header

ເມືອງທຸລະຄົມ ເປີດກອງປະຊຸມໃຫຍ່ ຄັ້ງທີ VII ຂອງອົງຄະນະພັກເມືອງ

ກອງປະຊຸມໃຫຍ່ຄັ້ງທີ VII ຂອງອົງຄະນະພັກເມືອງທູລະຄົມແຂວງວຽງຈັນໄດ້ໄຂຂຶ້ນຢ່າງເປັນທາງການ.

ໃນຕອນເຊົ້າວັນທີ24ກຸມພາ 2020 ຜ່ານມານີ້ເມືອງທຸລະຄົມໄດ້ຈັດກອງປະຊຸມໃຫຍ່ຄັ້ງທີVII ຂອງອົງຄະນະພັກເມືອງທຸລະຄົມຢູ່ທີ່ສະໂມສອນຂອງຫ້ອງວ່າການເມືອງດັ່ງກ່າວໂດຍໄດ້ຮັບກຽດຢ່າງສູງແລະເຂົ້າຮ່ວມຂອງສະຫາຍຄໍາພັນສິດທິດຳພາກຳມະການສູນກາງພັກ, ເລຂາຄະນະບໍລິຫານງານພັກແຂວງ - ເຈົ້າແຂວງວຽງຈັນພ້ອມດ້ວຍຜູ້ແທນສົມບູນ 136ສະຫາຍ, ຍິງ34ສະຫາຍເຊີ່ງເປັນຕົວແທນໃຫ້ສະມາຊິກພັກທົ່ວເມືອງ 2,015ສະຫາຍເຂົ້າຮ່ວມ.

ສະຫາຍ ນາງ ວົງເດືອນ ວັດຕະໂສ ວ່າການເລຂາພັກເມືອງ, ວ່າການເຈົ້າເມືອງໆທຸລະຄົມໄດ້ກ່າວໄຂກອງປະຊຸມຢ່າງເປັນທາງການວ່າ: ກອງປະຊຸມໃຫຍ່ຄັ້ງທີVII ຂອງຜູ້ແທນອົງຄະນະພັກເມືອງທຸລະຄົມໄດ້ໄຂຂຶ້ນໃນທ່າມກາງບັນຍາກາດທີ່ທົ່ວກອງທັບທົ່ວປວງຊົນລາວທັງຊາດເວົ້າລວມເວົ້າສະເພາະແມ່ນຊາວເມືອງທຸລະຄົມແຂວງວຽງຈັນຂອງພວກເຮົາພວມແຂ່ງຂັນກັນສ້າງຜົນງານຂ່ຳນັບຮັບຕ້ອນກອງປະຊຸມໃຫຍ່ຄັ້ງທີXI ຂອງພັກ, ກອງປະຊຸມໃຫຍ່ຄັ້ງທີVI ຂອງອົງຄະນະພັກແຂວງວຽງຈັນທີ່ຈະໄຂຂື້ນໃນຕໍ່ໜ້າຢ່າງເປັນຂະບວນການຟົດຟື້ນ.

ໃນກອງປະຊຸມຄັ້ງນີ້ບັນດາຜູ້ແທນກອງປະຊຸມຈະໄດ້ພ້ອມກັນສຸມໃສ່ພິຈາລະນາຮັບຮອງເອົາບົດລາຍງານການເມືອງ, ແຜນພັດທະນາເສດຖະກິດ-ສັງຄົມ 5 ປີຜ່ານມາ (2015-2019) ແລະຍັງໄດ້ຮັບຟັງບົດລາຍງານການເມືອງຂອງຄະນະບໍລິຫານງານພັກເມືອງທຸລະຄົມສະໄໝທີVI , ວາງທິດທາງຄາດໝາຍສູ້ຊົນໃນຊຸມປີຕໍ່ໜ້າ (2020-2024), ພ້ອມກັບການປະກອບຄຳຄິດຄຳເຫັນຈາກບັນດາພາກສ່ວນຕ່າງໆພາຍໃນເມືອງແລະບັນດາເມືອງອ້ອມຂ້າງ, ຄອບຄົວຕົວແບບດ້ານຕ່າງໆກອງປະຊຸມຈະໄດ້ພ້ອມກັນດຳເນີນການປ່ອນບັດເລືອກຕັ້ງເອົາຄະນະບໍລິຫານງານພັກເມືອງຊຸດໃໝ່ເພື່ອສືບຕໍ່ນຳພາຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງນີ້ໃຫ້ປະກົດຜົນເປັນຈິງ, ເລືອກເອົາຜູ້ແທນເພຶ່ອເປັນຕົວແທນຂອງອົງຄະນະພັກເມືອງໄປຮ່ວມກອງປະຊຸມໃຫຍ່ຜູ້ອົງຄະນະພັກແຂວງຄັ້ງທີVI.

ພິເສດກອງປະຊຸມໃຫຍ່ຄັ້ງນີ້ຍັງຈະໄດ້ຮັບກຽດຟັງການໂອ້ລົມຈາກສະຫາຍຄຳພັນສິດທິດຳພາກຳມະການສູນກາງພັກເລຂາຄະນະບໍລິຫານງານພັກແຂວງ - ເຈົ້າແຂວງວຽງຈັນທີ່ໄດ້ສະແດງຄວາມຍ້ອງຍໍຊົມເຊີຍຕໍ່ການຊີ້ນຳໆພາຂອງຄະນະພັກຊຸດເກົ່າທີ່ໄດ້ເອົາໃຈໃສ່ຊີ້ນໍາໆພາພະນັກງານ, ສະມາຊິກພັກແລະປະຊາຊົນບັນດາເຜົ່າປະຕິບັດໜ້າທີ່ການເມືອງຂອງຕົນແລະຍາດໄດ້ຜົນສຳເລັດໃນຫຼາຍດ້ານ. ພ້ອມກັນນັ້ນທ່ານເຈົ້າແຂວງຍັງໄດ້ສະແດງຄວາມເປັນຫ່ວງເປັນໄຍຕໍ່ດ້ານອ່ອນ, ຂໍ້ຄົງຄ້າງຫລາຍດ້ານແລະໄດ້ຮຽກຮ້ອງໃຫ້ຄະນະພັກເມືອງຊຸດໃໝ່ຕ້ອງໄດ້ສືບຕໍ່ປັບປຸງແກ້ໄຂບັນດາໜ້າວຽກທີ່ຍັງຄົງຄ້າງໃຫ້ໝົດໄປ. ທ່ານເຈົ້າແຂວງຍັງໄດ້ມີຄວາມເຊື່ອໝັ້ນຕໍ່ຄະນະບໍລິຫານງານພັກຊຸດໃໝ່ທີ່ຈະສືບຕໍ່ຊີ້ນຳ-ນຳພາຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນອົງຄະນະພັກເມືອງທຸລະຄົມໃຫ້ຍາດໄດ້ຜົນງານແລະມີຜົນສຳເລັດຍິ່ງໃຫຍ່ກວ່າເກົ່າ. ກອງປະຊຸມໃຫຍ່ຄັ້ງນີ້ຍັງໄດ້ຮຽກຮ້ອງມາຍັງຜູ້ແທນ, ສະມາຊິກພັກ, ພະນັກງານແລະປະຊາຊົນບັນດາເຜົ່າພາຍໃນເມືອງຈົ່ງເຊີດຊູສະຕິແລະຍົກສູງຄວາມຮັບຜິດຊອບໜ້າທີ່ການເມືອງຂອງຕົນເຮັດໃຫ້ວຽກງານໃນແຕ່ລະດ້ານມີການຫັນປ່ຽນແປງໃໝ່ທີ່ຕັ້ງໜ້າເຮັດໃຫ້ພັກມີຄວາມປອດໃສ່, ເຂັ້ມແຂງແລະໜັກແໜ້ນຢ່າງບໍ່ຢຸດຢັ້ງ. ກອງປະຊຸມຈະໄດ້ດໍາເນີນໄປເປັນເວລາ 2 ວັນຄື : ວັນທີ24-25ກຸມພາ 2020 ຈຶ່ງຈະອັດລົງ.