header

ກອງປະຊຸມໃຫຍ່ຄັ້ງທີ IV ຂອງອົງຄະນະພັກເມືອງແມດ

ກອງປະຊຸມໃຫຍ່ຄັ້ງທີ IV ຂອງອົງຄະນະພັກເມືອງແມດ ແຂວງວຽງຈັນ ໄດ້ໄຂຂຶ້ນຢ່າງເປັນທາງການ.

ໃນຕອນເຊົ້າ ວັນທີ 28 ພະຈິກ 2019 ຜ່ານມານີ້ ເມືອງແມດໄດ້ຈັດກອງປະຊຸມໃຫຍ່ຄັ້ງທີ IV ຂອງອົງຄະນະພັກເມືອງແມດ ຢູ່ທີ່ຫ້ອງວ່າການເມືອງດັ່ງກ່າວ ໂດຍໄດ້ຮັບກຽດຢ່າງສູງ ແລະ ເຂົ້າຮ່ວມຂອງສະຫາຍ ຄໍາພັນ ສິດທິດຳພາ ກຳມະການສູນກາງພັກ, ເລຂາຄະນະບໍລິຫານງານພັກແຂວງ - ເຈົ້າແຂວງວຽງຈັນ ພ້ອມດ້ວຍຜູ້ແທນສົມບູນ 101 ສະຫາຍ, ຍິງ 5 ສະຫາຍ ທີ່ຕາງໜ້າໃຫ້ສະມາຊິກພັກທົ່ວເມືອງ 1229 ສະຫາຍເຂົ້າຮ່ວມ.

ສະຫາຍ ລຳໄມ ກູດລາວົງ ກຳມະການພັກແຂວງ ເລຂາພັກເມືອງ - ເຈົ້າເມືອງໆ ແມດ ໄດ້ກ່າວໄຂກອງປະຊຸມຢ່າງເປັນທາງວ່າ: ກອງປະຊຸມໃຫຍ່ຜູ້ແທນອົງຄະນະພັກເມືອງແມດຄັ້ງທີ IV ໄດ້ໄຂຂຶ້ນໃນທ່າມກາງບັນຍາກາດທີ່ທັ່ວພັກ, ທົ່ວກອງທັບ, ທົ່ວປວງລາວທັງຊາດ ກໍ່ຄືທົ່ວແຂວງວຽງຈັນເວົ້າລວມ, ເວົ້າສະເພາະຢູ່ເມືອງແມດ ພວມແຂງຂັນກັນຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ່ X ຂອງພັກ, ມະຕິກອງປະຊຸມໃຫຍ່ຜູ້ແທນອົງຄະນະພັກແຂວງຄັ້ງທີ V, ກໍ່ຄືການສ້າງຂະບວນການຂຳນັບຮັບຕ້ອນກອງປະຊຸມໃຫຍ່ຜູ້ແທນສະໄໝທິ IV ຂອງອົງຄະນະພັກເມືອງແມດຢ່າງເປັນຂະບວນຟົດຟື້ນ.

ໃນກອງປະຊຸມຄັ້ງນີ້ ບັນດາຜູ້ແທນກອງປະຊຸມ ຈະໄດ້ພ້ອມກັນສຸມໃສ່ພິຈາລະນາຮັບຮອງເອົາບົດລາຍງານການເມືອງ, ແຜນພັດທະນາເສດຖະກິດ-ສັງຄົມ 5 ປີຜ່ານມາ (2015-2019) ແລະ ຍັງໄດ້ຮັບຟັງບົດລາຍງານການເມືອງຂອງຄະນະບໍລິຫານງານພັກເມືອງແມດສະໄໝທີ III , ວາງທິດທາງຄາດໝາຍສູ້ຊົນໃນຊຸມປີຕໍ່ໜ້າ (2020-2024) ການປະກອບຄຳຄິດຄຳເຫັນຈາກບັນດາພາກສ່ວນຕ່າງໆພາຍໃນເມືອງ ແລະ ບັນດາເມືອງອ້ອມຂ້າງ, ກອງປະຊຸມຈະໄດ້ພ້ອມກັນດຳເນີນການປ່ອນບັດເລືອກຕັ້ງເອົາຄະນະບໍລິຫານງານພັກເມືອງຊຸດໃໝ່ ເພື່ອສືບຕໍ່ນຳພາຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງນີ້ໃຫ້ປະກົດຜົນເປັນຈິງ, ເລືອກເອົາຜູ້ແທນເພຶ່ອເປັນຕົວແທນຂອງອົງຄະນະພັກເມືອງ ໄປຮ່ວມກອງປະຊຸມໃຫຍ່ຜູ້ອົງຄະນະພັກແຂວງຄັ້ງທີ VI.

ພິເສດກອງປະຊຸມໃຫຍ່ຄັ້ງນີ້ຍັງຈະໄດ້ຮັບກຽດຟັງການໂອ້ລົມຈາກ ສະຫາຍ ຄຳພັນ ສິດທິດຳພາ ກຳມະການສູນກາງພັກ ເລຂາຄະນະບໍລິຫານງານພັກແຂວງ - ເຈົ້າແຂວງວຽງຈັນ ເຊິ່ງຈະເປັນທິດຊີ້ນໍາທາງດ້ານແນວຄິດ-ທິດສະດີ, ພຶດຕິກຳຕົວຈິງໃຫ້ແກ່ຄະນະບໍລິຫານງານພັກເມືອງຊຸດໃໝ່ ແລະ ຜູ້ແທນກອງປະຊຸມໃນການປະຕິບັດໜ້າທີ່ວຽກງານໃນແຕ່ລະດ້ານ ແລະ ມີຄວາມເຊື່ອໝັ້ນຕໍ່ຄະນະພັກຊຸດໃໝ່ທີ່ຈະສືບຕໍ່ຊີ້ນໍາ-ນໍາພາຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງນີ້ໃຫ້ປະກົດຜົນເປັນຈິງ. ກອງປະຊຸມໃຫຍ່ຄັ້ງນີ້ ຈະໄດ້ດຳເນີນໄປເປັນເວລາ 2 ວັນ ຄື : ວັນທີ 28-29 ພະຈິກ 2019 ຈຶ່ງຈະອັດລົງ.