header

ເມືອງໂພນໂຮງຈັດກອງປະຊຸມໃຫຍ່ຂອງອົງຄະນະພັກເມືອງຄັ້ງທີ VII

ກອງປະຊຸມໃຫຍ່ຄັ້ງທີ VII ຂອງອົງຄະນະພັກເມືອງໂພນໂຮງແຂວງວຽງຈັນໄດ້ໄຂຂຶ້ນຢ່າງເປັນທາງການ.

ໃນຕອນເຊົ້າ ວັນທີ 10 ມີນາ 2020 ຜ່ານມານີ້ເມືອງໂພນໂຮງ ໄດ້ຈັດກອງປະຊຸມໃຫຍ່ຄັ້ງທີ VII ຂອງອົງຄະນະພັກເມືອງໂພນໂຮງ ຢູ່ທີ່ສະໂມສອນຂອງຫ້ອງວ່າການເມືອງດັ່ງກ່າວ ໂດຍໄດ້ຮັບກຽດຢ່າງສູງ ແລະ ເຂົ້າຮ່ວມຂອງ ສະຫາຍ ຄໍາພັນ ສິດທິດຳພາ ກຳມະການສູນກາງພັກ, ເລຂາຄະນະບໍລິຫານງານພັກແຂວງ - ເຈົ້າແຂວງວຽງຈັນ ພ້ອມດ້ວຍຜູ້ແທນສົມບູນ 131 ສະຫາຍ, ຍິງ15 ສະຫາຍ ເຊີ່ງເປັນຕົວແທນໃຫ້ສະມາຊິກພັກທົ່ວເມືອງ 2,014 ສະຫາຍເຂົ້າຮ່ວມ.

ສະຫາຍ ສົມປະສົງ ສຸວົງຄຳຈັນ ກຳມະການພັກແຂວງ, ວ່າການເລຂາພັກເມືອງ, ເຈົ້າເມືອງໆໂພນໂຮງ ໃນນາມປະທານກອງປະຊຸມໄດ້ຂື້ນກ່າວວ່າ: ກອງປະຊຸມໃຫຍ່ຄັ້ງທີ VII ຂອງອົງຄະນະພັກເມືອງໂພນໂຮງ ໄດ້ໄຂຂຶ້ນໃນທ່າມກາງບັນຍາກາດທີ່ທົ່ວກອງທັບ ທົ່ວປວງຊົນລາວທັງຊາດກໍຄືທົ່ວແຂວງວຽງຈັນ ເວົ້າລວມ, ເວົ້າສະເພາະຢູ່ເມືອງໂພນໂຮງ ຂອງພວກເຮົາພວມສຸ່ມໃສ່ຢ່າງເຄັ່ງຮ້ອນ ຈັດຕັ້ງຜັນຍະຫຍາຍມະຕິກອງປະຊຸມໃຫຍ່ ຄັ້ງທີ X ຂອງພັກ, ມະຕິກອງປະຊຸມໃຫຍ່ຜູ້ແທນອົງຄະນະພັກແຂວງວຽງຈັນຄັ້ງທີ V, ຄຽງຄູ່ກັບການສ້າງຜົນງານເພື່ອຂຳນັບຮັບຕ້ອນກອງປະຊຸມໃຫຍ່ຜູ້ແທນອົງຄະນະພັກແຂວງວຽງຈັນຄັ້ງທີ VI ທີ່ຈະໄດ້ໄຂຂື້ນໃນຕໍ່ໜ້າຢ່າງເປັນຂະບວນການຟົດຟື້ນ.

ໃນກອງປະຊຸມຄັ້ງນີ້ ບັນດາຜູ້ແທນກອງປະຊຸມຈະໄດ້ພ້ອມກັນສຸມໃສ່ພິຈາລະນາຮັບຮອງເອົາບົດລາຍງານການເມືອງ, ແຜນພັດທະນາເສດຖະກິດ-ສັງຄົມ 5 ປີຜ່ານມາ (2015-2019) ແລະຍັງໄດ້ຮັບຟັງບົດລາຍງານການເມືອງຂອງຄະນະບໍລິຫານງານພັກເມືອງໂພນໂຮງ ສະໄໝທີ VI , ວາງທິດທາງຄາດໝາຍສູ້ຊົນໃນຊຸມປີຕໍ່ໜ້າ (2020-2024), ພ້ອມກັບການປະກອບຄຳຄິດຄຳເຫັນຈາກບັນດາພາກສ່ວນຕ່າງໆພາຍໃນເມືອງແລະບັນດາເມືອງອ້ອມຂ້າງ, ຄອບຄົວຕົວແບບດ້ານຕ່າງໆກອງປະຊຸມຈະໄດ້ພ້ອມກັນດຳເນີນການປ່ອນບັດເລືອກຕັ້ງເອົາຄະນະບໍລິຫານງານພັກເມືອງຊຸດໃໝ່ເພື່ອສືບຕໍ່ນຳພາຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງນີ້ໃຫ້ປະກົດຜົນເປັນຈິງ, ເລືອກເອົາຜູ້ແທນເພຶ່ອເປັນຕົວແທນ ຂອງອົງຄະນະພັກເມືອງ ໄປຮ່ວມກອງປະຊຸມໃຫຍ່ຜູ້ອົງຄະນະພັກແຂວງຄັ້ງທີ VI.

ພິເສດກອງປະຊຸມໃຫຍ່ຄັ້ງນີ້ ຍັງຈະໄດ້ຮັບກຽດຟັງການໂອ້ລົມຈາກ ສະຫາຍ ຄຳພັນ ສິດທິດຳພາ ກຳມະການສູນກາງພັກ, ເລຂາຄະນະບໍລິຫານງານພັກແຂວງ - ເຈົ້າແຂວງວຽງຈັນທີ່ໄດ້ສະແດງຄວາມຍ້ອງຍໍຊົມເຊີຍ ຕໍ່ການຊີ້ນຳໆພາຂອງຄະນະພັກຊຸດເກົ່າ ທີ່ໄດ້ເອົາໃຈໃສ່ຊີ້ນໍາໆພາພະນັກງານ, ສະມາຊິກພັກແລະປະຊາຊົນບັນດາເຜົ່າປະຕິບັດໜ້າທີ່ ການເມືອງຂອງຕົນ ແລະ ຍາດໄດ້ຜົນສຳເລັດໃນຫຼາຍດ້ານ. ພ້ອມກັນນັ້ນທ່ານເຈົ້າແຂວງຍັງໄດ້ສະແດງຄວາມເປັນຫ່ວງເປັນໄຍຕໍ່ດ້ານອ່ອນ, ຂໍ້ຄົງຄ້າງຫລາຍດ້ານແລະໄດ້ຮຽກຮ້ອງໃຫ້ຄະນະພັກເມືອງຊຸດໃໝ່ ຕ້ອງໄດ້ສືບຕໍ່ປັບປຸງແກ້ໄຂບັນດາໜ້າວຽກທີ່ຍັງຄົງຄ້າງໃຫ້ໝົດໄປ. ທ່ານເຈົ້າແຂວງຍັງໄດ້ມີຄວາມເຊື່ອໝັ້ນຕໍ່ຄະນະບໍລິຫານງານພັກຊຸດໃໝ່ທີ່ຈະສືບຕໍ່ຊີ້ນຳ-ນຳພາຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນອົງຄະນະພັກເມືອງໂພນໂຮງໃຫ້ຍາດໄດ້ຜົນງານແລະມີຜົນສຳເລັດຍິ່ງໃຫຍ່ກວ່າເກົ່າ. ກອງປະຊຸມໃຫຍ່ຄັ້ງນີ້ຍັງໄດ້ຮຽກຮ້ອງມາຍັງຜູ້ແທນ, ສະມາຊິກພັກ, ພະນັກງານແລະປະຊາຊົນບັນດາເຜົ່າພາຍໃນເມືອງຈົ່ງເຊີດຊູສະຕິ ແລະ ຍົກສູງຄວາມຮັບຜິດຊອບໜ້າທີ່ການເມືອງຂອງຕົນເຮັດໃຫ້ວຽກງານໃນແຕ່ລະດ້ານມີການຫັນປ່ຽນແປງໃໝ່ທີ່ຕັ້ງໜ້າເຮັດໃຫ້ພັກມີຄວາມປອດໃສ່, ເຂັ້ມແຂງ ແລະໜັກແໜ້ນຢ່າງບໍ່ຢຸດຢັ້ງ. ກອງປະຊຸມຈະໄດ້ດໍາເນີນໄປເປັນເວລາ 2 ວັນຄື : ວັນທີ10-11ມີນາ2020 ຈຶ່ງຈະອັດລົງ.