header

ກຳມະການກົມການເມືອງສູນກາງພັກ, ຄະນະເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ລົງຊຸກຍູ້-ຊີ້ນຳການກະກຽມດຳເນີນກອງປະຊຸມໃຫຍ່ ຄັ້ງທີ VI ຂອງອົງຄະນະພັກແຂວງວຽງຈັນ

ໃນວັນທີ 6 ຕຸລາ 2020 ທ່ານ ຈັນສີ ໂພສີຄຳ ກຳມະການກົມການເມືອງສູນກາງພັກ, ຄະນະເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ລົງຊຸກຍູ້-ຊີ້ນຳການກະກຽມດຳເນີນກອງປະຊຸມໃຫຍ່ ຄັ້ງທີ VI ຂອງອົງຄະນະພັກແຂວງວຽງຈັນ, ໂດຍການໃຫ້ກຽດຕ້ອນຮັບຈາກ ທ່ານ ຄຳພັນ ສິດທິດຳພາ ກຳມະການສູນກາງພັກ,ເລຂາພັກແຂວງ,ເຈົ້າແຂວງໆວຽງຈັນ,ພ້ອມດ້ວຍບັນດາອານຸກຳມະການ,ຄະນະຮັບຜິດຊອບການກະກຽມດຳເນີນກອງປະຊຸມໃຫຍ່ຂອງແຂວງເຂົ້າຮ່ວມ.

ທ່ານເຈົ້າແຂວງໆວຽງຈັນ ໄດ້ລາຍງານສະພາບລວມໂດຍຫຍໍ້ ກ່ຽວກັບການກະກຽມດຳເນີນກອງປະຊຸມໃຫຍ່ ຄັ້ງທີ VI ຂອງອົງຄະນະພັກແຂວງວຽງຈັນເຊິ່ງມາຮອດປະຈຸບັນຮາກຖານພັກ,ອົງຄະນະພັກເມືອງ ແລະ ອົງການຈັດຕັ້ງມະຫາຊົນ ໄດ້ສຳເລັດກອງປະຊຸມໃຫຍ່ຂອງຕົນແລ້ວ 100%, ຄະນະພັກໄດ້ຕາມເປົ້າໝາຍທີ່ວາງໄວ້,ມີຜູ້ເກົ່າ,ຜູ້ໃໝ່,ມີຮຸ່ນອາວຸໂສ,ຮຸ່ນກາງ,ຮຸ່ນໜຸ່ມ,ປະກອບມີເພດເຜົ່າ,ດ້ານເນື້ອໃນເອກະສານຕ່າງໆທີ່ຈະຮັບໃຊ້ໃຫ້ແກ່ກອງປະຊຸມໃຫຍ່ອົງຄະນະພັກແຂວງ ຄັ້ງທີ VI ແມ່ນສຳເລັດໂດຍພື້ນຖານແຕ່ກໍ່ຍັງສືບຕໍ່ປັບປຸງຄາດວ່າຈະໃຫ້ສຳເລັດພາຍໃນກາງເດືອນພະຈິກ 2020 ນີ້, ດ້ານບຸກຄະລາກອນໄດ້ສຳເລັດການທາບທາມຮອບທີສອງ,ປະຈຸບັນກຳລັງກະກຽມເພຶ່ອທາບທາມຮອບທີສາມ,ດ້ານ ສະຖານທີ່,ພິທີການ,ປະດັບປະດາ ແລະ ຍ້ອງຍໍ ໄດ້ຈັດຕັ້ງເຊື່່່່ອມຊຶມບັນດາມະຕິທີ່ສຳຄັນຂອງພັກ,ຂອງຊາດ,ຈັດຕັ້ງຂະບວນການອອກແຮງງານ,ອານາໄມສຳນັກງານອົງການ,ປັບປຸງບູລະນະ,ປະດັບປະດາອາຄານສະຖານທີ່ຕ່າງໆ ແລະ ຕາມເສັ້ນທາງພາຍໃນແຂວງ,ແຂ່ງຂັນກິລາ,ຂະບວນການປູກພືດ,ລ້ຽງສັດໃຫຍ່-ສັດປີກ, ຜະລິດຫັດຖະກຳ, ປຸງແຕ່ງຂອງປະຊາຊົນ ເພຶ່ອຜະລິດເປັນສິນຄ້າຢ່າງຟົດຟືື້້ນ ສາມາດກາຍເປັນຄອບຄົວຕົວແບບດ້ານຕ່າງໆເພີ່ມຂຶ້ນ,ດ້ານວຽກງານປ້ອງກັນຊາດ-ປ້ອງກັນຄວາມສະຫງົບ ດ້ວຍຄວາມເປັນເຈົ້າການຂອງກຳລັງປະກອບອາວຸດ ແລະ ການປະກອບສ່ວນຢ່າງຕັ້ງໜ້າຂອງປະຊາຊົນບັນດາເຜົ່າເຮັດໃຫ້ທົ່ວແຂວງມີຄວາມສະຫງົບ, ຄວາມເປັນລະບຽບຮຽບຮ້ອຍດີ,ປະຊາຊົນບໍ່ວ່າຢູ່ທົ່ງພຽງ ແລະ ພູດອຍ ຍູ່ທ່າງທຳມາຫາກິນ ແລະ ມີຄວາມປອດໄພທາງຊີວິດ ແລະ ຊັບສິນ. ຫຼັງຈາກນັ້ນບັນດາອານຸກຳມະການກໍ່ໄດ້ລາຍງານເພີ່ມເຕີມແຕ່ລະໜ້າວຽກທີ່ຕົນເອງໄດ້ຮັບຜິດຊອບ ແລະ ສາມາດຈັດຕັ້ງປະຕິບັດໄດ້ສຳເລັດ.

ຈາກນັ້ນ ທ່ານ ຈັນສີ ໂພສີຄຳ ກຳມະການກົມການເມືອງສູນກາງພັກ, ຄະນະເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານທີ່ແຂວງວຽງຈັນສາມາດຍາດມາໄດ້, ພ້ອມທັງເໜັ້ນໜັກໃຫ້ແຂວງວຽງຈັນຕ້ອງໄດ້ເອົາໃຈໃສ່ຕື່ມເພຶ່ອກະກຽມດຳເນີນກອງປະຊຸມໃຫຍ່ອົງຄະນະພັກແຂວງຂອງຕົນໃຫ້ເຕັມໄປດ້ວຍເນື້ອໃນອັນອຸດົມສົມບຸນ ແລະ ມີຄວາມໝາຍເລິກເຊິ່ງເປັນຕົ້ນແມ່ນໃຫ້ເອົາໃຈໃສ່ສ້າງຂະບວນການຢ່າງຕໍ່ເນື່ອງເປັນປົກກະຕິ ໂດຍເໜັ້ນໃສ່ຂະບວນການຜະລິດເປັນສິນຄ້າ, ລຶບລ້າງຄວາມທຸກຍາກຂອງປະຊາຊົນ, ຂະບວນການອອກແຮງງານອານາໄມ ແລະ ອື່ນໆ, ເອົາໃຈໃສ່ປັບປຸງດ້ານເນື້ອໃນໃຫ້ລະອຽດ,ຖືກຕ້ອງ,ສອດຄ່ອງກັບວຽກງານຕົວຈິງ,ໃຫ້ຍົກສູງຄວາມຮັບຜິດຊອບຕໍ່ພັກ, ຕໍ່ອົງຄະນະພັກ, ປັບປຸງສະມາຊິກພັກ, ຄະນະພັກແຕ່ລະຂັ້ນ, ດຳເນີນຊີວິດການເມືອງໃຫ້ດີ ເພຶ່ອປັບປຸງກໍ່ສ້າງເຊິ່ງກັນ ແລະ ກັນດ້ວຍຄວາມຈິງໃຈ,ປັບປຸງການຈັດຕັ້ງພັກໃຫ້ມີຄວາມສາມັກຄີເປັນອັນໜຶ່ງອັນດຽວກັນເພຶ່ອກ້າວໄປສູ່ການດຳເນີນກອງປະຊຸມໃຫຍ່ຄັ້ງທີ VI ຂອງອົງຄະນະພັກແຂວງວຽງຈັນ ໄດ້ຮັບຜົນສຳເລັດຕາມລະດັບຄາດໝາຍທີ່ວາງໄວ້.