header

ກອງປະຊຸມໃຫຍ່ຄັ້ງທີ VII ຂອງອົງຄະນະພັກເມືອງຊະນະຄາມ

ກອງປະຊຸມໃຫຍ່ຄັ້ງທີ VII ຂອງອົງຄະນະພັກເມືອງຊະນະຄາມ ແຂວງວຽງຈັນ ໄດ້ໄຂຂຶ້ນຢ່າງເປັນທາງການ.

ໃນຕອນເຊົ້າ ວັນທີ 26 ທັນວາ 2019 ຜ່ານມານີ້ ເມືອງຊະນະຄາມໄດ້ຈັດກອງປະຊຸມໃຫຍ່ຄັ້ງທີ VII ຂອງອົງຄະນະພັກເມືອງຊະນະຄາມ ຢູ່ທີ່ສະໂມສອນຂອງຫ້ອງວ່າການເມືອງດັ່ງກ່າວ ໂດຍໄດ້ຮັບກຽດຢ່າງສູງ ແລະ ເຂົ້າຮ່ວມຂອງສະຫາຍ ຄໍາພັນ ສິດທິດຳພາ ກຳມະການສູນກາງພັກ, ເລຂາຄະນະບໍລິຫານງານພັກແຂວງ - ເຈົ້າແຂວງວຽງຈັນ ພ້ອມດ້ວຍຜູ້ແທນສົມບູນ 122 ສະຫາຍ, ຍິງ 16 ສະຫາຍ ທີ່ຕາງໜ້າໃຫ້ສະມາຊິກພັກທົ່ວເມືອງ 1.258 ສະຫາຍເຂົ້າຮ່ວມ.

ສະຫາຍ ສະໝານ ວິເສດຍະພົງສ໌ ກຳມະການພັກແຂວງ ເລຂາພັກເມືອງ - ເຈົ້າເມືອງໆ ຊະນະຄາມ ໄດ້ກ່າວໄຂກອງປະຊຸມຢ່າງເປັນທາງການວ່າ: ກອງປະຊຸມໃຫຍ່ຜູ້ແທນອົງຄະນະພັກເມືອງຊະນະຄາມຄັ້ງທີ VII ໄດ້ໄຂຂຶ້ນໃນທ່າມກາງບັນຍາກາດທີ່ທົ່ວພັກ, ທົ່ວລັດ ແລະ ທົ່ວປວງຊົນ ໃນທົ່ວເມືອງຊະນະຄາມມີຄວາມເບີກບານມ່ວນຊື່ນ, ຕັ້ງໜ້າອອກແຮງແຂ່ງຂັນກັນປະຕິບັດແນວທາງປ່ຽນແປງໃໝ່ຢ່າງຮອບດ້ານຂອງພັກ ແລະ ສ້າງຜົນງານຢ່າງເປັນຂະບວນຟົດຟື້ນ ເພື່ອຂ່ຳນັບຮັບຕ້ອນກອງປະຊຸມໃຫຍ່ຜູ້ແທນອົງຄະນະພັກເມືອງຊະນະຄາມ ຄັ້ງທີ VII ກອງປະຊຸມໃຫຍ່ຜູ້ແທນຂອງອົງຄະນະພັກແຂວງວຽງຈັນ ຄັ້ງທີ VI ແລະ ກອງປະຊຸມໃຫຍ່ ຄັ້ງທີ XI ຂອງພັກປະຊາຊົນປະຕິວັດລາວ.

ໃນກອງປະຊຸມຄັ້ງນີ້ ບັນດາຜູ້ແທນກອງປະຊຸມ ຈະໄດ້ພ້ອມກັນສຸມໃສ່ພິຈາລະນາຮັບຮອງເອົາບົດລາຍງານການເມືອງ, ແຜນພັດທະນາເສດຖະກິດ-ສັງຄົມ 5 ປີຜ່ານມາ (2015-2019) ແລະ ຍັງໄດ້ຮັບຟັງບົດລາຍງານການເມືອງຂອງຄະນະບໍລິຫານງານພັກເມືອງຊະນະຄາມສະໄໝທີ VI , ວາງທິດທາງຄາດໝາຍສູ້ຊົນໃນຊຸມປີຕໍ່ໜ້າ (2020-2024) ການປະກອບຄຳຄິດຄຳເຫັນຈາກບັນດາພາກສ່ວນຕ່າງໆພາຍໃນເມືອງ ແລະ ບັນດາເມືອງອ້ອມຂ້າງ, ຄອບຄົວຕົວແບບດ້ານຕ່າງໆ ກອງປະຊຸມຈະໄດ້ພ້ອມກັນດຳເນີນການປ່ອນບັດເລືອກຕັ້ງເອົາຄະນະບໍລິຫານງານພັກເມືອງຊຸດໃໝ່ ເພື່ອສືບຕໍ່ນຳພາຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງນີ້ໃຫ້ປະກົດຜົນເປັນຈິງ, ເລືອກເອົາຜູ້ແທນເພຶ່ອເປັນຕົວແທນຂອງອົງຄະນະພັກເມືອງ ໄປຮ່ວມກອງປະຊຸມໃຫຍ່ຜູ້ອົງຄະນະພັກແຂວງຄັ້ງທີ VI.

ພິເສດກອງປະຊຸມໃຫຍ່ຄັ້ງນີ້ຍັງຈະໄດ້ຮັບກຽດຟັງການໂອ້ລົມຈາກ ສະຫາຍ ຄຳພັນ ສິດທິດຳພາ ກຳມະການສູນກາງພັກ ເລຂາຄະນະບໍລິຫານງານພັກແຂວງ - ເຈົ້າແຂວງວຽງຈັນ ທີ່ໄດ້ສະແດງຄວາມຍ້ອງຍໍຊົມເຊີຍຕໍ່ການຊີ້ນຳໆພາຂອງຄະນະບໍລິຫານງານພັກເມືອງຊະນະຄາມຊຸດທີ VI ທີ່ໄດ້ເອົາໃຈໃສ່ຊີ້ນໍາໆພາສະມາຊິກພັກ, ພະນັກງານ ແລະ ປະຊາຊົນບັນດາເຜົ່າປະຕິບັດແນວທາງປ່ຽນແປງໃໝ່ຮອບດ້ານຢ່າງມີຫຼັກການຂອງພັກ ແລະ ມີຜົນສຳເລັດຫຼາຍດ້ານ. ພ້ອມກັນນັ້ນທ່ານເຈົ້າແຂວງຍັງໄດ້ສະແດງຄວາມເປັນຫ່ວງເປັນໄຍຕໍ່ວຽກງານທຸກດ້ານທີ່ຈະປະຕິບັດໃນຊຸມປີຕໍ່ໜ້າ ແລະ ກໍ່ມີຄວາມເຊື່ອໝັ້ນຕໍ່ຄະນະບໍລິຫານງານພັກຊຸດໃໝ່ທີ່ຈະສືບຕໍ່ຊີ້ນຳໆພາຈັດຕັ້ງປະຕິບັດມະຕິກອງປະຊຸມໃຫຍ່ຂອງອົງຄະນະພັກເມືອງຊະນະຄາມ ສະໄໝ ທີ VII ໃຫ້ມີຜົນງານພົ້ນເດັ່ນກວ່າເກົ່າ. ກອງປະຊຸມໃຫຍ່ຄັ້ງນີ້ ຈະໄດ້ດໍາເນີນໄປເປັນເວລາ 2 ວັນ ຄື : ວັນທີ 26-27 ທັນວາ 2019 ຈຶ່ງຈະອັດລົງ.