header

ຄະນະບໍລິຫານງານພັກແຂວງວຽງຈັນ ໄຂກອງປະຊຸມຄົບຄະນະຄັ້ງທີ 4 ສະໄໝທີ VI

ໃນຕອນເຊົ້າຂອງວັນທີ 28 ກໍລະກົດ 2021 ຢູ່ທີ່ຫ້ອງວ່າການແຂວງວຽງຈັນ ໄດ້ຈັດກອງປະຊຸມຄົບຄະນະ ບໍລິຫານງານພັກແຂວງວຽງຈັນ ຄັ້ງທີ 4 ສະໄໝທີ VI ພາຍໃຕ້ການເປັນປະທານຂອງສະຫາຍ ຄຳພັນ ສິດທິດຳພາກຳມະການສູນກາງພັກ, ເລຂາພັກແຂວງ, ເຈົ້າແຂວງວຽງຈັນ ມີບັນດາສະຫາຍໃນຄະນະບໍລິຫານງານພັກແຂວງເຂົ້າຮ່ວມ.

ສະຫາຍຄຳພັນ ສິດທີດຳພາ ກຳມະການສູນກາງພັກ, ເລຂາພັກແຂວງ, ເຈົ້າແຂວງວຽງຈັນ ໄດ້ກ່າວເປີດ ກອງປະຊຸມຄັ້ງນີ້ວ່າ: ກອງປະຊຸມຄົບຄະນະບໍລິຫານງານພັກແຂວງ ຄັ້ງທີ 4 ສະໄໝທີ VI ຈະໄດ້ດຳເນີນເປັນເວລາ 3 ວັນ, ເຊິ່ງເລີ່ມແຕ່ວັນທີ 28 ຫາ 30 ກໍລະກົດ 2021 ຊຶ່ງຈະໄດ້ພ້ອມກັນສຸມໃສ່ ເຊື່ອມຊຶມ ແລະ ຄົ້ນຄ້ວາບັນຫາສຳຄັນໂດຍສະເພາະແມ່ນໄດ້ສຸມໃສ່ເຊື່ອມຊຶມມະຕິກອງປະຊຸມຄົບຄະນະບໍລິຫານງານສູນກາງພັກສະໄໝວິສາມັນ, ສະຫຼຸບຕີລາຄາຄືນການຈັດຕັ້ງເຊື່ອມຊຶມມະຕິ XI ຂອງພັກ ແລະ ມະຕິ VI ຂອງອົງຄະນະພັກແຂວງວຽງຈັນ, ການຈັດຕັ້ງປະຕິບັດຄຳສັ່ງເລກທີ 15/ນຍ ວ່າດ້ວຍການເພີ່ມທະວີມາດຕະການຕ້ານ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19, ການຈັດຕັ້ງແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ ແລະ ຄາດຄະເນ 6 ເດືອນທ້າຍປີ 2021, ສະຫຼຸບວຽກງານກໍ່ສ້າງຮາກຖານການເມືອງ ແລະ ວຽກງານ 3 ສ້າງປະຈຳປີ 2020 ແລະ ທິດທາງແຜນການປະຈຳປີ 2021 ແລະ ຜ່ານຮ່າງມະຕິຕົກລົງຂອງຄະນະປະຈຳພັກແຂວງ ວ່າດ້ວຍການຖອນ ແລະ ເອົາພະນັກງານລົງຮາກຖານການເມືອງ.

ໃນກອງປະຊຸມຄັ້ງນີ້, ສະຫາຍ ຄຳພັນ ສິທິດຳພາ ກຳມະການສູນກາງພັກ, ເລຂາພັກແຂວງ, ເຈົ້າແຂວງວຽງຈັນ ຈຶ່ງໄດ້ຮຽກຮ້ອງໃຫ້ບັນດາສະຫາຍທີ່ເຂົ້າຮ່ວມຈົ່ງສຸມໃສ່ທຸກສະຕິປັນຍາ, ຄວາມຮູ້ຄວາມສາມາດເຂົ້າໃນການຄົ້ນຄ້ວາ, ປະກອບຄຳເຫັນ ໃຫ້ມີເນື້ອໃນກະທັດຮັດ, ໜັກແໜ້ນ ແລະ ໃຊ້ເວລາໃຫ້ເກີດປະໂຫຍດສູງສຸດ ເພື່ອເປັນການກຳນົດ ທິດທາງແຜນການໃຫ້ຖືກຕ້ອງ, ສອດຄ່ອງກັບສະພາບ ແລະ ເງື່ອນໄຂຄວາມເປັນຈິງ ໃນແຕ່ລະໄລຍະເຮັດໃຫ້ການຊີ້ນຳ-ນຳພາໃນທຸກຂົງເຂດ ວຽກງານເກີດດອກອອກຜົນ ແລະ ນັບມື້ມີປະສິດທິພາບສູງ ແລະ ມີຄວາມໝາຍເລິກເຊິ່ງ.