header

ພະແນກກະສິກຳ ແລະ ປ່າໄມ້ແຂວງ ຈັດກອງປະຊຸມໃຫຍ່ືຂື້ນຢ່າງເປັນທາງການ

ກອງປະຊຸມໄດ້ໄຂຂື້ນ ແລະ ອັດລົງໃນຕອນເຊົ້າວັນທີ 22 ພຶດສະພາ 2020 ນີ້ ໂດຍການເປັນປະທານຂອງ ສະຫາຍ ພູວົງ ບຸນຊູ ເລຂາ ຄະນະພັກຮາກຖານ ພະແນກກະສິກຳ ແລະ ປ່າໄມ້ ແຂວງ ເປັນກຽດເຂົ້າຮ່ວມຂອງສະຫາຍ ນາງ ສິງຄຳ ຄົງສະຫວັນ ຮອງເລຂາພັກ ແຂວງວຽງຈັນ, ມີຄະນະຊີ້ນຳກອງປະຊຸມໃຫຍ່ ສາມຂັ້ນຂອງແຂວງ, ມີຜູ້ແທນສົມບູນ 80 ສະຫາຍ ພາຍໃນຄະນະພັກຮາກຖານ ພະແນກ ກະສິກຳ ແລະ ປ່າໄມ້ ແຂວງວຽງຈັນ ເຊິ່ງຕາງຫນ້າໃຫ້ແກ່ສະມາຊິກພັກຈຳນວນ 206 ສະຫາຍເຂົ້າຮ່ວມ.

ສະຫາຍ ພູວົງ ບຸນຊູ ເລຂາ ຄະນະພັກຮາກຖານ ພະແນກກະສິກຳ ແລະ ປ່າໄມ້ ແຂວງ ໄດ້ຂື້ນຜ່ານຮ່າງບົດລາຍງານການເມືອງໃນໄລຍະຜ່ານມາ ຄະນະພັກຮາກຖານ ພະແນກກະສິກຳ ແລະ ປ່າໄມ້ ໄດ້ເອົາໃຈໃສ່ຊີ້ນຳບັນດາໜ່ວຍພັກເຮັດວຽກງານສຶກສາອົບຮົມການເມືອງ-ແນວຄິດ, ແບບແຜນວິທີເຮັດວຽກໃຫ້ແກ່ສະມາຊິກພັກ, ພະນັກງານ-ລັດຖະກອນເປັນປົກກະຕິ. ເປັນຕົ້ນແມ່ນໄດ້ຈັດຕັ້ງເຜີຍແຜ່ເຊື່ອມຊຶມມະຕິ, ຄໍາສັ່ງຂອງພັກ-ລັດ, ເອກະສານມູນເຊື້ອວັນສໍາຄັນຂອງຊາດ ຂອງພັກ, ອົງການຈັດຕັ້ງມະຫາຊົນ ມະຕິກອງປະຊຸມໃຫຍ່ຄັ້ງທີ X ຂອງພັກ, ກອງປະຊຸມໃຫຍ່ຄັ້ງທີ V ຂອງອົງຄະນະພັກແຂວງ, ກອງປະຊຸມໃຫຍ່ຄັ້ງທີ II ຂອງຄະນະພັກຮາກຖານ, ເພື່ອດຳເນີນກອງປະຊຸມໃຫຍ່ຄະນະພັກຮາກຖານກໍ່ໄດ້ສືບຕໍ່ນໍາພາດຳເນີນຊີວິດການເມືອງ ແລະ ເປີດກອງປະຊຸມໃຫຍ່ຂອງໜ່ວຍພັກສໍາເລັດ 13 ໜ່ວຍ ສາມາດຕີລາຄາຈັດປະເພດ ໜ່ວຍພັກ, ຕີລາຄາແບ່ງປະເພດສະມາຊິກພັກ ປະເພດ ແຂງ 199 ສະຫາຍ, ຍິງ46 ສະຫາຍ, ບໍ່ໄດ້ຈັດປະເພດ 7 ສະຫາຍ ( ຍົກຍ້າຍມາໃໝ່, ສະມາຊິກສໍາຮອງ 6 ສະຫາຍ ), ພ້ອມນີ້ ຄະນະພັກຮາກຖານໄດ້ເອົາໃຈໃສ່ ຊີ້ນຳ ນຳພາ ຂະແໜງການ, ໂຄງການ, ສູນສະຖານີ ແລະ ຫ້ອງການ ກະສິກຳ ແລະ ປ່າໄມ້ເມືອງ ໃນການຈັດຕັ້ງປະຕິບັດແຜນພັດທະນາກະສິກຳ ແລະ ປ່າໄມ້ ຄັ້ງທີ VII ໂດຍສຸມໃສ່ (ໜື່ງ)ເປົ້າໝາຍຜະລິດສະບຽງອາຫານ, (ສອງ) ເປົ້າໝາຍ ຜະລິດເປັນສິນຄ້າ, (ສາມ) ເປົ້າໝາຍຄຸ້ມຄອງປ່າໄມ້ແບບຍືນຍົງ, (ສີ່)ເປົ້າໝາຍພັດທະນາຊົນນະບົດ ແລະ ລືບລ້າງຄວາມທຸກຍາກ.

ຮອດ ປີ 2020 ສາມາດຜະລິດເຂົ້າໃນເນື້ອທີ່ທັງໝົດ 65.405 ເຮັກຕາ ຜົນຜະລິດ ສະເລ່ຍ 281.123 ໂຕນ/ປີ ສະເລ່ຍໃສ່ຫົວຄົນໄດ້ຮັບ 632 ກິໂລ/ຄົນ/ປີ,
• ການຜະລິດພືດສະບຽງ ແລະ ພຶດສິນຄ້າສາມາດປະຕິບັດໄດ້ໃນເນື້ອທີ່ 53.538 ເຮັກຕາ ຜົນຜະລິດສະເລ່ຽ448.959 ໂຕນ/ປີ,
• ການຜະລິດຊີ້ນ, ປາ, ໄຂ່ ເພື່ອບໍລິໂພກປະຕິບັດໄດ້ 29.896 ໂຕນ, ສະເລ່ຍໃສ່ຫົວຄົນໄດ້ 64 ກິໂລ/ຄົນ/ປີ ແລະ ເອົາໃຈໃສ່ການຜະລິດເປັນສິນຄ້າລວມມູນຄ່າສິນຄ້າທັງໝົດ 5 ປີ ບັນລຸໄດ້ 6.078,50 ຕື້ກີບ,
• ການຄຸ້ມຄອງພັດທະນາວຽກງານປ່າໄມ້ຕາມທິດສີຂຽວ ຍືນຍົງໄດ້ເອົາໃຈໃສ່ຊີ້ນາໃນຄຸ້ມຄອງ ແລະ ພັດທະນາ ຕາມ 3 ປະພດປ່າ ຄື ປ່າສະຫງວນ ໃນເນື້ອທີ່ 236.519 ຮຕ, ປ່າປ້ອງກັນ 223.030 ຮຕ, ປ່າຜະລິດ211.683 ຮຕ ໂດຍເອົາການຟື້ນຟູແບບທາມະຊາດ ແລະ ປູກທົດແທນ.

ກອງປະຊຸມຄັ້ງນີ້ ຍັງໄດ້ປ່ອນບັດເລືອກເອົາຄະນະພັກຮາກຖານຊຸດໃໝ່ ເພື່ອຊີ້ນຳ-ນຳພາຈັດຕັ້ງປະຕິ ບັດມະຕິກອງປະຊຸມໃຫຍ່ ຄັ້ງທີIII ຂອງຄະນະພັກຮາກຖານດັ່ງກ່າວ ເຊິ່ງມາຜູ້ສະໝັກ 9 ສະຫາຍ, ເລືອກເອົາ 7 ສະຫາຍ, ເຊິ່ງຜູ້ແທນສົມບູນແຕ່ລະສະຫາຍ ໄດ້ໃຊ້ສິດປະຊາທິປະໄຕ ປ່ອນບັດຄັດເລືອກເອົາຄະນະພັກຊຸດໃໝ່.

ໃນກອງປະຊຸມຄັ້ງປະຖົມມະລຶກ ໄດ້ເປັນເອກະພາບເລືອກເອົາ ສະຫາຍ ພູວົງ ບຸນຊູ ເປັນເລຂາຄະນະພັກຮາກຖານ, ເລືອກເອົາ ສະຫາຍ ສົມອົກ ຫນໍ່ຈະເລີນ ເປັນຮອງເລຂາ, ສະຫາຍ ຄຳຕັນ ແກ້ວນິນ ເປັນປະທານກວດກາ ແລະ ເລືອກເອົາຄະນະອີກ 4 ສະຫາຍ, ກອງປະຊຸມຍັງໄດ້ຄັດເລືອກເອົາສະຫາຍ ພູວົງ ບຸນຊູ, ສະຫາຍ ຄອນສະຫວັນ ສີອັກຄະສອນ ເປັນຜູ້ແທນສົມບູນ ແລະ ເລືອກເອົາ ສະຫາຍ ຄຳຕັນ ແກ້ວນິນ ເປັນຜູ້ແທນສຳຮອງ ເພື່ອເຂົ້າຮ່ວມກອງປະຊຸມໃຫຍ່ອົງຄະນະພັກແຂວງວຽງຈັນ ຄັ້ງທີVI ທີ່ຈະໄຂຂຶ້ນໃນຕໍ່ໜ້າ.