header

ແຂວງວຽງຈັນ ເປີດກອງປະຊຸມສຳມະນາວິທະຍາສາດ

ແຂວງວຽງຈັນ ເປີດກອງປະຊຸມສຳມະນາວິທະຍາສາດ ແລະ ພຶດຕິກຳ ໃນຫົວຂໍ້ “ ຄົ້ນຫາຜົນງານ, ສຶບສານມູນເຊື້ອວິລະກຳ 40 ປີ ແຂວງວຽງຈັນ ” .

ກອງປະຊຸມສຳມະນາວິທະຍາສາດ ແລະ ພຶດຕິກຳ ໃນຫົວຂໍ້ “ ຄົ້ນຫາຜົນງານ, ສຶບສານມູນເຊື້ອວິລະກຳ 40 ປີ ແຂວງວຽງຈັນ ” ໄດ້ໄຂຂຶ້ນຢ່າງເປັນທາງການໃນຕອນເຊົ້າຂອງ ວັນທີ 25 ສິງຫາ 2021 ຢູ່ທີ່ ສະໂມສອນເຂຶ່ອນໄຟຟ້ານ້ຳງຶ່ມ I ໂດຍການເປັນປະທານຂອງ ທ່ານ ໝູນແກ້ວ ອໍລະບູນ, ອາດີດກຳມະການສູນກາງພັກ, ອາດີດເລຂາພັກແຂວງ, ອາດີດເຈົ້າແຂວງໆວຽງຈັນ, ມີທ່ານ ຈັນສີ ໂພສີຄຳ ອາດີດເລຂາພັກແຂວງ, ອາດີດເຈົ້າແຂວງໆວຽງຈັນ, ທ່ານ ຄຳເມິງ ພົງທະດີ ອາດີດເລຂາພັກແຂວງ, ອາດີດເຈົ້າແຂວງໆວຽງຈັນ, ທ່ານ ຄຳພັນ ສິດທິດຳພາ ກຳມະການສູນກາງພັກ, ເລຂາພັກແຂວງ, ເຈົ້າແຂວງໆວຽງຈັນ, ບັນດາຄະນະປະຈຳ, ກຳມະການພັກແຂວງ, ເລຂາພັກເມືອງ, ຫົວໜ້າພະແນກການ, ອົງການ, ກົມກອງ, ພ້ອມດ້ວຍພະນັກງານອາວຸໂສບຳນານ, ອາດີດການນຳຂອງແຂວງເຂົ້າຮ່ວມ.

ທ່ານ ໝູນແກ້ວ ອໍລະບູນ, ອາດີດກຳມະການສູນກາງພັກ, ອາດີດເລຂາພັກແຂວງ, ອາດີດເຈົ້າແຂວງໆວຽງຈັນໄດ້ກ່າວເປີດກອງປະຊຸມຄັ້ງນີ້ວ່າ: ຜ່ານພຶດຕິກຳແຫ່ງການປົກປັກຮັກສາ ແລະ ສ້າງສາແຂວງວຽງຈັນ ໃນໄລຍະ 40 ປີ ຜ່ານມານັ້ນ ການໄດ້ກັບຄືນມາເປັນແຂວງໜຶ່ງ ທີ່ເປັນເອກະລາດ, ມີເສລີພາບ ແລະ ການປົກປັກຮັກສາມັນໃຫ້ໝັ້ນຄົງມາຄືປັດຈຸບັນ ແມ່ນສິ່ງປະເສີດແລ້ວ ແຕ່ໃນດ້ານໜຶ່ງອີກ ເພື່ອໃຫ້ແຂວງວຽງຈັນຄົງຕົວ ແລະ ຂະຫຍາຍຕົວຕະຫຼອດໄປນັ້ນ ບັນຫາການເພີ່ມທະວີເຫງົ້າພະລັງ ແລະ ຄວາມເຂັ້ມແຂງທາງດ້ານເສດຖະກິດຂອງແຂວງ, ບັນຫາຄວາມສາມາດປະຊິດ ແລະ ປັບຕົວຂອງແຂວງໃຫ້ເຂົ້າກັບຂະບວນການລວມຂອງປະເທດໃນໄລຍະໃໝ່ໄດ້ ຫຼື ບໍ່? ໝາຍຄວາມວ່າ ແຂວງວຽງຈັນ ຈະສາມາດເຈືອຈານເຂົ້າໃນການຂະຫຍາຍຕົວໃນລະດັບປານກາງໄດ້ ຫຼື ບໍ່? ຖ້າບໍ່ດັ່ງນັ້ນ ການກັບມາເປັນແຂວງໜຶ່ງທີ່ເປັນເອກະລາດຈະມີຄວາມໝາຍບໍ່ສູງ.

ຈາກສະພາວະ ແລະ ເງື່ອນໄຂນີ້ເອງ ພວກເຮົາຈະຄິດແນວໃດ, ເຮັດແນວໃດ ໃຫ້ແຂວງວຽງຈັນກ້າວຂຶ້ນ, ພວກເຮົາຈະສືບຕໍ່ເຮັດອັນໃດແດ່? ຫຼື ວ່າ ພວກເຮົາຈະປະໃຫ້ມັນຄ່ອຍເປັນຄ່ອຍໄປຕາມແບບຕາມເປັນຕາມເກີດແມ່ນບໍ່ໄດ້! ພວກເຮົາມີແຕ່ຫົນທາງດຽວຕ້ອງກ້າວຂຶ້ນ, ບໍ່ກ້າວຂຶ້ນແມ່ນບໍ່ໄດ້! ແຕ່ບັນຫາສໍາຄັນແມ່ນຈະກ້າວຂຶ້ນແນວໃດ? ຈະໃຊ້ພາຫະນະ ແລະ ວິທີການອັນໃດ? ຢູ່ບ່ອນນີ້ເອງ ມັນຮຽກຮ້ອງໃຫ້ພວກເຮົາເອງຕ້ອງຮັບຮູ້ຕົນເອງ ແລະ ຕ້ອງມີການຄົ້ນຄວ້າ ແລະ ຊອກຫາສິ່ງລໍ້າຄ່າຈາກພຶດຕິກໍາຕ່າງໆໂດຍສະເພາະໄລຍະ 40 ປີຜ່ານມາ. ຖ້າບໍ່ມີການຄົ້ນຄວ້າ, ບໍ່ມີການຊອກຫາ ແລະ ບໍ່ມີການສະຫຼຸບຕີລາຄາແລ້ວກໍບໍ່ມີທິດສະດີ, ຖ້າບໍ່ມີທິດສະດີກໍບໍ່ມີຂະບວນການໄດ້ ຫຼື ມີຂະບວນການ ກໍ່ບໍ່ສາມາດສຸດກົກສຸດປາຍໄດ້. ນີ້ຄືຄວາມໝາຍຄວາມສໍາຄັນ ແລະ ຄວາມຮຽກຮ້ອງໃຫ້ມີກອງປະຊຸມສໍາມະນາວິທະຍາສາດ ແລະ ພຶດຕິກໍາໃນຄັ້ງນີ້.

ຈາກຄວາມຮຽກຮ້ອງຕ້ອງການ ແລະ ເນື້ອໃນດັັັ່ງກ່າວນັ້ນ ພວກເຮົາເຫັນວ່າກອງປະຊຸມສໍາມະນາຄັ້ງນີ້ມີຄວາມໜາຍສຳຄັນເປັນພິເສດ. ເພື່ອເຮັດໃຫ້ບັນດາບັນຫາຕ່າງໆທີ່ກອງປະຊຸມສຳມະນາຕັ້ງຂຶ້ນ ມີຄວາມກະຈ່າງແຈ້ງ ແລະ ສາມາດຄົ້ນພົບເຖິງບັນດາສິ່ງອັນລ້ຳຄ່າໄດ້ນັ້ນ, ມັນຮຽກຮ້ອງໃຫ້ພວກເຮົານັກວິທະຍາກອນ, ນັກສຳມະນາກອນທຸກຄົນຕ້ອງສຸມສະຕິປັນຍາ ແລະ ຄວາມຮັບຜິດຊອບຂອງຕົນໃຫ້ສູງເຂົ້າໃນການຄົ້ນຄ້ວາ, ປະກອບຄຳເຫັນ ແລະ ເຮັດໃຫ້ວຽກງານຕ່າງໆ ທີ່ກອງປະຊຸມສຳມະນາຄັ້ງນີ້ຕັ້ງຂື້ນຈະແຈ້ງ.

ຄໍາຄິດຄໍາເຫັນຂອງບັນດາທ່ານ, ບັນດາສະຫາຍໃນກອງປະຊຸມສໍາມະນາເທື່ອນີ້ຈະມີຄຸນປະໂຫຍດອັນລໍ້າຄ່າ, ເປັນການປະກອບສ່ວນອັນສໍາຄັນເຂົ້າໃນການສະຫຼຸບຕີລາຄາແຂວງວຽງຈັນ 40 ປີ ຜ່ານມາ ແລະ ປັບປຸງທັດສະນະ, ທິດທາງແຜນການ, ພັດທະນາ ແຂວງວຽງຈັນໃນຂັ້ນຕໍ່ໆໄປ.

“ອະດີດ, ປັດຈຸບັນ ແລະ ອະນາຄົດ ມັນຕິດພັນກັນແບບກາຍອິນຊີ, ວານນີ້ເຮັດໃຫ້ເຮົາເຂົ້າໃຈມື້ນີ້ ແລະ ມື້ນີ້ຊໍ້າພັດກຽມໃຫ້ມື້ຕໍ່ໆໄປ. ການທົບທວນຄືນມູນເຊື້ອປະຫວັດສາດ ອັນສະຫງ່າລາສີຂອງແຂວງວຽງຈັນ ໂດຍສະເພາະແມ່ນ 40 ປີ ຜ່ານມາ ມັນຈະຊ່ວຍໃຫ້ພວກເຮົາມີຄວາມເອກອ້າງທະນົງໃຈຕໍ່ອະດີດ - ປັດຈຸບັນຢ່າງເລິກເຊິ່ງຖືກຕ້ອງ ແລະ ມີຄວາມເຊື່ອໝັ້ນໃນອະນາຄົດ, ຈາກນັ້ນມຸ່ງໜ້າສູ່ສະໝາມຮົບໃໝ່, ອຸທິດໃໝ່ ແລະ ສ້າງມູນເຊື້ອອັນສະຫງ່າລາສີກວ່າເກົ່າເລື້ອຍໆໄປ ”

ກອງປະຊຸມຄັ້ງນີ້ຈະໄດ້ດຳເນີນໄປເປັນເວລາ 3 ວັນ, ແຕ່ວັນທີ 25-27 ສິງຫາ 2021 ຈຶ່ງຈະສຳເລັດລົງ.