ່ງຜົນກະທົບຢ່າງໜັກຕໍ່ກັບຊີວິດການເປັນຢູ່ຂອງພະນັກງານ-ລັດຖະກອນ ກໍ່ຄືພໍ່ແມ່ປະຊາຊົນ. ຕໍ່ກັບບັນຫາດັ່ງກ່າວ ພັກ-ລັດຖະບານກໍ່ກຳລັງຊອກຫາວິທີທາງແກ້ໄຂ. ໂອກາດນີ້ທ່ານໄດ້ເນັ້ນໜັກວ່າ: ການເຄື່ອນໄຫວກວດກາການຈັດຕັ້ງປະຕິບັດກົດລະບຽບຂອງພັກແລະກົດໝາຍຂອງລັດ ພະນັກງານກວດກາຕ້ອງມີບົດບາດໃນການສະກັດກັ້ນແລະຕີຖອຍປະກົດການຫຍໍ້ທໍ້ໃນຖັນແຖວຂອງສະມາຊິກພັກ ພະນັກງານ-ລັດຖະກອນ, ການສວຍໃຊ້ຫນ້າທີ່ຕຳແໜ່ງເພື່ອສວຍໂອກາດສໍ້ລາດບັງຫລວງຫລຸດຜ່ອນຄວາມເສຍຫາຍທາງດ້ານຊັບສິນຂອງລັດແລະລວມໝູ່ ປົກປ້ອງສິດຜົນປະໂຫຍດອັນຊອບທຳຂອງປະຊາຊົນ,ຖືເອົາການປັບປຸງກົນໄກຂອດການປະສານງານແຕ່ລະຂັ້ນໃຫ້ມີຄວາມສອດຄ່ອງແລະກົມກຽວກັນ ການຊີ້ນຳ-ນຳພາຂອງຄະນະພັກແລະແກ້ໄຂກົນໄກກວດກາຜ່ານຂັ້ນຄຸ້ມຄອງ, ກວດກາຕີລາຄາ ປະເມີນຜົນຄືນສະພາບການຈັດຕັ້ງປະຕິບັດວຽກຕົວຈິງຂອງກົງຈັກການຈັດຕັ້ງຕ່າງໆໃນໄລຍະຜ່ານມາ ມີອັນໃດທີ່ຜົນເດັ່ນ ແລະ ອັນໃດທີ່ຍັງຄົງຄ້າງຕ້ອງໄດ້ຊອກວິທີແກ້ໄຂ,ພ້ອມນີ້ຄະນະພັກກະຕ້ອງເປັນແບບຢ່າງທີ່ດີໃຫ້ແກ່ສະມາຊິກ ແລະ ຕ້ອງມີຄວາມຮອບຄອບໃນການຕັດສິນບັນຫາຕ່າງໆເພື່ອໃຫ້ຖືກຕ້ອງຕາມລະບຽບຫຼັກການຂອງພັກ ກົດໝາຍຂອງລັດວາງອອກ. ພ້ອມດຽວກັນນີ້ກໍ່ໄດ້ສະເໜີມາຍັງການນຳແຂວງເອົາໃຈໃສ່ກ່ຽວກັບການກຳນົດຍຸດທະສາດການພັດທະນາຂອງແຂວງໃຫ້ມີຄວາມຊັດເຈນຕື່ມ ໂດຍສະເພາະແມ່ນການຊອກຫາທ່າແຮງບົ່ມຊ້ອນຂອງແຂວງ ພ້ອມທັງຊຸກຍູ້ສົ່ງເສີມໃຫ້ກາຍຂະແໜງເສດຖະກິດທີ່ມີຜະລິດຕະພັນປາຍແຫຼມ, ສົ່ງເສີມການປູກ-ການລ້ຽງເພື່ອໃຫ້ຫລາຍກາຍເປັນສິນຄ້າແລະວຽກງານປາຍແຫຼມທີ່ເປັນທ່າແຮງຂອງແຂວງເພື່ອສ້າງເປັນລາຍຮັບມາພັດທະນາແຂວງໃຫ້ຮັ່ງມີເທື່ອລະກ້າວ.