header

ແຂວງວຽງຈັນ ຈັດກອງປະຊຸມ ການດຳເນີນການກວດສອບ ບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ ປະຈຳປີ 2020

ໃນຕອນເຊົ້າຂອງວັນທີ່ 15 ກໍລະກົດ 2021 ຢູ່ທີ່ຫ້ອງວ່າການແຂວງວຽງຈັນ ໄດ້ຈັດກອງປະຊຸມເປີດບັ້ນກວດສອບ ບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ ປະຈຳປີ 2020 ຂຶ້ນຢ່າງເປັນທາງການຊຶ່ງເປັນປີທີ 11 ນັບແຕ່ມີການກວດສອບເປັນຕົ້ນມາ ພາຍໃຕ້ການເປັນປະທານຮ່ວມຂອງທ່ານ ເຄນ ລໍວັນໄຊ ຮອງປະທານອົງການກວດສອບແຫ່ງລັດ ແລະ ທ່ານ ດາວເຮືອງ ນັນທາວົງ ຮອງເຈົ້າແຂວງວຽງຈັນ, ມີຄະນະຈາກອົງການກວດສອບແຫ່ງລັດ, ອົງການກວດສອບປະຈຳພາກກາງ ມີບັນດາທ່ານຫົວໜ້າພະແນກການອ້ອມຂ້າງແຂວງ ແລະ ພາກສ່ວນກ່ຽວຂ້ອງຂອງແຂວງ ໄຊສົມບູນເຂົ້າຮ່ວມຢ່າງພ້ອມພຽງ.

ຈຸດປະສົງຂອງການກວດສອບ ເພື່ອທົບທວນຄືນການຜັນຂະຫຍາຍການຈັດຕັ້ງປະຕິບັດມະຕິກອງປະຊຸມສະໄໝສາມັນເທື່ອທີ10 ຂອງສະພາປະຊາຊົນແຂວງວຽງຈັນຊຸດທີI ສະບັບເລກທີ 63/ສພຂ.ວຈ, ລົງວັນທີ 10 ທັນວາ 2020, ແລະ ກວດສອບຄືນບົດສະຫຼຸບຂາດຕົວແຜນງົບປະມານແຫ່ງລັດ ປະຈຳປີ2019; ບົດສະຫຼຸບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດ ປະຈຳປີ 2020, ຜ່ານມາໄດ້ລົງກວດສອບທັງໝົດຈຳນວນ 7 ຄັ້ງ ແລະ ຄັ້ງນີ້ເປັນຄັ້ງທີ 8 ຊຶ່ງອົງການກວດສອບແຫ່ງລັດ ໄດ້ມອບໃຫ້ອົງການກວດສອບປະຈຳພາກກາງ ດຳເນີນການກວດສອບໃນຄັ້ງນີ້ ແມ່ນເປັນຄັ້ງທີ 4 ແລະ ທຸກໆປີໃນການດຳເນີນການກວດສອບ.

ການກວດສອບໃນຄັ້ງນີ້ໄດ້ກຳນົດແຜນການກວດສອບເປົ້າໝາຍຫຼັກ ຈຳນວນ 8 ເປົ້າໝາຍ ແລະ ເປົ້າໝາຍສຳຮອງ ຈຳນວນ 3 ເປົ້າໝາຍ, ການກວດສອບຄັ້ງນີ້ໄດ້ດຳເນີນເປັນເວລາ 15 ວັນ (ລວມທັງວັນພັກທັງລັດຖະການ).

ຜ່ານການຄົ້ນຄວ້າ, ເຊື່ອມຊຶມ ຢ່າງກົງໄປກົງມາ, ກອງປະຊຸມໄດ້ຕີລາຄາສູງ, ເຫັນໄດ້ຄວາມໝາຍຄວາມສຳຄັນ ແລະ ຄວາມຈຳເປັນທີ່ຕ້ອງໄດ້ມີການກວດສອບ, ພາຍຫຼັງທີ່ມີການກວດສອບ ໄດ້ເຮັດໃຫ້ສະມາຊິກພັກ-ພະນັກງານ ມີີສະຕິ, ເຄົາລົບຕໍ່ກົດໝາຍ, ວິໄນແຜນການ-ການເງິນ, ມີການຫັນປ່ຽນທັດສະນະ, ແນວຄິດຈາກອັນເກົ່າໄປສູ່ອັນໃໝ່ທີ່ກ້າວໜ້າ, ດ້ານການຈັດຕັ້ງມີຄວາມໂປ່ງໃສ, ເຂັ້ມແຂງຂຶ້ນ, ປະກອບສ່ວນຢ່າງຕັ້ງໜ້າເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໃຫ້ມີການຂະຫຍາຍຕົວຢ່າງຕໍ່ເນື່ອງ ແລະ ຍືນຍົງ, ພ້ອມດຽວກັນນີ້, ກອງປະຊຸມ ໄດ້ມີຄວາມເປັນເອກະພາບ ທີ່ຈະພ້ອມກັນເອົາໃຈໃສ່ບຸກທະລຸກົນໄກການປະສານງານ ສົມທົບເຮັດວຽກຮ່ວມກັນໃຫ້ມີປະສິດທິຜົນ ແລະ ໃຫ້ໄດ້ຮັບຜົນດີ ດ້ວຍຄວາມຮັບຜິດຊອບເປັນຢ່າງສູງ.