header

ຄະນະບໍລິຫານງານພັກ ແຂວງວຽງຈັນ ດຳເນີນຊີວິດການເມືອງ ທ້າຍສະໄໝທີ V

ກອງປະຊຸມດຳເນີນຊີວິດການເມືອງ ທ້າຍສະໄໝທີ V ຂອງຄະນະບໍລິຫານງານພັກແຂວງວຽງຈັນ ໄດ້ດຳເນີນຂຶ້ນໃນລະຫວ່າງວັນທີ 28-30 ຕຸລາ 2020 ຢູ່ທີ່ຫ້ອງວ່າການແຂວງວຽງຈັນ, ໂດຍການເປັນກຽດເຂົ້າຮ່ວມຂອງ ສະຫາຍ ຈັນສີ ໂພສີຄຳ ກຳມະການກົມການເມືອງສູນກາງພັກ, ຄະນະເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ,ບັນດາສະຫາຍຄະນະຮັບຜິດຊອບຕິດຕາມ, ຊຸກຍູ້ກອງປະຊຸມໃຫຍ່ຂັ້ນສູນກາງ, ມີບັນດາສະຫາຍໃນຄະນະບໍລິຫານງານພັກແຂວງວຽງຈັນເຂົ້າຮ່ວມ.

ສະຫາຍ ຄຳພັນ ສິດທິດຳພາ ກຳມະການສູນກາງພັກ, ເລຂາພັກແຂວງ, ເຈົ້າແຂວງວຽງຈັນ ໄດ້ກ່າວເປີດກອງປະຊຸມວ່າ: ກອງປະຊຸມທີ່ມີຄວາມໝາຍສຳຄັນໃນຄັ້ງນີ້ ຈະໄດ້ດຳເນີນເປັນເວລາ 3 ວັນ ແລະ ມີ 2 ວາລະຄື:
ວາລະທີ 1: (ເປັນວາລະພາຍໃນ) ຈະໄດ້ພ້ອມກັນຮັບຟັງການຜ່ານຮ່າງບົດສຳຫຼວດການນຳພາລວມຂອງຄະນະບໍລິຫານງານພັກແຂວງ ຊຸດທີ V ແລະ ພ້ອມກັນປະກອບຄຳຄິດ-ຄຳເຫັນໃສ່ຮ່າງບົດສຳຫຼວດດັ່ງກ່າວ. ຈາກນັ້ນ, ຈະໄດ້ດຳເນີນການສຳຫຼວດບຸກຄົນ ໃນຄະນະບໍລິຫານງານພັກແຂວງ ຊຸດທີ V. ວາລະທີ 2: (ເປັນວາລະເປີດກວ້າງ) ຈະໄດ້ພ້ອມກັນປະກອບຄຳຄິດເຫັນໃສ່ ຮ່າງລາຍງານການເມືອງ, ແຜນພັດທະນາເສດຖະກິດ-ສັງຄົມ ແລະ ຮ່າງບົດສຳຫຼວດການນຳພາລວມຂອງ ຄະນະບໍລິຫານງານພັກແຂວງ ຊຸດທີ V; ດໍາເນີນການທາບທາມບຸກຄະລະກອນ ຜູ້ອອກສະໝັກຮັບເລືອກຕັ້ງ ເປັນຄະນະບໍລິຫານງານພັກແຂວງ ສະໄໝ VI, ຮອບທີ III; ທາບທາມບຸກຄະລະກອນ ຜູ້ຈະອອກໝັກຮັບເລືອກຕັ້ງເປັນຄະນະປະຈຳພັກແຂວງ, ເລຂາ-ຮອງເລຂາພັກແຂວງ, ປະທານຮອງປະທານຄະນະກວດກາພັກແຂວງ.ການດຳເນີນຊີວິດການເມືອງ ຂອງຄະນະບໍລິຫານງານພັກແຂວງວຽງຈັນ ໃນຄັ້ງນີ້ ແມ່ນເພື່ອເປັນການກວດກາ, ຕີລາຄາຄວາມຮັບຜິດຊອບໜ້າທີ່ການເມືອງ ທີ່ໄດ້ຖືກມອບໝາຍ, ຄຸນທາດການເມືອງ, ຄຸນສົມບັດສິນທຳປະຕິວັດ ແລະ ແບບແຜນດຳລົງຊີວິດ ຂອງບັນດາສະຫາຍ ໃນຄະນະບໍລິຫານງານພັກແຂວງ ຊຸດທີ V ຜ່ານມາ.

ອັນນີ້, ກໍເພື່ອແນໃສ່ປັບປຸງ-ປົວແປງພັກໃຫ້ປອດໃສ, ເຂັ້ມແຂງ ແລະ ໜັກແໜ້ນ, ຊອກໃຫ້ເຫັນດ້ານດີທີ່ຕັ້ງໜ້າ ແລະ ດ້ານອ່ອນ-ຂໍ້ຄົງຄ້າງ ເພື່ອຈຳກັດແກ້ໄຂໃນຕໍ່ໜ້າ; ເສີມສ້າງຄວາມສາມັກຄີເປັນປຶກແຜ່ນ, ແໜ້ນໜາ; ຮັບປະກັນການຈັດຕັ້ງປະຕິບັດພາ ລະບົດບາດ ແລະ ເຊີດຊູຄວາມສາມາດນຳພາຂອງພັກ ໃຫ້ໜັກແໜ້ນ-ເຂັ້ມແຂງຂຶ້ນເປັນກ້າວໆ.