header

ກອງປະຊຸມໃຫຍ່ຄັ້ງທີ IV ຂອງອົງຄະນະພັກ ເມືອງວຽງຄຳ ໄດ້ໄຂຂຶ້ນຢ່າງເປັນທາງການ

ກອງປະຊຸມໃຫຍ່ຄັ້ງທີ IV ຂອງອົງຄະນະພັກເມືອງວຽງຄຳ ແຂວງວຽງຈັນ ໄດ້ໄຂຂຶ້ນຢ່າງເປັນທາງການ.

ໃນຕອນເຊົ້າວັນທີ 26 ພຶດສະພາ 2020 ຜ່ານມານີ້ເມືອງວຽງຄຳ ໄດ້ຈັດກອງປະຊຸມໃຫຍ່ຄັ້ງທີ IV ຂອງອົງຄະນະພັກເມືອງວຽງຄຳ ຢູ່ທີ່ຫ້ອງປະຊຸມໃຫຍ່ ກອງບັນຊາການທະຫານ ແຂວງວຽງຈັນ, ໂດຍມີການກວດວັດແທກອຸນຫະພູມ ແລະ ປະຕິບັດມາດຕະການສະກັດກັ້ນ-ເຝົ້າລະວັງ ການລະບາດຂອງເຊື້ອພະຍາດ ໂຄວິດ-19, ພາຍໃຕ້ການເປັນປະທານຂອງ ສະຫາຍຄໍາພັນສິດທິດຳພາກຳມະການສູນກາງພັກ, ເລຂາຄະນະບໍລິຫານງານພັກແຂວງ - ເຈົ້າແຂວງວຽງຈັນພ້ອມດ້ວຍຜູ້ແທນສົມບູນ 105 ສະຫາຍ, ຍິງ 29 ສະຫາຍເຊີ່ງເປັນຕົວແທນໃຫ້ສະມາຊິກພັກທົ່ວເມືອງ 963 ສະຫາຍເຂົ້າຮ່ວມ.

ສະຫາຍ ພອນແກ້ວ ຂຸນພົນ ເລຂາພັກເມືອງ, ເຈົ້າເມືອງໆວຽງຄຳ ໄດ້ກ່າວໄຂກອງປະຊຸມຢ່າງເປັນທາງການວ່າ: ກອງປະຊຸມໃຫຍ່ຄັ້ງທີ IV ຂອງຜູ້ແທນອົງຄະນະພັກເມືອງວຽງຄຳ ໄດ້ໄຂຂຶ້ນໃນທ່າມກາງບັນຍາກາດທີ່ທົ່ວກອງທັບທົ່ວປວງຊົນລາວທັງຊາດເວົ້າລວມ ເວົ້າສະເພາະແມ່ນຊາວເມືອງວຽງຄຳ ແຂວງວຽງຈັນກຳລັງສຸມໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ X ຂອງພັກ, ມະຕິກອງປະຊຸມໃຫຍ່ ຜູ້ແທນອົງຄະນະພັກແຂວງວຽງຈັນ ຄັ້ງທີ V ຂອງອົງຄະນະພັກແຂວງວຽງຈັນທີ່ຈະໄຂຂື້ນໃນຕໍ່ໜ້າຢ່າງເປັນຂະບວນການຟົດຟື້ນ.

ໃນກອງປະຊຸມຄັ້ງນີ້ບັນດາຜູ້ແທນກອງປະຊຸມຈະໄດ້ພ້ອມກັນສຸມໃສ່ພິຈາລະນາຮັບຮອງເອົາບົດລາຍງານການເມືອງ, ແຜນພັດທະນາເສດຖະກິດ-ສັງຄົມ 5 ປີຜ່ານມາ (2015-2019) ແລະຍັງໄດ້ຮັບຟັງບົດລາຍງານການເມືອງຂອງຄະນະບໍລິຫານງານພັກເມືອງທຸລະຄົມສະໄໝທີVI , ວາງທິດທາງຄາດໝາຍສູ້ຊົນໃນຊຸມປີຕໍ່ໜ້າ (2020-2024), ພ້ອມກັບການປະກອບຄຳຄິດຄຳເຫັນຈາກບັນດາພາກສ່ວນຕ່າງໆພາຍໃນເມືອງແລະບັນດາເມືອງອ້ອມຂ້າງ, ຄອບຄົວຕົວແບບດ້ານຕ່າງໆກອງປະຊຸມຈະໄດ້ພ້ອມກັນດຳເນີນການປ່ອນບັດເລືອກຕັ້ງເອົາຄະນະບໍລິຫານງານພັກເມືອງຊຸດໃໝ່ເພື່ອສືບຕໍ່ນຳພາຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງນີ້ໃຫ້ປະກົດຜົນເປັນຈິງ, ເລືອກເອົາຜູ້ແທນເພຶ່ອເປັນຕົວແທນຂອງອົງຄະນະພັກເມືອງໄປຮ່ວມກອງປະຊຸມໃຫຍ່ຜູ້ອົງຄະນະພັກແຂວງຄັ້ງທີ VI.

ພິເສດກອງປະຊຸມໃຫຍ່ຄັ້ງນີ້ຍັງຈະໄດ້ຮັບກຽດຟັງການໂອ້ລົມຈາກ ສະຫາຍ ຄຳພັນ ສິດທິດຳພາກຳມະການສູນກາງພັກ ເລຂາຄະນະບໍລິຫານງານພັກແຂວງ - ເຈົ້າແຂວງວຽງຈັນ ທີ່ໄດ້ສະແດງຄວາມຍ້ອງຍໍຊົມເຊີຍຕໍ່ການຊີ້ນຳໆພາຂອງຄະນະພັກຊຸດເກົ່າທີ່ໄດ້ເອົາໃຈໃສ່ຊີ້ນໍາໆພາພະນັກງານ, ສະມາຊິກພັກ ແລະ ປະຊາຊົນບັນດາເຜົ່າປະຕິບັດໜ້າທີ່ການເມືອງຂອງຕົນແລະຍາດໄດ້ຜົນສຳເລັດໃນຫຼາຍດ້ານ. ພ້ອມກັນນັ້ນທ່ານເຈົ້າແຂວງຍັງໄດ້ສະແດງຄວາມເປັນຫ່ວງເປັນໄຍຕໍ່ດ້ານອ່ອນ, ຂໍ້ຄົງຄ້າງຫລາຍດ້ານແລະໄດ້ຮຽກຮ້ອງໃຫ້ຄະນະພັກເມືອງຊຸດໃໝ່ຕ້ອງໄດ້ສືບຕໍ່ປັບປຸງແກ້ໄຂບັນດາໜ້າວຽກທີ່ຍັງຄົງຄ້າງໃຫ້ໝົດໄປ. ທ່ານເຈົ້າແຂວງຍັງໄດ້ມີຄວາມເຊື່ອໝັ້ນຕໍ່ຄະນະບໍລິຫານງານພັກຊຸດໃໝ່ທີ່ຈະສືບຕໍ່ຊີ້ນຳ-ນຳພາຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນອົງຄະນະພັກເມືອງວຽງຄຳ ໃຫ້ຍາດໄດ້ຜົນງານແລະມີຜົນສຳເລັດຍິ່ງໃຫຍ່ກວ່າເກົ່າ. ກອງປະຊຸມໃຫຍ່ຄັ້ງນີ້ຍັງໄດ້ຮຽກຮ້ອງມາຍັງຜູ້ແທນ, ສະມາຊິກພັກ, ພະນັກງານແລະປະຊາຊົນບັນດາເຜົ່າພາຍໃນເມືອງຈົ່ງເຊີດຊູສະຕິແລະຍົກສູງຄວາມຮັບຜິດຊອບໜ້າທີ່ການເມືອງຂອງຕົນເຮັດໃຫ້ວຽກງານໃນແຕ່ລະດ້ານມີການຫັນປ່ຽນແປງໃໝ່ທີ່ຕັ້ງໜ້າເຮັດໃຫ້ພັກມີຄວາມປອດໃສ່, ເຂັ້ມແຂງແລະໜັກແໜ້ນຢ່າງບໍ່ຢຸດຢັ້ງ. ກອງປະຊຸມຈະໄດ້ດໍາເນີນໄປເປັນເວລາ 2 ວັນຄື : ວັນທີ 26-27 ພຶດສະພາ 2020 ຈຶ່ງຈະອັດລົງ.