header

ພະນະທ່ານ ບຸນຍັງ ວໍລະຈິດ ປະທານປະເທດແຫ່ງ ສປປລາວ ລົງຢ້ຽມຢາມ ແລະ ເຮັດວຽກຢູ່ແຂວງວຽງຈັນ

ໃນວັນທີ່ 20 ພະຈິກ 2019 ທີ່ຜ່ານມານີ້ແຂວງວຽງຈັນໄດ້ຕ້ອນຮັບ ພະນະ ທ່ານ ບຸນຍັງ ວໍລະຈິດ ເລຂາທິການໃຫຍ່ ແລະ ປະທານປະເທດແຫ່ງ ສປປ ລາວ ພ້ອມດ້ວຍຄະນະທີ່ໄດ້ລົງ ຢ້ຽມຢາມ ແລະ ເຮັດວຽກຢູ່ແຂວງວຽງຈັນ ເປັນກຽດຕ້ອນຮັບຂອງ ທ່ານ ຄຳພັນ ສິດທິດຳພາ ກຳມະການສູນກາງພັກ, ເລຂາພັກແຂວງ, ເຈົ້າແຂວງວຽງຈັນ ພ້ອມດ້ວຍຄະນະ ແລະ ພະນັກງານຫຼັກແຫຼ່ງອ້ອມຂ້າງແຂວງວຽງຈັນຢູ່ທີ່ ສະໂມສອນໃຫຍ່ຂອງແຂວງ.

ໂອກາດນີ້ ທ່ານ ຄຳພັນ ສິດທິດຳພາ ກຳມະການສູນກາງພັກ, ເລຂາພັກແຂວງ, ເຈົ້າແຂວງວຽງຈັນ ໄດ້ຂື້ນລາຍງານຫຍໍ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງໃນໄລຍະ 9 ເດືອນຜ່ານມາ ແລະ ໃນປີ 2019 ແຂວງວຽງຈັນມີຄວາມຕ້ອງການທຶນເພື່ອການພັດທະນາທັງໝົດ 2,648.27 ຕື້ກີບ ກວມເອົາ 34.22% ຂອງ GDP, ໃນ 9 ເດືອນປະຕິບັດໄດ້ 2,616.26 ຕື້ກີບ ເທົ່າກັບ 98.79% ຂອງແຜນການ, ກວມເອົາ 33.80% ຂອງ GDP. ໃນນີ້ ແຜນການລົງທຶນຂອງລັດຕາມແຜນປົກກະຕິມູນຄ່າ 65.63 ຕື້ກີບ, ປະຕິບັດໄດ້ 62.20ຕື້ກີບ, ເທົ່າກັບ 94.78% ຂອງແຜນການ.

ພ້ອມນີ້ ຍັງໄດ້ລາຍງານວຽກງານການກະກຽມ ດຳເນີນກອງປະຊຸມໃຫຍ່ 3 ຂັ້ນ ຂອງແຂວງວຽງຈັນ, ແຂວງວຽງຈັນ ໄດ້ອອກຄຳສັ່ງ ແນະນຳສະບັບເລກທີ 013/ຄປພ.ວຈ, ລົງວັນທີ 14 ພະຈິກ 2018 ວ່າດ້ວຍການກະກຽມ ແລະ ດຳເນີນກອງປະຊຸມໃຫຍ່ອົງຄະນະພັກເມືອງ, ຄະນະພັກຮາກຖານ ແລະ ໜ່ວຍພັກໃນທົ່ວແຂວງວຽງຈັນ ແລະ ແຕ່ງຕັ້ງຄະນະຮັບຜິດຊອບກະກຽມກອງປະຊຸມໃຫຍ່ 3 ຂັ້ນຂື້ນ, ມາຮອດປັດຈຸບັນໄດ້ເປີດກອງປະຊຸມໃຫຍ່ອົງຄະນະພັກເມືອງໄດ້ 1 ເມືອງ ຄື: ເມືອງໝື່ນ ແລະ 1 ຄະນະພັກກອງບັນຊາການທະຫານແຂວງ. ປັດຈຸບັນ ໄດ້ພ້ອມກັນສະຫຼຸບຖອດຖອນບົດຮຽນໃນຄັ້ງວັນທີ 18 ພະຈິກ 2016 ເພື່ອກະກຽມຄວາມພ້ອມໃຫ້ແກ່ການເປີດກອງປະຊຸມໃຫຍ່ອົງຄະນະພັກເມືອງ, ຮາກຖຸານພັກ ແລະ ໜ່ວຍພັກໃຫ້ສຳເລັດໃນທ້າຍເດືອນມີນາ ປີ 2020.

ສຳລັບຂັ້ນແຂວງໄດ້ກະກຽມຮ່າງລາຍງານການເມືອງ ແລະ ແຜນພັດທະນາເສດຖະກິດ-ສັງຄົມ ແລະ ເອກະສານປິ່ນອ້ອມຈຳນວນໜຶ່ງສຳເລັດໂດຍພື້ນຖານ ແລະ ຍັງສືບຕໍ່ປັບປຸງເພື່ອນຳລົງໄປ ທາບທາມຢູ່ທ້ອງຖິ່ນ ແລະ ຮາກຖານ. ຕອນທ້າຍຂອງການມາຢ້ຽມຢາມຄັ້ງນີ້ຍັງໄດ້ຮັບຟັງການໂອ້ລົມຂອງ ພະນະ ທ່ານ ບຸນຍັງ ວໍລະຈິດ ເລຂາທິການໃຫຍ່ ປະທານປະເທດແຫ່ງ ສປປ ລາວ ເຊິ່ງທ່ານໄດ້ກ່າວຍ້ອງຍໍຊົມເຊີຍຕໍ່ບັນດາຜົນງານທີ່ແຂວງວຽງຈັນຍາດມາໄດ້ ແລະ ເນັ້ນໃຫ້ສຸມໃສ່ຂໍ້ຄົງຄ້າງທີ່ຈະຕ້ອງປັບປຸງແກ້ໄຂ ພ້ອມທັງໃຫ້ທິດຊີ້ນຳສືບຕໍ່ບຸກບືນໃນການປະຕິບັດມະຕິ X ຂອງພັກ, ແຜນພັດທະນາເສດຖະກິດ ສັງຄົມ 5 ປີຄັ້ງທີ 8, ເວົ້າລວມເວົ້າສະເພາະກໍຄື: ການຈັດຕັ້ງປະຕິບັດມະຕິ 5 ຂອງອົງຄະນະພັກແຂວງວຽງຈັນ ໃຫ້ປະກົດຜົນເປັນຈິງ.

ທ່ານໄດ້ເນັ້ນໜັກຫຼາຍບັນຫາ ເພື່ອເຮັດໃຫ້ແຂວງວຽງຈັນ ໄດ້ຮັບການພັດທະນາຢ່າງຕໍ່ເນື່ອງ ເຮັດໃຫ້ບັນດາຖັນແຖວສະມາຊິກພັກ, ພະນັກງານ, ຕະຫຼອດຮອດພໍ່ແມ່ປະຊາຊົນມີຄວາມຕື່ນຕົວທາງດ້ານການເມືອງ, ປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດກໍ່ຄືການແກ້ໄຂບັນຫາລຶບລ້າງຄວາມທຸກຍາກທີ່ຍັງເຫຼືອ ເປັນຕົ້ນແມ່ນໃຫ້ສືບຕໍ່ຊີ້ນຳການປູກ, ການລ້ຽງປະເພດຕ່າງໆ ແລະ ທາງດ້ານການບໍລິການ ເຮັດໃຫ້ປະຊາຊົນມີລາຍຮັບສູງຂື້ນ, ປຸກລະດົມການປະຢັດມັດທະຍັດ ດ້ານການໃຊ້ຈ່າຍຟູມເຟືອຍ, ຫັນປ່ຽນດ້ານແນວຄິດຫຍໍ້້ທໍ້ ທີ່ເປັນສິ່ງອັດອັ້ນຕັນໃຈ ແລະ ກົດໜ່ວງຖ່ວງດຶງ, ການພັດທະນາ ພ້ອມທັງເນັ້ນໜັກການລົງກໍ່ສ້າງຮາກຖານການເມືອງ ໃຫ້ມີຄວາມແທດເໝາະ ເພື່ອປັບປຸງຮາກຖານການເມືອງຂັ້ນຮາກຖານ ໃຫ້ມີຄວາມໜັກແໜ້ນເຂັ້ມແຂງ ແລະ ເນັ້ນໃຫ້ເອົາໃຈໃສ່ການພັດທະນາຊັບພະຍາກອນມະນຸດ ໂດຍສະເພາະແມ່ນການກໍ່ສ້າງ ແລະ ບຳລຸງພະນັກງານໃນແຕ່ລະຂັ້ນ ເພື່ອສ້າງໃຫ້ໄດ້ພະນັກງານນຳພາຄຸ້ມຄອງ ແລະ ພະນັກງານສືບທອດປ່ຽນແທນ ສືບຕໍ່ນຳພາຈັດຕັ້ງປະຕິບັດວຽກງານໃນຕໍ່ໜ້າ ກໍ່ຄືການສືບຕໍ່ນຳພາສ້າງສາ ແລະ ພັດທະນາປະເທດຊາດໃຫ້ມີຄວາມຈະເລີນຮຸ່ງເຮືອງ.