header

ທ່ານ ຄຼິດສຕຽນ ແອໂຄ ທະນາຄານໂລກ ລົງຢ້ຽມຢາມ ແລະ ເຮັດວຽກຢູ່ແຂວງວຽງຈັນ

ໃນຕອນເຊົ້າຂອງວັນທີ 5 ກັນຍາ 2022 ຢູ່ທີ່ ຫ້ອງຮັບຮອງ ຂອງຫ້ອງວ່າການແຂວງວຽງຈັນ, ທ່ານ ພູວົງ ບຸນຊູ ຮອງເຈົ້າແຂວງໆວຽງຈັນ ພ້ອມຄະນະ, ໄດ້ຕ້ອນຮັບການມາຢ້ຽມຢາມຂອງ ທະນາຄານໂລກ, ເຊິ່ງນໍາໂດຍ ທ່ານ ຄຼິດສຕຽນ ແອໂຄ ຫົວໜ້າດ້ານການສຶກສາ ປະຈຳພາກພື້ນອາຊີ-ປາຊີຟິກ, ທະນາຄານໂລກ ພ້ອມຄະນະ.

ໃນໂອກາດທີ່ທ່ານພ້ອມຄະນະເດີນ ທາງມາຢ້ຽມຢາມ ແຂວງວຽງຈັນ ສປປ ລາວ ໃນຄັ້ງນີ້ ທ່ານຮອງເຈົ້າແຂວງໆວຽງຈັນ ກໍ່ໄດ້ສະແດງຄວາມຍິນດີຕ້ອນຮັບຊົມເຊີຍ ແລະ ຕີລາຄາສູງຕໍ່ ທ່ານ ຄຼິດສຕຽນ ແອໂຄ ພ້ອມຄະນະ ທີ່ເດີ່ນທາງມາຢ້ຽມຢາມ ແຂວງວຽງຈັນ ສປປ ລາວ ໃນຄັ້ງນີ້, ຊື່ງທ່ານໄດ້ນຳເອົາຄວາມຄິດຮອດຄິດເຖິງ ແລະ ມີຄວາມປິຕິຊົມຊື່ນຢ່າງອົບອຸ່ນຈາກທ່ານພ້ອມດ້ວຍຄະນະ ມາສູ່ແຂວງວຽງຈັນ. ໂອກາດນີ້ທ່ານຮອງເຈົ້າແຂວງ ກໍໄດ້ລາຍງານສະພາບການໂດຍຫຍໍ້ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັັ້ງທີ VI ເປັນປີທີ 2 ມາຮອດຕົ້ນເດືອນກັນຍານີ້ ຂະແໜງການສຶກສາໄດ້ພ້ອມກັນເປີດສົກຮຽນໃໝ່ 2022-2023 ຢ່າງເປັນຂະບວນຟົດຟື້ນ ໃນທົ່ວ 11 ເມືອງ ຂອງແຂວງວຽງຈັນ. ພ້ອມນັ້ນກໍ່ສືບຕໍ່ຈັດຕັ້ງປະຕິບັດ ແຜນພັດທະນາວຽກງານການສຶກສາ ທີ່ກຳນົດໄວ້ໃຫ້ບັນບຸແຜນການ ໂດຍສະເພາະແມ່ນ ສຸມໃສ່ການຈັດຕັ້ງປະຕິບັດ 15 ຄາດໝາຍຂອງຂະແໜງການສຶກສາ.

ທ່ານ ຄຼິດສຕຽນ ແອໂຄ ຫົວໜ້າດ້ານການສຶກສາ ປະຈຳພາກພື້ນອາຊີ-ປາຊີຟິກ, ທະນາຄານໂລກ ກໍໄດ້ກ່າວສະແດງຄວາມຂອບໃຈຕໍ່ທ່ານຮອງເຈົ້າແຂວງໆວຽງຈັນ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ລາຍງານໂດຍຫຍໍ້ກ່ຽວກັບ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໃນໄລຍະຜ່ານມາໃຫ້ທ່ານພ້ອມດ້ວຍຄະນະ ຮັບຊາບ.