header

ເມືອງເຟືອງຈັັດກອງປະຊຸມໃຫຍ່ຄັ້ງທີ VII ຂອງອົງຄະນະພັກເມືອງ

ກອງປະຊຸມໃຫຍ່ຄັ້ງທີ VII ຂອງອົງຄະນະພັກເມືອງເຟືອງ ແຂວງວຽງຈັນ ໄດ້ໄຂຂຶ້ນຢ່າງເປັນທາງການ.

ໃນຕອນເຊົ້າ ວັນທີ 27 ມັງກອນ 2020 ຜ່ານມານີ້ ເມືອງເຟືອງໄດ້ຈັດກອງປະຊຸມໃຫຍ່ຄັ້ງທີ VII ຂອງອົງຄະນະພັກເມືອງເຟືອງ ຢູ່ທີ່ສະໂມສອນຂອງຫ້ອງວ່າການເມືອງດັ່ງກ່າວ ໂດຍໄດ້ຮັບກຽດຢ່າງສູງ ແລະ ເຂົ້າຮ່ວມຂອງສະຫາຍ ຄໍາພັນ ສິດທິດຳພາ ກຳມະການສູນກາງພັກ, ເລຂາຄະນະບໍລິຫານງານພັກແຂວງ - ເຈົ້າແຂວງວຽງຈັນ ພ້ອມດ້ວຍຜູ້ແທນສົມບູນ 132 ສະຫາຍ, ຍິງ 9 ສະຫາຍ ທີ່ຕາງໜ້າໃຫ້ສະມາຊິກພັກທົ່ວເມືອງ 2,065 ສະຫາຍເຂົ້າຮ່ວມ.

ສະຫາຍ ຄຳເພັດ ຈັນສົມພູ ວ່າການເລຂາພັກເມືອງ, ຮັກສາການເຈົ້າເມືອງໆເຟືອງ ໄດ້ກ່າວໄຂກອງປະຊຸມຢ່າງເປັນທາງການວ່າ: ກອງປະຊຸມໃຫຍ່ ຄັ້ງທີ VII ຂອງຜູ້ແທນອົງຄະນະພັກເມືອງເຟືອງໄດ້ໄຂຂຶ້ນໃນທ່າມກາງບັນຍາກາດທີ່ທົ່ວພັກ, ທົ່ວລັດ, ທົ່ວກອງທັບ ແລະ ທົ່ວປວງຊົນລາວທັງຊາດ ພວມອອກແຮງຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີX ຂອງພັກຢ່າງເປັນຂະບວນກວ້າງຂວາງ ເວົ້າລວມ: ເວົ້າສະເພາະກໍແມ່ນແຂວງວຽງຈັນກໍຄືເມືອງເຟືອງ, ໄດ້ສຸ່ມໃສ່ການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ V ຂອງຜູ້ແທນອົງຄະນະພັກແຂວງວຽງຈັນ ຢ່າງມີຄວາມຮັບຜິດຊອບສູງ ແລະ ກໍາລັງອອກແຮງແຂ່ງກັນສ້າງຜົນງານຮັບຕ້ອນກອງປະຊຸມໃຫຍ່ຄັ້ງທີ VI ຂອງຜູ້ແທນອົງຄະນະພັກແຂວງວຽງຈັນທີ່ຈະໄຂຂື້ນໃນຕໍ່ໜ້າໃຫ້ເປັນຂະບວນການຟົດຟື້ນ.

ໃນກອງປະຊຸມຄັ້ງນີ້ ບັນດາຜູ້ແທນກອງປະຊຸມ ຈະໄດ້ພ້ອມກັນສຸມໃສ່ພິຈາລະນາຮັບຮອງເອົາບົດລາຍງານການເມືອງ, ແຜນພັດທະນາເສດຖະກິດ-ສັງຄົມ 5 ປີຜ່ານມາ (2015-2019) ແລະ ຍັງໄດ້ຮັບຟັງບົດລາຍງານການເມືອງຂອງຄະນະບໍລິຫານງານພັກເມືອງເຟືອງສະໄໝທີ VI , ວາງທິດທາງຄາດໝາຍສູ້ຊົນໃນຊຸມປີຕໍ່ໜ້າ (2020-2024) ການປະກອບຄຳຄິດຄຳເຫັນຈາກບັນດາພາກສ່ວນຕ່າງໆພາຍໃນເມືອງ ແລະ ບັນດາເມືອງອ້ອມຂ້າງ, ຄອບຄົວຕົວແບບດ້ານຕ່າງໆ ກອງປະຊຸມຈະໄດ້ພ້ອມກັນດຳເນີນການປ່ອນບັດເລືອກຕັ້ງເອົາຄະນະບໍລິຫານງານພັກເມືອງຊຸດໃໝ່ ເພື່ອສືບຕໍ່ນຳພາຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງນີ້ໃຫ້ປະກົດຜົນເປັນຈິງ, ເລືອກເອົາຜູ້ແທນເພຶ່ອເປັນຕົວແທນຂອງອົງຄະນະພັກເມືອງ ໄປຮ່ວມກອງປະຊຸມໃຫຍ່ຜູ້ອົງຄະນະພັກແຂວງຄັ້ງທີ VI.

ພິເສດກອງປະຊຸມໃຫຍ່ຄັ້ງນີ້ຍັງຈະໄດ້ຮັບກຽດຟັງການໂອ້ລົມຈາກ ສະຫາຍ ຄຳພັນ ສິດທິດຳພາ ກຳມະການສູນກາງພັກ ເລຂາຄະນະບໍລິຫານງານພັກແຂວງ - ເຈົ້າແຂວງວຽງຈັນ ທີ່ໄດ້ສະແດງຄວາມຍ້ອງຍໍຊົມເຊີຍຕໍ່ການຊີ້ນຳໆພາຂອງຄະນະພັກຊຸດເກົ່າ ທີ່ໄດ້ເອົາໃຈໃສ່ຊີ້ນໍາໆພາພະນັກງານ, ສະມາຊິກພັກ ແລະ ປະຊາຊົນບັນດາເຜົ່າປະຕິບັດໜ້າທີ່ການເມືອງ ແລະ ຍາດໄດ້ຜົນສຳເລັດຫຼາຍດ້ານ. ພ້ອມກັນນັ້ນທ່ານເຈົ້າແຂວງຍັງໄດ້ສະແດງຄວາມເປັນຫ່ວງເປັນໄຍຕໍ່ດ້ານອ່ອນ, ຂໍ້ຄົງຄ້າງ ແລະ ໄດ້ໃຫ້ທິດຊີ້ນຳ ຄະນະພັກຊຸດໃໝ່ ສືບຕໍ່ຊີ້ນຳ-ນຳພາຈັດຕັ້ງປະຕິບັດມະຕິກອງປະຊຸມໃຫຍ່ຂອງອົງຄະນະພັກເມືອງເຟືອງ ຄັ້ງທີ VII ໃຫ້ມີຜົນງານທີ່ຍິ່ງໃຫຍ່ກວ່າເກົ່າ. ກອງປະຊຸມໃຫຍ່ຄັ້ງນີ້ ຍັງໄດ້ຮຽກຮ້ອງມາຍັງຄະນະບໍລິຫານງານຊຸດໃໝ່, ສະມາຊິກພັກ, ພະນັກງານ ແລະ ປະຊາຊົນບັນດາເຜົ່າ ຈົ່ງເຊີດຊຸສະຕິ ແລະ ຄວາມຮັບຜິດຊອບການເມືອງ ຂອງຕົນໃຫ້ສູງຂື້ນເລື້ອຍໆ. ເພື່ອເຮັດໃຫ້ເມືອງເຟືອງມີການພັດທະນາດີຂື້ນ, ປະຊາຊົນມີຄວາມຜາສຸກ, ສັງຄົມສີວິໄລ ແລະ ຍຸຕິທຳ. ກອງປະຊຸມ ຈະໄດ້ດໍາເນີນໄປເປັນເວລາ 2 ວັນ ຄື : ວັນທີ 27-28 ມັງກອນ 2020 ຈຶ່ງຈະອັດລົງ.