header

ກອງປະຊຸມຄົບຄະນະ ບໍລິຫານງານພັກ ເມືອງໝື່ນ ຄັ້ງທີ 2 ສະໄໝທີ III ຂຶ້ນ

ໃນຕອນເຊົ້າຂອງວັນທີ 9 ມັງກອນ 2020 ຢູ່ທີ່ຫ້ອງປະຊຸມຊັ້ນ 2 ຂອງຫ້ອງວ່າການເມືອງຫມື່ນ ໂດຍໃຫ້ກຽດເຂົ້າຮ່ວມເປັນປະທານຂອງທ່ານ ຄໍາພັນ ສິດທິດໍາພາ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ - ເຈົ້າແຂວງວຽງຈັນ, ໃຫ້ກຽດຕ້ອນຮັບໂດຍທ່ານ ພູວອນ ບຸນວິໄລ ກໍາມະການພັກແຂວງ, ເລຂາພັກເມືອງ, ເຈົ້າເມືອງໆໝື່ນ ພ້ອມດ້ວຍຄະນະບໍລິຫານງານພັກເມືອງໝື່ນ ເຂົ້າຮ່ວມ.

ທ່ານ ພູວອນ ກຳມະການພັກແຂວງ, ເລຂາພັກເມືອງ, ເຈົ້າເມືອງໆໝື່ນ ໄດ້ຂື້ນລາຍງານຕໍ່ ກອງປະຊຸມຄົບຄະນະບໍລິຫານງານພັກເມືອງໝື່ນ ຄັ້ງທີ 2 ສະໄໝທີ III ວ່າ: ເພື່ອຮັບປະກັນໃຫ້ແກ່ການຈັດຕັ້ງປະຕິບັດແນວທາງປ່ຽນແປງໃໝ່ຂອງພັກ ດ້ວຍການສ້າງບາດກ້າວບຸກທະລຸຮອບດ້ານ ໃນການຊີ້ນຳ-ນຳພາຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນອົງຄະນະພັກເມືອງໝື່ນ ຄັ້ງທີ III, ເຮັດໃຫ້ໂຄງການດຳເນີນງານຂອງຄະນະບໍລິຫານງານພັກເມືອງ ມີຈຸດສຸມ ແລະ ສາມາດເສີມຂະຫຍາຍບັນດາທ່າແຮງແລະ ກາລະໂອກາດ ກໍ່ຄືຄວາມອາດສາມາດໃນດ້ານຕ່າງໆ ຂອງການຈັດຕັັ້ງຮາກຖານພັກ ແລະ ຫ້ອງການຂັ້ນເມືອງໄດ້ປະຕິບັດໜ້າທີ່ການເມືອງຂອງແຕ່ລະພາກສ່ວນຢ່າງມີປະສິດທິພາບ, ປະສິດທິຜົນສູງຂື້ນ ແລະ ຍັງມີຈຸດປະສົງເພື່ອແກ້ໄຂສາເຫດຂອງຂໍ້ບົກພ່ອງ ແລະ ຊຸກຍູ້ການພັດທະນາເສດຖະກິດ-ສັງຄົມ ໃຫ້ມີບາດກ້າວຂະຫຍາຍຕົວດີຂື້ນ ເພື່ອສ້າງພື້ນຖານ ແລະ ທ່ວງທ່າໃໝ່ໃຫ້ແກ່ການຫັນເອົາເມືອງໝື່ນ ໃຫ້ກາຍເປັນຫົວໜ່ວຍເຂັ້ມແຂງຮອບດ້ານ ແລະ ບ້ານການເປັນຫົວໜ່ວຍພັດທະນາທີ່ເຂັ້ມແຂງ.

 ໃນກອງປະຊຸມທ່ານເລຈາພັກເມືອງ, ເຈົ້າເມືອງ ຍັງໄດ້ຍົກໃຫ້ເຫັນຄວາມໝາຍຄວາມສຳຄັນຂອງໂຄງການດຳເນີນງານຂອງຄະນະບໍລິຫານງານພັກເມືອງ ຊື່ງປະກອບດ້ວຍແຜນງານ ແລະ ໂຄງການຈຸດສຸມທີ່ໄດ້ກຳນົດໄວ້ໃນໂຄງການ-ການເມືອງ, ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ III ຂອງອົງຄະນະພັກເມືອງ, ມີທັງໝົດ 206 ໂຄງການ, ມີໂຄງການລົງທຶນຂອງລັດ 154 ໂຄງການ, ໂຄງການລົງທຶນຂອງຕ່າງປະເທດ(ODA) 12 ໂຄງການ, ໂຄງການລົງທຶນ ຂອງປະຊາຊົນພາຍໃນ ແລະ ຕ່າງປະເທດ 29 ໂຄງການ, ໂຄງການລົງທຶນຈາກສິນເຊື່ອທະນາຄານ ແລະ ກອງທຶນຕ່າງໆ 11 ໂຄງການ. ການສັ່ງລວມເອົາບັນດາໂຄງການ ກໍຄືກິດຈະກໍາດ້ານຕ່າງໆ ທີ່ມີສ່ວນພົວພັນເຊິ່ງກັນ ແລະ ກັນ ເຂົ້າມາໄວ້ເປັນແຕ່ລະຂົງເຂດ ເພື່ອສະດວກໃນການຊີ້ນຳ-ນຳພາ, ຕິດຕາມ, ກວດກາ ແລະ ປະເມີນຜົນ. ໃນບັ້ນທ້າຍຂອງກອງປະຊຸມຄັ້ງນີ້ ໄດ້ຮັບຟັງການໂອ້ລົມຂອງທ່ານ ຄຳພັນ ສິດທິດຳພາ, ກຳມະການສູນກາງພັກ, ເລຂາພັກແຂວງ, ເຈົ້າແຂວງໆວຽງຈັນ ອີກດ້ວຍ.