header

ທ່ານ ອາເລັກຊັນເດຼີ ຄຼີເມີ ທະນາຄານໂລກ ລົງຢ້ຽມຢາມ ແລະ ເຮັດວຽກຢູ່ແຂວງວຽງຈັນ

ໃນຕອນເຊົ້າຂອງວັນທີ 6 ກັນຍາ 2022 ຢູ່ທີ່ ຫ້ອງຮັບຮອງ ຂອງຫ້ອງວ່າການແຂວງວຽງຈັນ, ທ່ານ ພູວົງ ບຸນຊູ ຮອງເຈົ້າແຂວງໆວຽງຈັນ ພ້ອມຄະນະ, ໄດ້ຕ້ອນຮັບການມາຢ້ຽມຢາມຂອງ ທະນາຄານໂລກ, ເຊິ່ງນໍາໂດຍ ທ່ານ ອາເລັກຊັນເດຼີ ຄຼີເມີ ຫົວໜ້າຫ້ອງການ ທະນາຄານໂລກ ພ້ອມຄະນະ.

ໃນໂອກາດທີ່ທ່ານພ້ອມຄະນະເດີນ ທາງມາຢ້ຽມຢາມ ແຂວງວຽງຈັນ ສປປ ລາວ ໃນຄັ້ງນີ້ ທ່ານຮອງເຈົ້າແຂວງໆວຽງຈັນ ກໍ່ໄດ້ສະແດງຄວາມຍິນດີຕ້ອນຮັບຊົມເຊີຍ ແລະ ຕີລາຄາສູງຕໍ່ ທ່ານ ອາເລັກຊັນເດຼີ ຄຼີເມີ ພ້ອມຄະນະ ທີ່ເດີ່ນທາງມາຢ້ຽມຢາມ ແຂວງວຽງຈັນ ສປປ ລາວ ໃນຄັ້ງນີ້, ຊື່ງໂອກາດນີ້ ທ່ານຮອງເຈົ້າແຂວງ ກໍໄດ້ລາຍງານສະພາບການໂດຍຫຍໍ້ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໃຫ້ຊາບ ພ້ອມນັ້ນກໍ່ໄດ້ຍົກໃຫ້ເຫັນເຖິງໃນໄລຍະຜ່ານມາແຂວງວຽງຈັນເປັນແຂວງໜື່ງ ທີ່ໄດ້ຮັບການສະໜັບສະໜູນຈາກທະນາຄານໂລກເພື່ອຈັດຕັ້ງປະຕິບັດໂຄງການຜະລິດກະສິກຳເປັນສິນຄ້າ ໂດຍສະເພາະ ຢູ່ເມືອງທຸລະຄົມແຕ່ປີ 2018 ໂດຍເລັ່ງໃສ່ການຈັດຕັ້ງກຸ່ມຜະລິດ ເພື່ອເປັນອົງການຈັດຕັ້ງຂອງຊາວກະສິກອນ ຜະລິດເປັນສິນຄ້າ ຕິດພັນກັບການປຸງແຕ່ງຜົນຜະລິດກະສິກຳ, ສົ່ງເສີມຜະລິດຕະພັນເປັນສິນຄ້າ.

ທ່ານ ອາເລັກຊັນເດຼີ ຄຼີເມີ ຫົວໜ້າຫ້ອງການ ທະນາຄານໂລກ ກໍໄດ້ກ່າວສະແດງຄວາມຂອບໃຈຕໍ່ທ່ານຮອງເຈົ້າແຂວງໆວຽງຈັນ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ລາຍງານໂດຍຫຍໍ້ກ່ຽວກັບ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໃນໄລຍະຜ່ານມາໃຫ້ທ່ານພ້ອມດ້ວຍຄະນະ ຮັບຊາບ.