header

ແຂວງວຽງຈັນ ສະເຫຼີມສະຫຼອງ ວັນສາກົນ ຢຸດຕິໃຊ້ຄວາມຮຸນແຮງຕໍ່ແມ່ຍິງ

ແຂວງວຽງຈັນ ສະເຫຼີມສະຫຼອງ ວັນສາກົນ ຢຸດຕິໃຊ້ຄວາມຮຸນແຮງຕໍ່ແມ່ຍິງ 25 ພະຈິກ 2019.

ໃນຕອນເຊົ້າຂອງວັນທີ 10 ທັນວາ 2019 ຜ່ານມາຢູ່ທີ່ສະໂມສອນໃຫຍ່ຂອງແຂວງໄດ້ຈັດ ພິທີສະເຫລີີມສະຫລອງວັນສາກົນ ຢຸດຕິໃຊ້ຄວາມຮຸນແຮງຕໍ່ແມ່ຍິງ 25 ພະຈິກ 2019 ຂຶ້ນ ໂດຍການເປັນກຽດເຂົ້າຮ່ວມ ແລະ ປາຖະກາຖາວັນສຳຄັນດັ່ງກ່າວ ຂອງ ທ່ານ ຄຳພັນ ສິດທິດຳພາ ເຈົ້າແຂວງໆວຽງຈັນ, ມີ ທ່ານ ນາງ ຈັນທະບູນ ໂພສະລາດ ປະທານສະຫະພັນ ແມ່ຍິງແຂວງ, ມີບັນດາ ຄະນະກຳມະການ ຕ້ານແລະ ສະກັດກັ້ນການໃຊ້ຄວາມຮຸນແຮງຕໍ່ແມ່ຍິງ ແລະ ເດັກນ້ອຍ ຂັ້ນແຂວງ, ມີບັນດາພະນັກງານຫລັກແຫລ່ງ ຈາກອົງການ,ກົມກອງ,ພະແນກການທົ່ວແຂວງວຽງຈັນ ເຂົ້າຮ່ວມ.

ທ່ານ ຄຳພັນ ສິດທິດຳພາ ເຈົ້າແຂວງໆວຽງຈັນ ກ່າວວ່າ: ພິທີສະເຫຼີມສະຫຼອງ ວັນສາກົນ ຢຸດຕິໃຊ້ຄວາມຮຸນແຮງ ຕໍ່ແມ່ຍິງ 25 ພະຈິກ 2019 ຄັ້ງນີ້ ແມ່ນທົ່ວພັກ, ທົ່ວລັດ, ທົ່ວກອງທັບ, ທົ່ວປວງຊົນລາວບັນດາເຜົ່າ ກຳລັງຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ X ຂອງສູນກາງພັກແລະແຜນພັດທະນາເສດຖະກິດສັງຄົມແຫ່ງລັດ ເວົ້າລວມ, ເວົ້າສະເພາະ ແຂວງວຽງຈັນ ກຳລັງອອກແຮງແຂ່ງຂັນ ສ້າງຜົນງານ,ສ້າງຂະບວນການຕ້ອນຮັບກອງປະຊຸມໃຫ່ຍ 3 ຂັ້ນ ຢ່າງເປັນຂະບວນຟົດຟື້ນ,ທັງເປັນການສ້າງຂະບວນການຕ້ອນຮັບວັນຊາດທີ 2 ທັນວາຄົບຮອບ 44ປີ, ວັນຄ້າຍວັນເກີດຂອງປະທານໄກສອນ ພົມວິຫານ ຄົບຮອບ 99 ປີ ແລະ ວັນສຳຄັນຕ່າງ ຂອງຊາດຂອງພັກ ພ້ອມກັນນັ້ນພິທີດັ່ງກ່າວນີ້ ໄດ້ໄຂ ຂຶ້ນ ໃນທ່າມກາງ ບັນດາປະຊາຊາດໃນທົ່ວໂລກ ພ້ອມກັນ ຈັດພິທີສະເຫຼີມສະຫຼອງ ວັນສາກົນ ຢຸດຕິຄວາມຮຸນແຮງຕໍ່ແມ່ຍິງ ຢ່າງເປັນຂະບວນພົ້ນເດັ່ນ. ຊຶ່ງເປັນວັນໜຶ່ງທີ່ມີຄວາມໝາຍສຳຄັນສຳລັບບັນດາປະຊາຊາດໃນທົ່ວໂລກ ໂດຍໄດ້ເລີ່ມມີການ ສະເຫຼີມສະຫຼອງນັບແຕ່ປີ 1991 ເປັນຕົ້ນມາ ເພື່ອປູກຈິດສຳນຶກ, ສົ່ງເສີມການຕ້ານ, ສະກັດກັ້ນ ແລະ ລຶບລ້າງການໃຊ້ຄວາມຮຸນແຮງທຸກຮູບແບບຕໍ່ແມ່ຍິງ ແລະ ເດັກຍິງ ທັງຍັງເປັນວັນລະນຶກເຖິງຂະບວນການເຄື່ອນໄຫວຕໍ່ສູ້ເພື່ອເຮັດໃຫ້ສິດທິອັນເປັນພື້ນຖານ ກໍຄືກຽດສັກສີ ຂອງແມ່ຍິງ ແລະ ເດັກຍິງໃນທົ່ວໂລກ ໄດ້ຮັບການປົກປ້ອງ.ໃນປີ 2019 ແມ່ນໄດ້ເລີ່ມແຕ່ວັນທີ 25 ພະຈິກ ຫາ 10 ທັນວາ ພາຍໃຕ້ຫົວຂໍ້ ຄວາມສະເຫມີພາບຍຸກໃໜ່ ໂດຍບໍ່ປະໃຜໄວ້ທາງຫລັງ ແລະ ຢຸດຕິການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ. ເປັນຫົວຂໍ້ ທີ່ມີຄວາມຫມາຍເລິກເຊິ່ງ ທີ່ສື່ສານເຖິງຄວາມຕ້ອງການຂອງແມ່ຍິງ ແລະ ເດັກຍິງ ທີ່ເປັນຜູ້ຖືກເຄາະຮ້າຍຈາກຄວາມຮຸນແຮງຢູ່ໃນຄອບຄົວ ກໍຄື ໃນສັງຄົມ, ສປປ ລາວ ໄດ້ໃຫ້ຄວາມສໍາຄັນ ແລະ ເອົາໃຈໃສ່ຢ່າງຕັ້ງໜ້າໃນການຈັດຕັ້ງປະຕິບັດແຜນງານເພື່ອການຫຼຸດຜ່ອນ ແລະ ລຶບລ້າງການນຳໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ, ໃນຊຸມປີຜ່ານມາ,ສປປ ລາວໄດ້ເຂົ້າຮ່ວມເຄື່ອນໄຫວ ທັງໃນເວທີພາກພື້ນ ແລະ ສາກົນຢ່າງຕັ້ງໜ້າ ສະແດງອອກໃນການເຂົ້າຮ່ວມເປັນພາຄີ ໃນສົນທິສັນຍາພື້ນຖານດ້ານສິດທິມະນຸດຂອງ ອົງການສະຫະປະຊາຊາດ ຈຳນວນຫຼາຍສະບັບ, ໃນນັ້ນລວມມີ ສົນທິສັນຍາວ່າດ້ວຍການລຶບລ້າງທຸກຮູບການຈຳແນກຕໍ່ແມ່ຍິງ(CEDAW), ສົນທິສັນຍາວ່າດ້ວຍສິດທິເດັກ (CRC) ແລະອະນຸສັນຍາເພີ້ມເຕີມ 02 ສະບັບຂອງ ສົນທິສັນຍາວ່າດ້ວຍສິດທິເດັກທີ່ພົວພັນກັບການຄ້າຂາຍເດັກ, ໂສເພນີເດັກ ແລະ ຮູບພາບລາມົກອານາຈານເດັກ ແລະ ການເອົາເດັກເຂົ້າຮ່ວມໃນການປະທະກັນດ້ານອາວຸດ ພ້ອມທັງ ຮັບຮອງເອົາຖະແຫຼງການ ອາຊຽນ ວ່າດ້ວຍ ການລຶບລ້າງຄວາມຮຸນແຮງຕໍ່ແມ່ຍິງ ແລະ ເດັກ.

ມາຮອດປະຈຸບັນນີ້, ສາມາດຕີລາຄາໄດ້ວ່າ ສປປ ລາວ ໄດ້ປະສົບຜົນສຳເລັດໂດຍພື້ນຖານ ໃນການປະຕິບັດພັນທະຂອງຕົນຮ່ວມກັບວົງຄະນະຍາດສາກົນ ແລະ ໄດ້ນຳເອົາເນື້ອໃນຈິດໃຈຂອງສົນທິສັນຍາສາກົນທີ່ ສປປ ລາວເປັນພາຄີ ມາຈັດຕັ້ງຜັນຂະຫຍາຍເຂົ້າໃນລັດຖະທຳມະນູນ, ກົດໝາຍ ແລະ ນະໂຍບາຍຂອງລັດຖະບານ ເພື່ອສ້າງແຜນຍຸດທະສາດ, ແຜນປະຕິບັດງານ ແລະ ໂຄງການທີ່ມີຈຸດປະສົງສົ່ງເສີມຄວາມກ້າວໜ້າແມ່ຍິງ, ຄວາມສະເໝີພາບຍິງ-ຊາຍ ແລະ ການລຶບລ້າງການນຳໃຊ້ຄວາມີຮຸນແຮງຕໍ່ແມ່ຍິງ ແລະ ເດັກຍິງ, ໂດຍໄດ້ເອົາໃຈໃສ່ໂຄສະນາເຜີຍແຜ່ປູກຈິດສຳນຶກ ແລະ ຍົກລະດັບຄວາມຮູ້ຄວາມເຂົ້າໃຈໃນວຽກງານດັ່ງກ່າວ ໃຫ້ແກ່ພະນັກງານ ແລະ ປະຊາຊົນໃນຂອບເຂດທົ່ວປະເທດ. ນອກນັ້ນ, ໃນປີ 2018 ນີ້, ສປປ ລາວ ໄດ້ນຳສະເໜີບົດລາຍງານແຫ່ງຊາດ ປະຈຳໄລຍະ 8-9 ພາຍໃຕ້ ສົນທິສັນຍາວ່າດ້ວຍການລຶບລ້າງທຸກຮູບການຈຳແນກຕໍ່ແມ່ຍິງ (CEDAW) ແລະສົນທິສັນຍາສິດທິເດັກ (CRC)ໄລຍະ 3-6 ຢູ່ຫ້ອງການອົງການ ສປຊ ທີ່ເຊີແນວປະສົບຜົນສຳເລັດເປັນຢ່າງສູງ.