header

ເມືອງໂພນໂຮງ ຈັດບຸນປະເພນີ ບຸນກິນຈຽງ (ນໍເປ້ເຈົ່າ) ບ້ານຫຼັກ 52

 

ໃນຕອນເຊົ້າຂອງວັນທີ 30 ທັນວາ 2019 ຜ່ານມານີ້, ເມືອງໂພນໂຮງໄດ້ຈັດພິທີສະຫຼອງງານບຸນກິນຈຽງເຜົ່າມົ້ງຢູ່ກຸ່ມບ້ານນາເລົາ (ຫຼັກ 52) ປະຈຳປີ 2019-2020 ໃຫ້ກຽດເຂົ້າຮ່ວມໂດຍທ່ານ ສາສະດາຈານ ປອ ຈະເລີນ ເຢ່ຍປາວເຮີ ລັດຖະມົນຕີປະຈຳສຳນັກງານນາຍົກ, ໂຄສົກລັດຖະບານ, ທ່ານ ຄຳພັນ ສິດທິດຳພາ ກຳມະການສູນກາງພັກ ເລຂາພັກແຂວງ ເຈົ້າແຂວງໆວຽງຈັນ, ທ່ານ ນາງ ອິ່ນຄຳ ພັນດາລາ ກຳມະການພັກແຂວງ ເລຂາພັກເມືອງ ເຈົ້າເມືອງໆໂພນໂຮງ ແລະ ມີບັນດານາຍບ້ານ ຕາງໜ້າບ້ານ 11 ໝູ່ບ້ານ, ມີຕາງໜ້າແນວລາວສ້າງຊາດ, ອົງການຈັດຕັ້ງມະຫາຊົນເມືອງ, ກຸ່ມບ້ານ,ອົງການປົກຄອງບ້ານ, ເຈົ້າກົກເຈົ້າເຫຼົ່າ, ຜູ້ຊົງຄຸນວຸດທິ, ນັກທຸລະກິດ, ຜູ້ປະກອບການ, ທະນາຄານ ແລະ ປະຊາຊົນບັນດາເມືອງ, ກຸ່ມບ້ານອ້ອມຂ້າງເຂົ້າຮ່ວມ.

ປະເພນີບຸນກິນຈຽງປະຈຳປີ 2019 ຂອງພີ່ນ້ອງເຜົ້າມົ້ງເວົ້າລວມ ເວົ້າສະເພາະຫຼັກ 52 ຄັ້ງນີ້ແມ່ນມີຄວາມສຳຄັນເປັນຢ່າງຍິ່ງ, ຊື່ງຕິດພັນກັບການອານຸລັກຮັກສາຮີດຄອງປະເພນີອັນດີງາມຂອງຊາດ, ຂອງເຜົ່າ, ທັ້ງເປັນການສົ່ງເສີມການທ່ອງທ່ຽວທາງດ້ານວັດທະນາທຳ, ເພື່ອເປັນການດືງດູດເອົານັກທ່ອງທ່ຽວພາຍໃນ ແລະ ຕ່າງປະເທດເຂົ້າມາທ່ຽວເມືອງໂພນໂຮງ ກໍ່ຄືບຸນກິນຈຽງຂອງຊົນເຜົ່າມົ້ງຫຼັກ 52 ຫຼາຍຂື້ນ.

ທ່ານ ຈັນເພັງ ຊົ່ງ ກຳມະການແນວລາວສ້າງຊາດເມືອງ ຕາງໜ້າໃຫ້ແກ່ຄະນະຮັບຜິດຊອບຈັດງານ, ຕາງໜ້າຊິງຊາວ ກໍ່ໄດ້ເລົ່າເຖິງປະຫວັດຄວາມເປັນມາຂອງງານບຸນກິນຈຽງ (ນໍເປ້ເຈົ່າ) ຂອງຊາວເຜົ່າມົ້ງ ແມ່ນມິີມາແຕ່ດຶກດຳບັນ ແມ່ນຮີດຄອງປະເພນີອັນດີງາມຂອງເຜົ່າມົ້ງທີ່ໄດ້ຈັດງານສະເຫຼີມ-ສະຫຼອງໃນແຕ່ລະປີ ຕາມການເຊື່ອຖືຂອງສາສະໜາ ຂອງຊາວເຜົ່າມົ້ງ. ພ້ອມກັນນັ້ນຍັງໄດ້ຮັບຟັງການໂອ້ລົມຂອງທ່ານ ຄຳພັນ ສິດທິດາພາ ກຳມະການສູນກາງພັກ ເລຂາພັກແຂວງ ເຈົ້າແຂວງໆວຽງຈັນ ເຊິ່ງທ່ານໄດ້ຍົກໃຫ້ເຫັນຄວາມໝາຍ, ຄວາມສຳຄັນ ຂອງງານບຸນກິນຈຽງເຜົ່າມົ້ງ ອັນຕົ້ນຕໍແມ່ນອິງໃສ່ການຮັກສາຮີດຄອງປະເພນີອັນດີງາມຂອງຊາດ-ຂອງເຜົ່າ ຮັກສາຄວາມສາມັກຄິອັນເປັນປຶກແຜ່ນຂອງບັນດາເຜົ່າ ເຮັດໃຫ້ການຫຼີ້ນບູນກິນຈຽງໃນປີນີ້ເຕັມໄປດ້ວຍບັນຍາກາດອັນຟົດຟື້ນ ມ່ວນຊື່ນ ມີຄວາມເປັນລະບຽບຮຽບຮ້ອຍ ແລະ ຮັກສາໄດ້ຄວາມສະຫງົບປອດໄພທຸກປະການ. ງານບຸນກິນຈຽງແມ່ນເລີ່ມຕັ້ງແຕ່ ວັນທີ 30 ທັນວາ 2019 ຫາ ວັນທີ 5 ມັງກອນ 2020.