header

ກອງປະຊຸມໃຫຍ່ ຄັ້ງທີ VI ຜູ້ອົງຄະນະພັກແຂວງວຽງຈັນ ໄດ້ໄຂຂຶ້ນຢ່າງເປັນທາງການ.

ກອງປະຊຸມໃຫຍ່ ຄັ້ງທີ VI ຂອງອົງຄະນະພັກແຂວງວຽງຈັນໄດ້ໄຂຂຶ້ນຢ່າງເປັນທາງການໃນວັນທີ 18 ພະຈິກ 2020 ຢູ່ທີ່ສະໂມສອນໃຫຍ່ຂອງແຂວງ, ໂດຍການເປັນກຽດເຂົ້າຮ່ວມຂອງສະຫາຍ ຈັນສີ ໂພສີຄຳ ກຳມະການກົມການເມືອງສູນກາງພັກ,ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ, ມີບັນດາແຂກຖືກເຊີນພ້ອມດ້ວຍຜູ້ແທນສົມບູນຈຳນວນ 257 ສະຫາຍ, ຍິງ 35 ສະຫາຍ,ທີ່ເປັນຕົວແທນໃຫ້ແກ່ສະມາຊິກພັກທົ່ວແຂວງ 19.728 ສະຫາຍ ເຂົ້າຮ່ວມ.

ສະຫາຍ ຄຳພັນ ສິດທິດຳພາ ກຳມະການສູນກາງພັກ, ເລຂາພັກແຂວງ, ເຈົ້າແຂວງວຽງຈັນ ໄດ້ກ່າວໄຂກອງປະຊຸມໃຫຍ່ຄັ້ງນີ້ວ່າ :ຕະຫລອດໄລຍະການກະກຽມໃຫ້ແກ່ກອງປະຊຸມໃຫຍ່ຜູ້ແທນອົງຄະນະພັກແຂວງ ຄັ້ງທີ VI, ຄະນະພັກ-ອົງການປົກຄອງທຸກຂັ້ນ, ສະມາຊິກພັກ, ພະນັກງານ, ກໍາລັງປະກອບອາວຸດ ແລະ ປະຊາຊົນບັນດາເຜົ່າຊາວແຂວງວຽງຈັນ ໄດ້ພ້ອມພຽງກັນ ສ້າງຂະບວນການ, ສ້າງກິດຈະກໍາດ້ານຕ່າງໆ ຢ່າງຕໍ່ເນື່ອງ ແລະ ຟົດຟື້ນ ໄດ້ມີໝາກຜົນສໍາເລັດໃນຫຼາຍດ້ານໜ້າພາກພູມໃຈ.ເພື່ອສືບຕໍ່ປະຕິບັດຂະບວນການກໍຄືປະຕິບັດຕາມແນວທາງຍຸດທະສາດຂອງພັກກໍານົດໄວ້ໃຫ້ປະກົດຜົນເປັນຈິງເທື່ອລະກ້າວນັ້ນ, ກອງປະຊຸມໃຫຍ່ຄັ້ງນີ້ຈະໄດ້ພ້ອມກັນທົບທວນ ຫວນຄືນເຖິງຜົນງານແລະ ໄຊຊະນະໃນການຈັດຕັ້ງປະຕິບັດແນວທາງນະໂຍບາຍຂອງພັກ, ມະຕິກອງປະຊຸມໃຫຍ່ ຄັ້ງທີ V ຂອງອົງຄະນະພັກແຂວງ ໃນໄລຍະ 5 ປີຜ່ານມາ, ສະຫຼຸບສັງລວມ, ຖອດຖອດບົດຮຽນທີ່ສໍາຄັນ ແລະ ຈະໄດ້ພ້ອມກັນຄົ້ນຄ້ວາ ຕົກລົງຢ່າງເປັນເອກະສັນ ຮັບຮອງເອົາທິດທາງ, ໜ້າທີ່ສະເພາະໜ້າ ( 2021-2025 ) ແນໃສ່ປົກປັກຮັກສາ ແລະ ພັດທະນາແຂວງວຽງຈັນ ໃຫ້ມີບາດກ້າວຫັນປ່ຽນ
ໃໝ່ ນັບມື້ນັບໜັກແໜ້ນ, ຮັ່ງມີເຂັ້ມແຂງ, ປະກອບສ່ວນຢ່າງຕັ້ງໜ້າ ແລະ ສົມກຽດ ເຂົ້າໃນພາລະກິດປົກປັກຮັກສາ ແລະ ພັດທະນາປະເທດຊາດ. ໜ້າທີ່ສໍາຄັນຕັດສິນອີກຢ່າງໜຶ່ງແມ່ນ ກອງປະຊຸມໃຫຍ່ ຄັ້ງນີ້ຈະໄດ້ເລືອກຕັ້ງເອົາຄະນະບໍລິຫານງານພັກແຂວງຊຸດ ໃໝ່ ເພື່ອສືບຕໍ່ຊີ້ນໍາ-ນຳພາແຂວງວຽງຈັນຕໍ່ໄປ, ພ້ອມກັນນັ້ນ ກອງປະຊຸມຍັງຈະໄດ້ປ່ອນບັດເລືອກຕັ້ງເອົາຜູ້ແທນສົມບຸນຂອງແຂວງ ເພື່ອເຂົ້າຮ່ວມກອງປະຊຸມໃຫຍ່ ຄັ້ງທີ XI ຂອງພັກທີ່ຈະໄຂຂື້ນໃນອີກບໍ່ດົນຂ້າງໜ້ານີ້.

ໃນວັນເວລາ ທີ່ມີຄວາມໝາຍສໍາຄັນທາງການເມືອງຂອງແຂວງວຽງຈັນ, ກອງປະຊຸມໃຫຍ່ ຍັງຈະໄດ້ຮັບຟັງການໂອລົມໃຫ້ທິດຊີ້ນໍາຈາກ ສະຫາຍ ຈັນສີ ໂພສີຄໍາ ກໍາມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ເພື່ອຊີ້ນໍາຄະນະບໍລິຫານງານພັກແຂວງຊຸດໃໝ່, ຜູ້ແທນກອງປະຊຸມ ໃຫ້ກໍາແໜ້ນ, ເຊື່ອມຊຶມເນື້ອໃນຈິດໃຈ ແລະ ຍຸດທະສາດຂອງພັກໃນສະເພາະໜ້າ ແລະ ຍາວນານ.ທັງໝົດນີ້ ແມ່ນໜ້າທີ່ສໍາຄັນທີ່ກອງປະຊຸມໃຫຍ່ ຄັ້ງນີ້ ຕ້ອງໄດ້ປະຕິບັດດ້ວຍຄວາມຮັບຜິດຊອບສູງ ແລະ ໃຫ້ມີຜົນສໍາເລັດ ຕາມຈຸດປະສົງຄາດໝາຍທີ່ວາງໄວ້ທຸກປະການ.ຈາກຄວາມໝາຍສຳຄັນ ແລະ ໜ້າທີ່ຂອງກອງປະຊຸມ ຄັ້ງນີ້ ປະທານກອງປະຊຸມໄດ້ຮຽກຮ້ອງມາຍັງຜູ້ແທນກອງປະຊຸມໃຫຍ່ ທຸກສະຫາຍ ຈົ່ງເຊີດຊນໍ້າໃຈຮັບຜິດຊອບສູງ, ເສີມຂະຫຍາຍສິດປະຊາທິປະໄຕຢ່າງແຂງແຮງ, ສຸມສະຕິປັນຍາ ແລະ ຄວາມຮູ້ຄວາມສາມາດ ເຂົ້າໃນການຄົ້ນຄວ້າ ຄິດຫງໍາ, ຕົກລົງບັນຫາສໍາຄັນໃຫ້ເລິກເຊິ່ງ ຖືກຕ້ອງ ແລະ ມີຄວາມເປັນເອກະພາບສູງຕໍ່ທຸກບັນຫາຕ່າງໆ ຂອງກອງປະຊຸມ,ເຮັດໃຫ້ກອງປະຊຸມໃຫຍ່ ຄັ້ງນີ້ ດຳເນີນໄປດ້ວຍບັນຍາກາດອັນຟົດຟື້ນ, ບັນລຸຜົນສໍາເລັດຕາມຄາດໝາຍທີ່ວາງໄວ້ຢ່າງຈົບງາມ.

ກອງປະຊຸມໃຫຍ່ຄັ້ງນີ້ຈະໄດ້ດຳເນີນໄປເປັນເວລາ2ວັນເຕັມຄື: ວັນທີ 18-19 ພະຈິກ 2020 ຈື່ງຈະອັດລົງ.