header

ສະມາຄົມ ມິດຕະພາບ ໂກຈິ-ລາວ ລົງຢ້ຽມຢາມ ແລະ ເຮັດວຽກຢູ່ແຂວງວຽງຈັນ

ໃນຕອນເຊົ້າຂອງວັນທີ 8 ສິງຫາ 2022 ຢູ່ທີ່ ຫ້ອງປະຊຸມຊັ້ນ 2 ຂອງຫ້ອງວ່າການແຂວງວຽງຈັນ, ທ່ານ ພູວົງ ບຸນຊູ ຮອງເຈົ້າແຂວງໆວຽງຈັນ, ພ້ອມຄະນະ, ໄດ້ຕ້ອນຮັບການມາຢ້ຽມຢາມຂອງ ສະມາຄົມ ມິດຕະພາບ ໂກຈິ-ລາວ, ເຊິ່ງນໍາໂດຍ ທ່ານ ໂຄຈິ ນາລູຊິ ຮອງຜູ້ອຳນວຍການມັດຖະຍົມສົມບູນ ໂກຈິ ຢີ່ປຸ່ນ ພ້ອມຄະນະ.

ໃນໂອກາດທີ່ທ່ານພ້ອມຄະນະເດີນ ທາງມາຢ້ຽມຢາມ ແຂວງວຽງຈັນ ສປປ ລາວ ໃນຄັ້ງນີ້ ທ່ານຮອງເຈົ້າແຂວງໆວຽງຈັນ ກໍ່ໄດ້ສະແດງຄວາມຍິນດີຕ້ອນຮັບຊົມເຊີຍ ແລະ ຕີລາຄາສູງຕໍ່ທ່ານ ໂຄຈິ ນາລູຊິ ພ້ອມຄະນະ ທີ່ເດີ່ນທາງມາຢ້ຽມຢາມ ແຂວງວຽງຈັນ ສປປ ລາວ ໃນຄັ້ງນີ້, ຊື່ງທ່ານໄດ້ນຳເອົາຄວາມຄິດຮອດຄິດເຖິງ, ແລະ ມີຄວາມປິຕິຊົມຊື່ນຢ່າງອົບອຸ່ນຈາກທ່ານພ້ອມດ້ວຍຄະນະ ມາສູ່ແຂວງວຽງຈັນ. ພ້ອມທັງໄດ້ລາຍສະພາບການໂດຍຫຍໍ້ກ່ຽວກັບໂຄງການຊ່ວຍເຫຼືອຈາກ ສະມາຄົມ ໂກຈິ-ລາວ, ປະເທດ ຢີ່ປຸ່ນແຕ່ປີ 1995 ແລະ ໄດ້ມີການເຄື່ອນໄຫວຮ່ວມມືກັນ ນັບແຕ່ນັ້ນເປັນຕົ້ນມາ ໄລຍະເດືອນ 8 ຂອງແຕ່ລະປີ ສະມາຄົມໂກຈິ-ລາວ ຢິ່ປຸ່ນ ໄດ້ຈັດຕັ້ງຄະນະຜູ້ແທນມາເຄື່ອນໄຫວຢ້ຽມຢາມແຂວງວຽງຈັນ ຢ່າງເປັນປົກກະຕິ, ເພື່ອລົງຢ້ຽມຢາມບັນດາໂຮງຮຽນທີ່ສະມາຄົມເຄີຍໄດ້ໃຫ້ການຊ່ວຍເຫຼືອໃນໄລຍະຜ່ານມາ. ພ້ອມດຽວກັນນີ້ ທາງສະມາຄົມ ແລະ ບັນດານ້ອງນັກຮຽນ, ຄູອອາຈານ, ສະມາຄົມພໍ່ແມ່ນັກຮຽນຂອງແຂວງວຽງຈັນ ຈັດຕັ້ງການຫຼີ້ນກິດຈະກຳມ່ວນຊື່ນ ທາງດ້ານສິນລະປະ, ເກມກິລາ ໃດໜື່ງ ເພື່ອແລກປ່ຽນຄວາມສາມາດ ທາງດ້ານສິນລະປະ, ວັດທະນະທໍານໍາກັນ ແລະ ເປັນການຮັດແໜ້ນຄວາມສາມັກຄີ ຮັກແຮງລະຫວ່າງແຂວງວຽງຈັນ ກັບແຂວງໂກຈິ ເວົ້າລວມ, ເວົ້າສະເພາະແມ່ນເຍົາວະຊົນລາວ ກັບເຍົາວະຊົນຈາກປະເທດຢີ່ປຸ່ນ ໃຫ້ນັບມື້ນັບພັດທະນາດີຂື້ນ ຈົນໄດ້ການເປັນປະເພນີປະຕິບັດກັນມາຈັນຮອດປະຈຸບັນ.

ທ່ານ ໂຄຈິ ນາລູຊິ ຮອງຜູ້ອຳນວຍການມັດຖະຍົມສົມບູນ ໂກຈິ ຢີ່ປຸ່ນ ກໍໄດ້ກ່າວສະແດງຄວາມຂອບໃຈຕໍ່ທ່ານເຈົ້າແຂວງໆວຽງຈັນ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ລາຍງານໂດຍຫຍໍ້ກ່ຽວກັບການຊ່ວຍເຫຼື່ອ ທີ່ຜ່ານມາໃຫ້ທ່ານພ້ອມດ້ວຍຄະນະ ຮັບຊາບ.