header

ບໍລິສັດໂຄລາວ ເຂົ້າຢ້ຽມຂໍານັບ ທ່ານເຈົ້າແຂວງວຽງຈັນ ເພື່ອເສີມຂະຫຍາຍການຜະລິດ

ໃນຕອນເຊົ້າຂອງວັນທີ 20 ກໍລະກົດ 2021 ທີ່ຫ້ອງວ່າການແຂວງວຽງຈັນ ທ່ານ ຄຳພັນ ສິດທິດຳພາ ເລຂາພັກແຂວງ ເຈົ້າແຂວງໆວຽງຈັນ ໄດ້ໃຫ້ກຽດຕ້ອນຮັບການເຂົ້າຢ້ຽມຢາມ ຂອງທ່ານ ເຊຢັງໂອ ປະທານໃຫຍ່ກຸ່ມບໍລິສັດໂຄລາວ, ທ່ານ ປອ. ຄໍາຂັນ ນະພາວົງ ຮອງປະທານໃຫຍ່ ກຸ່ມບໍລິສັດໂຄລາວ, ທ່ານ ນາງ ຖາວອນ ວົງສົມບັດ ປະທານບໍລິສັດໂຄລາວ ພ້ອມດ້ວຍຄະນະບໍລິຫານງານ ບໍລິສັດໂຄລາວ ເພື່ອປຶກສາຫາລືສືບຕໍ່ເສີມຂະຫຍາຍແຜນການຮ່ວມມື ດ້ານການຜະລິດກະສິກໍາຕິດພັນກັບການປຸງແຕ່ງອຸດສາຫະກຳທີ່ມີແລ້ວໃຫ້ມີຄວາມຫຼາກຫຼາຍດ້ານເສດຖະກິດ ຕອບສະໜອງຄວາມຕ້ອງການຂອງຕະຫຼາດພາຍໃນ ແລະ ຕ່າງປະເທດ ທັງເປັນການສ້າງວຽກເຮັດງານທໍາໃຫ້ປະຊາຊົນໃນທ້ອງຖິ່ນ.

ໃນໂອກາດນີ້ ທ່ານເຈົ້າແຂວງໆວຽງຈັນ ກໍ່ໄດ້ສະແດງຄວາມຕ້ອນຮັບອັນອົບອຸ່ນ ໃນການເຂົ້າຢ້ຽມຢາມ ພ້ອມທັງ ໄດ້ຕີລາຄາສູງ ໃນການເຂົ້າຢ້ຽມຂອງ ທ່ານ ເຊຢັງໂອ ປະທານໃຫຍ່ກຸ່ມບໍລິສັດໂຄລາວ ທີ່ໄດ້ມີກິດຈະກໍາ ແລະ ການລົງທຶນພາຍໃນແຂວງວຽງຈັນ ອັນໄດ້ເປັນໜໍ່ແໜງສໍາຄັນໃນການກະຕຸ້ນເສດຖະກິດກໍ່ຄືການສ້າງວຽກເຮັດງານທໍາໃຫ້ປະຊາຊົນໃນທ້ອງຖິ່ນ. ພ້ອມນັ້ນ, ທ່ານຍັງໄດ້ ຍົກໃຫ້ເຫັນສິ່ງອໍານວຍຄວາມສະດວກ, ບັນດາທ່າແຮງໃນການລົງທຶນ ຂະແໜງການຕ່າງໆ ໂດຍສະເພາະແມ່ນແຂວງວຽງຈັນ ຍັງມີເນື້ອທີ່ເພື່ອທໍາການຜະລິດກະສິກໍາ, ອຸດສາຫະກຳ ແລະ ການບໍລິການ ລວມທັງທ່າແຮງດ້ານຄົມມະນາຄົມຂົນສົ່ງ ເສັ້ນທາງດ່ວນ, ທາງລົດໄຟ (ສະຖານີລົດໄຟ). ເປັນຕົ້ນແມ່ນ ການຜະລິດກະສິກໍາຕິດພັນກັບການທ່ອງທ່ຽວ, ການຜະລິດກະສິກໍາຕິດພັນກັບການປຸງແຕ່ງອຸດສາຫະກໍາ ເພື່ອຈໍາໜ່າຍພາຍໃນ ແລະ ສົ່ງອອກ.

ໂອກາດດຽວກັນ ທ່ານ ເຊ ຢັງ ໂອ ປະທານໃຫຍ່ ກຸ່ມບໍລິສັດໂຄລາວ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນໃນຄັ້ງນີ້ ເພື່ອເປັນການສືບຕໍ່ເສີມຂະຫຍາຍການຮ່ວມມືທີ່ມີມານັ້ນ ໃຫ້ມີການເຕີບໃຫຍ່ຂະຫຍາຍໂຕຂຶ້ນໄປເລື້ອຍໆ ແຕ່ເນື່ອງຈາກສະພາບເສດຖະກິດຂອງໂລກມີການປ່ຽນໄປ ບວກໃສ່ກັບການລະບາດຂອງພະຍາດໂຄວິດ-19 ເຮັດໃຫ້ຫຼາຍກິດຈະກໍາມີຂໍໍ້ຈໍາກັດທາງດ້ານຕະຫຼາດ ແລະ ບັນຫາຫຍຸ້ງຍາກທີ່ຕິດພັນ. ສະນັ້ນ, ເພື່ອທົບທວນຄືນໝາກຜົນໃນການຈັດຕັ້ງປະຕິບັດຜ່ານມາ ທັງເປັນການຮອງຮັບການການປ່ຽນແປງໃໝ່ ເສດຖະກິດຕະຫຼາດທີ່ມີຄວາມຫຼາກຫຼາຍ ກຸ່ມບໍລິສັດໂຄລາວ ຈຶ່ງໄດ້ເຂົ້າມາພົບປະ ແລະ ຫາລື ຮູບແບບການລົງທຶນ ໃໝ່ ເພື່ອພັດທະນາ ເຂດປູກພືດເສດຖະກິດທີ່ໃຫ້ຜົນຕອບແທນໄວ, ເຂດປູກພືດໃຫ້ພະລັງງານປ້ອນໂຮງງານອຸດສາຫະກຳ ແລະ ເຂດປູກພືດໃຫ້ນໍ້າມັນ, ການປູກພືດເພື່ອສ້າງສະພາບແວດລ້ອມ(ສ້າງອົກຊີແຊນ) ໃນເຂດທີ່ມີເງື່ອນໄຂ.

ພ້ອມນັ້ນຍັງໄດ້ ສະເໜີວິໄສທັດໃນການ ປູກພືດເສດຖະກິດ ເພື່ອສະໜອງຕະຫຼາດພາຍໃນ ແລະ ສົ່ງໄປຕ່າງປະເທດ ໂດຍນໍາໃຊ້ລະບົບເທັກໂນໂລຊີ ເຂົ້າມາຊ່ວຍ, ລະບົບຂົນສົ່ງທີ່ທັນສະໄໝ ເຊິ່ງກຸ່ມບໍລິສັດໂຄລາວໄດ້ສໍາເລັດໃນການສ້າງ ແອັບ ຕະຫຼາດລາວ ເຊິ່ງກໍາລັງທົດລອງລະບົບ ເພື່ອໃຫ້ມີຄວາມຄ່ອງໂຕ ເພື່ອບໍລິການພໍ່ແມ່ປະຊາຊົນໃນທົ່ວປະເທດ ໂດຍຈະຊ່ວຍຜູ້ບໍລິໂພກໄດ້ສິນຄ້າຈາກຜູ້ຜະລິດໂດຍກົງ, ຜູ້ຜະລິດກໍ່ຈະມີຕະຫຼາດຮອງຮັບໃນການກະຈາຍສິນຄ້າ.

ພາຍຫຼັງການປືກສາຫາລືໃນຄັ້ງນີ້ທ່ານເຈົ້າແຂວງວຽງຈັນ ແລະ ກຸ່ມບໍລິສັດໂຄລາວ ຈະໄດ້ລົງລາຍລະອຽດຕ່າງໆ ເພື່ອເຮັດໃຫ້ເປົ້າໝາຍການນໍາທັງສອງຝ່າຍທີ່ຫາລືກັນຖືກຈັດຕັ້ງປະຕິບັດໃຫ້ປະກົດຜົນເປັນຈິງ ນໍາເອົາຜົນປະໂຫຍດ ທາງດ້ານເສດຖະກິດມາໃຫ້ປະເທດຊາດ ສ້າງວຽກເຮັດງານທໍາໃຫ້ປະຊາຊົນໃນທ້ອງຖິ່ນ.