header

ແຂວງວຽງຈັນ ປາກະຖາວັນສ້າງຕັ້ງ ອົງການໄອຍະການປະຊາຊົນ ຄົບຮອບ 30 ປີ.

ເພື່ອເຮັດໃຫ້ພະນັກງານການນຳ-ພະນັກງານຫລັກແຫຼ່ງຂອງແຂວງວຽງຈັນກຳໄດ້ປະຫວັດຄວາມເປັນມາຂອງວັນສ້າງຕັ້ງອົງການໄອຍະການປະຊາຊົນຄົບຮອບ 30 ປີ (ວັນທີ 9 ມັງກອນ 1990-9ມັງກອນ 2020),ໃນວັນທີ 7 ມັງກອນ 2020 ທີ່ຜ່ານມາຢູ່ທີ່ສະໂມສອນໃຫຍ່ຂອງແຂວງວຽງຈັນ, ໄດ້ມີພິທີປາຖະກະຖາວັນສ້າງຕັ້ງອົງການໄອຍະການປະຊາຊົນຂຶ້ນຢ່າງເປັນທາງການໂດຍການເປັນປະທານແລະ ໃຫ້ກຽດປາຖະກະຖາຂອງ ທ່ານ ຄຳພັນ ສິດທິດຳພາ ກຳມະການສູນກາງພັກ ເລຂາພັກແຂວງ ເຈົ້າແຂວງວຽງຈັນ, ມີບັນດາພະນັກງານການນຳ-ພະນັກງານຫຼັກແຫຼ່ງ ພາຍໃນອົງການໄອຍະການປະຊາຊົນແຂວງ, ສານປະຊາຊົນແຂວງ, ກົມກອງ, ຫ້ອງການ ແລະ ພະແນກກການຕ່າງໆອ້ອມຂ້າງແຂວງເຂົ້າຮ່ວມຮັບຟັງທັງໝົດ 232 ທ່ານ, ຍິງ 57 ທ່ານ.

ໃນພິທີ ທ່ານ ຄຳພັນ ສິດທິດຳພາ ໄດ້ຍົກໃຫ້ເຫັນປະຫວັດການກຳເນີດເກີດຂຶ້ນຂອງອົງການໄອຍະການປະຊາຊົນໄດ້ຮັບການສ້າງຕັ້ງຂຶ້ນ ໃນວັນທີ 9 ມັງກອນ 1990 ມາຮອດປີນີ້ຄົບຮອບ 30 ປີ, ເຊິ່ງກ່ອນໜ້ານີ້ກອງປະຊຸມສະໄໝສາມັນຂອງສະພາປະຊາຊົນສູງສຸດຊຸດທີ II ໄດ້ຮັບຮອງເອົາກົດໝາຍວ່າດ້ວຍອົງການປະຊາຊົນແຫ່ງ ສປປ ລາວ ສະບັບທຳອິດແລະໄດ້ປະກາດໃຊ້ ໂດຍດຳລັດຂອງປະທານປະເທດເລກທີ 05 ລົງວັນທີ 9 ມັງກອນ ປີ 1990 ແລະ ໄດ້ກາຍເປັນວັນສ້າງຕັ້ງອົງການໄອຍະການປະຊາຊົນລາວໃນປັດຈຸບັນເຊິ່ງເປັນອົງການອຳນາດລັດ ມີພາລະບົດບາດກວດກາການປະຕິບັດກົດໝາຍໃຫ້ຖືກຕ້ອງ ແລະ ເປັນເອກະພາບໃນທົ່ວສັງຄົມ.

ຕະຫຼອດໄລຍະ 30 ປີມານີ້ອົງການໄອຍະການປະຊາຊົນໄດ້ມີການເຕີມໃຫຍ່ຂະຫຍາຍຕົວທາງດ້ານປະລິມານ ແລະ ຄຸນນະພາບເຊິ່ງສາມາດເຮັດລ້ອນໜ້າທີ່ພັກມອບໝາຍໃຫ້ ອັນໄດ້ປະກອບສ່ວນ ເຮັດໃຫ້ສັງຄົມມີຄວາມສີວິໄລ, ຍຸຕິທຳ ແລະ ສ້າງລັດໃຫ້ກາຍເປັນລັດແຫ່ງກົດໝາຍເທື່ອລະກ້າວ.