header

ແຂວງວຽງຈັນ ສະເຫຼີມສະຫຼອງ ວັນຊາດທີ 2 ທັນວາ ຄົບຮອບ 45 ປີ

ແຂວງວຽງຈັນ ໂຮມຊຸມນຸມສະເຫຼີມສະຫຼອງ ວັນຊາດທີ 2 ທັນວາ ຄົບຮອບ 45 ປີ ແລະ ວັນຄ້າຍວັນເກີດປະທານ ໄກສອນ ພົມວິຫານ ຄົບຮອບ 100 ປີ.

ແຂວງວຽງຈັນຈັດງານໂຮມຊຸມນຸມສະເຫຼີມສະຫຼອງວັນຊາດທີ 2 ທັນວາ ຄົບຮອບ45 ປີ (02 /12/1975-02/12/2020) ແລະ ວັນຄ້າຍວັນເກີດປະທານ ໄກສອນ ພົມວິຫານ ຄົບຮອບ 100 ປີ (13/12/1920-13/12/2020), ແລະ ຊົມເຊີຜົນສໍາເລັດກອງປະຊຸມໃຫຍ່ຜູ້ແທນອົງຄະນະພັກແຂວງວຽງຈັນ ຄັ້ງທີ 6, ໃນວັນທີ 14 ທັນວາ 2020 ນີ້ , ໂດຍການເຂົ້າຮ່ວມ ຂອງ ສະຫາຍ ຄຳພັນ ສິດທິດຳພາ ກຳມະການສູນກາງພັກ ເລຂາພັກແຂວງ ເຈົ້າແຂວງໆວຽງຈັນ, ມີບັນດາສະຫາຍຄະນະນຳແຂວງ, ພະນັກງານຫຼັກແຫຼ່ງ, ພະນັກງານປະຕິວັດອາວຸໂສ-ບໍານານ, ຜູ້ຕາງໜ້າໂຮງຮຽນ, ໂຮງໝໍ, ໂຮງຈັກ,ໂຮງງານ, ພະນັກງານທະຫານ-ຕຳຫຼວດ ແລະ ພະແນກການອ້ອມຂ້າງແຂວງເຂົ້າຮ່ວມ.

ໃນພິທີ ສະຫາຍ ຄໍາພັນ ສິດທິດໍາພາ, ໄດ້ຂື້ນກ່າວຄຳປາໄສຕໍ່ພິທີໂຮມຊຸມນຸມວ່າ: ຊາດລາວແມ່ນຊາດໜຶ່ງທີ່ມີປະຫວັດສາດອັນຍາວນານຫຼາຍພັນປີມີມູນເຊື້ອຮັກຊາດອັນດູດດື່ມ ແລະ ພິລາດອາດຫານ ໃນການຕໍ່ສູ້ຕ້ານການຮຸກຮານ, ໂດຍສືບທອດມູນເຊື້ອອັນອົງອາດຂອງບັນພະບູລຸດດັ່ງກ່າວນັ້ນ, ປະຊາຊົນລາວບັນດາເຜົ່າ ພາຍໃຕ້ການນໍາພາຂອງພັກປະຊາຊົນ ປະຕິວັດລາວ ໄດ້ສາມັກຄີກັນຕໍ່ສູ້ຢ່າງພິລາດອາດຫານຕ້ານການຮຸກຮານ ແລະ ການຄອບຄອງຂອງພວກຈັກກະພັດລ່າເມືອງຂຶ້ນທັງແບບເກົ່າ ແລະ ໃໝ່, ສາມາດປົດປ່ອຍປະເທດຊາດຢ່າງມີໄຊ ແລະ ສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ ຂຶ້ນຢ່າງສະຫງ່າຜ່າເຜີຍ ໃນວັນທີ 2 ທັນວາ 1975, ພາຍຫຼັງປະເທດຊາດເຮົາໄດ້ຮັບການປົດປ່ອຍ, ພັກປະຊາຊົນ ປະຕິວັດລາວ ໄດ້ນໍາພາທົ່ວປວງຊົນລາວບັນດາເຜົ່າ ປະຕິບັດສອງໜ້າທີ່ຍຸດທະສາດຄື:ປົກປັກຮັກສາ ແລະສ້າງສາພັດທະນາປະເທດຊາດ ຕາມລະບອບປະຊາທິປະໄຕປະຊາຊົນ ໄປສູ່ຈຸດໝາຍສັງຄົມນິຍົມ, ຜ່ານການຈັດຕັ້ງປະຕິບັດໄລຍະ 45 ປີ ຄຽງຄູ່ກັບຂໍ້ສະດວກທີ່ເປັນພື້ນຖານແລະ ກໍໄດ້ປະສົບຄວາມຫຍຸ້ງຍາກນາໆປະການຫຼາຍຢ່າງເຊັ່ນກັນ, ຍ້ອນເງື່ອນໄຂດ້ານຕ່າງໆຂອງພາຍໃນປະເທດ ມີທັງປະເຊີນກັບກົນອຸບາຍມ້າງເພທໍາລາຍນະໂຍບາຍໃໝ່ ຂອງພວກອິດທິປໍລະປັກ ແລະ ພວກຄົນບໍ່ດີ ທັງປະສົບກັບໄພທໍາມະຊາດຢ່າງຕໍ່ເນື່ອງ,ສິ່ງສໍາຄັນແມ່ນກໍາລັງການຜະລິດ ແລະ ພື້ນຖານໂຄງລ່າງ ກໍຄືວັດຖຸເຕັກນິກໃນທຸກຂົງເຂດວຽກງານ ຍັງຢູ່ໃນລັກສະນະປະຖົມປະຖານກວມອັດຕາສູງ. ແຕ່ພັກເຮົາໄດ້ມີຄວາມສະດຸ້ງໄວ ແລະ ຫັນປ່ຽນໃນການນໍາພາຂອງຕົນໃຫ້ສອດຄ່ອງກັບສະພາບຄວາມເປັນຈິງຂອງປະ ເທດຊາດ ແລະ ສາກົນ ດ້ວຍການວາງແນວທາງປ່ຽນແປງໃໝ່ຮອບດ້ານທີ່ມີຫຼັກການ ທັງມີການປັບປຸງບູລະນະຢ່າງບໍ່ຢຸດຢັ້ງຕະຫຼອດມາ, ອັນໄດ້ເປັນປັດໄຈພື້ນຖານສໍາຄັນໃຫ້ແກ່ການປົກປັກຮັກສາຄວາມເປັນເອກະລາດ, ອໍານາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງປະເທດຊາດໄວ້ໄດ້ຢ່າງໝັ້ນຄົງ, ເສດຖະກິດ-ວັດທະນະທຳ-ສັງຄົມ ມີການຂະຫຍາຍຕົວຕໍ່ເນື່ອງ ຕາມທິດຫັນເປັນອຸດສາຫະກໍາ-ທັນສະໄໝ, ສິດເປັນເຈົ້າຂອງປະຊາຊົນບັນດາເຜົ່າໄດ້ຮັບການເສີມຂະຫຍາຍ ແລະ ເປີດກວ້າງອອກໃນສັງຄົມ, ຄວາມສາມັກຄີເປັນເອກະພາບພາຍໃນຊາດ ນັບມື້ໄດ້ຮັບການປັບປຸງດີຂຶ້ນ, ທີ່ຕັ້ງບົດບາດອິດທິພົນຂອງປະເທດຊາດເຮົາ ໄດ້ຮັບການເຊີດຊູສູງຂຶ້ນໃນເວທີສາກົນແລະ ພາກພື້ນ, ສຳລັບແຂວງວຽງຈັນໂດຍສະເພາະນັບແຕ່ມື້ສ້າງຕັ້ງແຂວງວຽງຈັນ ໃນ ປີ 1981 ເປັນຕົ້ນມາ ພາຍໃຕ້ການຊີ້ນໍາໆພາຂອງຄະນະພັກ ອົງການປົກຄອງແຂວງ ນັບແຕ່ຊຸດທີ I ຈົນມາຮອດຊຸດທີ V ຜ່ານມາ ພວກເຮົາສາມາດປົກປັກຮັກສາອະທິປະໄຕ ແລະ ຜືນແຜ່ນ ດິນອັນຄົບ ຖ້ວນຂອງແຂວງວຽງຈັນໄວ້ໄດ້ຢ່າງຫມັ້ນຄົງ, ລະບົບການເມືອງໄດ້ຮັບການປັບປຸງໃຫ້ມີຄວາມເຂັ້ມແຂງ ຫນັກແຫນ້ນ, ສັງຄົມມີຄວາມສະຫງົບແລະ ເປັລະບຽບຮຽບຮ້ອຍໂດຍພື້ນຖານ, ຊີວິດການເປັນຢູ່ ຂອງສະມາຊິກພັກ,ພະນັກງານ ແລະ ປະຊາຊົນບັນດາເຜົ່າຊາວແຂວງວຽງຈັນນັບມື້ດີຂຶ້ນ, ເສດຖະກິດມີການຂະຫຍາຍ ຕົວຢ່າງຕໍ່ເນື່ອງໃນລະດັບສະເລ່ຍ 7,3 % ຕໍ່ ປີ, ລວມຍອດລາຍຮັບພາຍໃນ ສະເລ່ຍຫົວຄົນປະຕິບັດໄດ້ 1.995 ໂດລາ, ພື້ນຖານໂຄງລ່າງຖະຫນົນຫົນທາງໄດ້ຮັບການປັບປຸງກໍ່ສ້າງ ແລະ ຂະຫຍາຍອອກຢ່າງທົ່ວເຖິງໃນທຸກທ້ອງຖິ່ນຮາກຖານ, ມີເສັ້ນທາງດ່ວນ, ເສັ້ນທາງລົດໄຟລາວ ຈີນຜ່ານແຂວງວຽງຈັນແຕ່ເຫນືອຮອດໄຕ້ບັນດາໂຮງຈັກໂຮງງານ, ພື້ນຖານການຜະລິດ, ຊົນລະປະທານ, ໂຮງຮຽນ,ໂຮງຫມໍ ແລະ ອື່ນໆ ລ້ວນແຕ່ໄດ້ຂະຫຍາຍຕາຫນ່າງຂອງຕົນລົງສູ່ຮາກຖານຢ່າງທົ່ວເຖິງ, ທຸກໆບ້ານໄດ້ມີໄຟຟ້າໃຊ້ 100% ແລະ ມີລະບົບໂທລະຄົມການສື່ສານຕິດຕໍ່ພົວພັນທັນສະໄຫມ ແລະ ວ່ອງໄວ ການຜະລິດສິນຄ້າຂອງຊາວກະສິກອນ ແລະ ນັກທຸລະກິດໄດ້ເປັນຂະບວນກ້ວາງຂວາງເພີ່ມຂື້ນສະເລ່ຽ 10–20 % ຕໍ່ປີ , ເຮັດໃຫ້ເກີດມີຜະລິດຕະພັນສິນຄ້າ 62ຜະລິດຕະພັນ, ທັງເປັນການສ້າງວຽກເຮັດງານທໍາໃຫ້ແກ່ສັງຄົມໄດ້ເປັນຢ່າງດີ, ປະຊາຊົນແລະ ເດັກນ້ອຍໄດ້ຮັບການ ບໍລິການທາງດ້ານການສຶກສາ, ສາທາລະນະສຸກຢ່າງທົ່ວເຖິງ, ຮີດຄອງປະເພນີ ແລະ ວັດທະນະທໍາອັນດີງາມຂອງຊາດກໍ່ຄືຂອງປະຊາຊົນບັນດາເຜົ່າໄດ້ຮັບການອະນຸລັກຮັກສາ ແລະ ເສີມຂະຫຍາຍໃຫ້ດີຂຶ້ນເປັນກ້າວໆ, ທາງດ້ານການບໍລິການທ່ອງທ່ຽວໄດ້ມີການຂະຫຍາຍຕົວຢ່າງກ້າວກະໂດດ, ສາມາດດຶງດູດນັກທ່ອງທ່ຽວເຂົ້າມາທ່ຽວແຂວງວຽງຈັນສະເລ່ຍ 750.000 ຄົນຕໍ່ປີ ສາມາດສ້າງລາຍຮັບດ້ານການ ບໍລິການທ່ອງທ່ຽວ ແລະ ທຸລະກິດປິ່ນອ້ອມກວມເອົາ 23,61% ຂອງ GDP, ປະຈຸບັນພວກເຮົາ ສາມາດສ້າງບ້ານໃຫ້ກາຍເປັນບ້ານພັດທະນາໄດ້ 206 ບ້ານຄອບຄົວພັດທະນາມີເຖິງ 73.430 ຄອບຄົວ, ປະຈຸບັນຍັງມີບ້ານທຸກຍາກ 1ບ້ານ ແລະ ຄອບຄົວທຸກຍາກ ຍັງມີ 692ຄອບຄົວ.

 

ສະຫາຍ ຄໍາພັນ ສິດທິດໍາພາ , ຍັງໄດ້ຍົກໃຫ້ເຫັນມູນເຊື້ອອັນພິລາດອາດຫານ ແລະ ປີຊາສາມາດ ຂອງປະທານ ໄກສອນ ພົມວິຫານ, ເຊິ່ງເພີ່ນແມ່ນນັກຮັກຊາດຜູ້ຍິ່ງໃຫຍ່, ແມ່ນລູກຜູ້ປະເສີດຂອງປະຊາຊົນລາວບັນດາເຜົ່າ, ແມ່ນນັກຮົບປະຕິວັດຜູ້ດີເລີດ, ເພີ່ນເປັນຜູ້ນໍາສູງສຸດຂອງການປະຕິວັດລາວ ທີ່ມີຄວາມປີຊາສາມາດ, ມີຄວາມສະຫຼາດຫຼັກແຫຼມ, ມີໄຫວພີບອັນແຫຼມຄົມ ແລະ ມີນໍ້າໃຈຕໍ່ສູ້ອັນເດັດດ່ຽວໜຽວແໜ້ນ, ເປັນຜູ້ນໍາທີ່ແສນເຄົາລົບຮັກຂອງພັກ-ລັດ, ປະຊາຊົນ ແລະ ເປັນວິລະບູລຸດຂອງຊາດລາວເຮົາ ແລະ ມູນເຊື້ອປະຕິວັດ,ຄຸນທາດການເມືອງ, ຄຸນສົມບັດສິນທໍາ, ແບບແຜນວິທີເຮັດວຽກ ແລະ ການດໍາລົງຊີວິດຂອງ ປະທານ ໄກສອນ ພົມວິຫານ ໄດ້ເປັນແວ່ນແຍງອັນໃສແຈ້ງໃຫ້ແກ່ພະນັກງານ, ສະມາຊິກພັກ, ນັກຮົບ ແລະ ພົນລະເມືອງລາວທຸກໆຄົນຕະຫຼອດໄປ. ງານໂຮມຊຸມນຸມສະເຫຼີມສະຫຼອງຍັງໄດ້ມີການສະແດງສິລະປະ-ວັນນະຄະດີ ຈາກກອງສິລະປະກອນກອງທັບ ທີ່ສະແດງໃຫ້ເຫັນເຖີງ ການນຳພາຂອງພັກ-ລັດ ຕະຫລອດໄລຍະ 45 ປີ , ຜ່ານມາ ໃນການສ້າງສາພັດທະນາປະເທດຊາດ ມີຄວາມຮຸ່ງເຮືອງຈະເລີນກ້າວໜ້າ ແລະ ມີຄວາມສະຫງົບສຸກໂດຍພື້ນຖານ.