header

ງານພົບປະຕັ້ງຄ້າຍ ມິດຕະພາບເຍົາວະຊົນທັນວາ 4ເມືອງ ແລະ 01 ໂຮງຮຽນ ມສ.

ເພື່ອເປັນການສ້າງຂະບວນການຂັບນັບຮັບຕ້ອນວັນຊາດທີ 2 ທັນວາ ຄົບຮອບ 44 ປີ , ວັນສ້າງຕັ້ງເຍົາວະຊົນຄົບຮອບ 64 ປີ ແລະ ເປັນການຂໍ່ານັບຮັບຕ້ອນກອງປະຊຸມໃຫຍ່ 03ຂັ້ນຂອງພັກທີ່ຈະເປີດຂຶ້ນໃຫ້ມີຂະບວນຟົດຟື້ນ ເພື່ອເຕົ້າໂຮມສະມາຊິກເຍົາວະຊົນ - ອານຸຊົນເຂົ້າສູ່ການຈັດຕັ້ງກໍ່ຄືຂະບວນການລວມຂອງຊາດ ,ຂອງພັກ ພ້ອມທັງເປັນການເປີດໂອກາດໃຫ້ນ້ອງນ້ອຍເຍົາວະຊົນໄດ້ພົບປະເເລກປ່ຽນບົດຮຽນເຊິ່ງກັນ ແລະ ກັນ.

ໃນວັນທີ 21 ພະຈິກ 2019 ຜ່ານມານີ້ ຢູ່ທີ່ໂຮງຮຽນ ມສ ທ່າຊັນ, ເມືອງແກ້ວອຸດົມ, ແຂວງວຽງຈັນ ໄດ້ຈັດກິດຈະກຳຕັ້ງຄ້າຍພົບປະແລກປຽນບົດຮຽນຂອງເຍົາວະຊົນທັນວາ 04 ເມືອງຄື ເມືອງແກ້ວອຸດົມ,ເມືອງໂພນໂຮງ,ເມືອງວຽງຄຳ,ເມືອງທຸລະຄົມ ແລະ 01 ໂຮງຮຽນ ມສ ໂພນໝີ ພາຍໃຕ້ການເປັນປະທານຂອງທ່ານ ນາງ ຈັນທະຄອນ ສິອຳພອນ ກຳມະການສູນກາງຊາວໜຸ່ມ, ກຳມະການພັກແຂວງ, ເລຂາຊາວໜຸ່ມແຂວງວຽງຈັນ.

ເປັນກຽດເຂົ້າຮ່ວມຂອງ ທ່ານ ຄຳພັນ ສິດທິດຳພາ ກໍາມະການສູນກາງພັກ ເລຂາພັກແຂວງເຈົ້າແຂວງໆວຽງຈັນ, ທ່ານ ວິລະວຸດ ປະກິດ ຮອງເລຂາພັກເມືອງ, ຮອງເຈົ້າເມືອງໆແກ້ວອຸດົມ ,ທ່ານ ນາງ ພັດທະສອນ ສີຫາປັນຍາ ຮອງເລຂາຄະນະບໍລິຫານງານຊາວໜຸ່ມເມືອງແກ້ວອຸດົມ,ມີບັນດາເລຂາຊາວໜຸ່ມ 04 ເມືອງ ແລະ ອໍາໜ່ວຍການໂຮງຮຽນ,ແຂກຖືກເຊີນ ,ຄູ ອາຈານ ແລະ ນ້ອງນ້ອຍເຍົາວະຊົນຂອງແຕ່ລະເມືອງ,ໂຮງຮຽນເຂົ້າຮ່ວມຢ່າງພ້ອມພຽງ.

ໃນພິທີທ່ານ ນາງ ພັດທະສອນ ສີຫາປັນຍາ ຮອງເລຂາຊາວໜຸ່ມເມືອງແກ້ວອຸດົມໄດ້ຜ່ານບົດລາຍງານຜົນສຳເລັດການຈັດງານຂອງການຕັ້ງຄ້າຍເຍົາວະຊົນທັນວາໃນຄັ້ງນີ້ແມ່ນການປະຕິບັດຕາມເນື້ອໃນຂໍ້ແຂ່ງຂັ້ນ 04 ບຸກຂອງຄະນະຊາວໜຸ່ມປະຊາຊົນປະຕິຫວັດລາວ ,ແມ່ນຢຸດທະສາດໃນການສືກສາອົບຮົມເຍົາວະຊົນອານຸຊົນຕາມເນື້ອໃນຄຳສອນ 06 ຮັກ 03 ຊັງ ຂອງທ່ານ ຜູ້ນໍາ,ເນື້ອໃນຂໍ້ແຂ່ງຂັ້ນ 03 ດີ 04 ຮູ້ຂອງເຍົາວະຊົນທັນວາ , ພ້ອມທັງເປັນການປູກຈິດສຳນຶກໃຫ້ເດັກນ້ອຍມີນໍ້າໃຈຮັກຊາດ, ຮູ້ເຖີງການປົກປັກຮັກສາ ແລະ ສືບທອດວັດທະນະທໍາຮີດຄອງປະເພນີອັນດີງາມຂອງຊາດ, ສ້າງໂອກາດໃຫ້ແກ່ເຍົາວະຊົນໄດ້ເຂົ້າຮ່ວມແລກປ່ຽນສິນລະປະວັນນະຄະດີ, ແບບແຜນຂອງກອງເຍົາວະຊົນ ແລະ ທັກສະ, ພ້ອມທັງເປັນການຍົກສູງຄວາມສາມາດ ແລະ ພອນສະຫວັນຕ່າງໆກັບໝູ່ເພື່ອນ ພອ້ມທັງໃຫ້ເຍົາວະຊົນຍຸກໃໝ່ຫ່າງໄກຈາກຢາເສບຕິດ.

ພ້ອມນີ້ກໍ່ໄດ້ເຊີນຄະນະປະທານທ່ຽວຊົມຄ້າຍເຍົາວະຊົນທັນວາເຊິ່ງແຕ່ລະຄ້າຍກໍ່ໄດ້ມີການຈັດວາງສະເເດງແບບຈຳລອງການດຳລົງຊີວິດປະຈຳວັນຂອງບ້ານ, ເມືອງທີ່ມີພື້ນຖານໂຄ່ງລ່າງຄົບຊຸດເປັນຕົ້ນຖະໜົນຫົນທາງ, ໄຟຟ້ານ້ຳປະປາ, ສຳນັກງານອົງການຂອງເມືອງ, ໂຮງຮຽນ, ໂຮງໝໍ,ສຸກສາລາຕະຫຼອດຮອດເຮືອນຊານຂອງປະຊາຊົນລວມໄປເຖິ່ງການດຳລົງຊີວິດຂອງປະຊາຊົນລາວບັນດາເຜົ່າທີ່ມີການປູກຝັ່ງລ້ຽງສັດ, ຫັດຖະກຳ ແລະ ການຫາປາທີ່ຖືກຕ້ອງຕາມປະເພນີຂອງລາວເຮົາເຊິ່ງແຕ່ລະຄ້າຍຕ່າງກໍ່ໄດ້ຮັບການຍ້ອງຍໍຊົມເຊີຍໄປຕາມໆກັນ. ທ່ານເຈົ້າແຂວງ ແລະ ແຂກຖືກເຊີນຈາກນັ້ນໄດ້ ພ້ອມກັນເຂົ້າຮ່ວມຮັບຊົມການສະແດງຊິນລະປະວັນນະຄະດີ ບົດຟ້ອນ ແລະ ຮ້ອງເພງ,ການເດີນແບບແຜນ,ການແຂ່ງຂັ້ນກິດຈະກຳແຕ່ງອາຫານຈາກຫຼານນ້ອຍເຍົາວະຊົນ.

ໃນພິທີຍັງໄດ້ຮັງຟັງການໂອ້ລົມຈາກທ່ານ ຄໍາພັນ ສິດທິດຳພາ ກໍາມະການສູນກາງພັກ ເລຂາພັກແຂວງເຈົ້າແຂວງໆວຽງຈັນ ໄດ້ສະເເດງຄວາມຍ້ອງຍໍຊົມເຊີຍຕໍ່ຄູ - ອາຈານ ,ຄະນະຮັບຜິດຊອບ ແລະ ຫຼານນ້ອຍເຍົາວະຊົນທຸກຄົນ ໄດ້ພ້ອມກັນເອົາໃຈໃສ່ໃຫ້ພິທີດັ່ງກ້າວເກີດຂື້ນ ແລະ ສຳເລັດດ້ວຍດີ ພ້ອມນີ້ທ່ານຍັງໄດ້ເນັ້ນໃຫ້ຫຼານນ້ອຍເຍົາວະຊົນຈົ່ງຕັ້ງໜ້າຝືກຟົນຕົນເອງປະຕິບັດເນື້ອໃນຄຳຂ້ວນຂອງເຍົາວະຊົນ ຂໍ້ແຂ່ງຂັ້ນ 03 ດີ 04 ຮູ້ ແລະ 06 ຮັກ 03 ຊັງ ຂອງເຍົາວະຊົນໃຫ້ປະກົດຜົນເປັນຈີງ.