header

ກອງປະຊຸມໃຫຍ່ຄັ້ງທີ III ຂອງອົງຄະນະພັກເມືອງໝື່ນ

ກອງປະຊຸມໃຫຍ່ຄັ້ງທີ III ຂອງອົງຄະນະພັກເມືອງໝື່ນ ແຂວງວຽງຈັນ ໄດ້ໄຂຂຶ້ນຢ່າງເປັນທາງການ.

ໃນຕອນເຊົ້າ ວັນທີ 12 ພະຈິກ 2019 ຜ່ານມານີ້ ເມືອງໝື່ນໄດ້ຈັດກອງປະຊຸມໃຫຍ່ຄັ້ງທີ III ຂອງອົງຄະນະພັກເມືອງໝື່ນ ຢູ່ທີ່ຫ້ອງວ່າການເມືອງໝື່ນ ໂດຍໄດ້ຮັບກຽດຢ່າງສູງ ແລະ ເຂົ້າຮ່ວມຂອງສະຫາຍ ຄໍາພັນ ສິດທິດຳພາ ກຳມະການສູນກາງພັກ, ເລຂາຄະນະບໍລິຫານງານພັກແຂວງ - ເຈົ້າແຂວງວຽງຈັນ ພ້ອມດ້ວຍ ບັນດາຄະນະປະຈຳ, ກຳມະການພັກແຂວງ, ເລຂາພັກເມືອງ - ເຈົ້າເມືອງທົ່ວແຂວງ, ພ້ອມດ້ວຍຜູ້ແທນສົມບູນ 98 ສະຫາຍ ຍິງ 7 ສະຫາຍ ເຊິ່ງຕາງໜ້າໃຫ້ສະມາຊິກພັກ ທົ່ວເມືອງໝື່ນ ເຂົ້າຮ່ວມ.

ສະຫາຍ ພູວອນ ບຸນວິໄລ ກຳມະການພັກແຂວງ ເລຂາພັກເມືອງ - ເຈົ້າເມືອງໆ ໝື່ນ ໄດ້ກ່າວໄຂກອງປະຊຸມຢ່າງເປັນທາງວ່າ: ກອງປະຊຸມໃຫຍ່ຜູ້ແທນອົງຄະນະພັກເມືອງໝື່ນຄັ້ງທີ III ໄດ້ໄຂຂຶ້ນໃນທ່າມກາງບັນຍາກາດທີ່ທັ່ວພັກ, ທົ່ວກອງທັບ, ທົ່ວປວງລາວທັງຊາດ ກໍ່ຄືທົ່ວແຂວງວຽງຈັນເວົ້າລວມ, ເວົ້າສະເພາະຢູ່ເມືອງໝື່ນ ພວມສຸມໃສ່ຢ່າງເຄັ່ງຮ້ອນຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ່ X ຂອງພັກ, ມະຕິກອງປະຊຸມໃຫຍ່ຜູ້ແທນອົງຄະນະພັກແຂວງຄັ້ງທີ V, ຄຽງຄູ່ກັບການສ້າງຜົນງານເພື່ອຂໍ່ານັບຮັບຕ້ອນກອງປະຊຸມໃຫຍ່ຜູ້ແທນທົ່ວປະເທດຄັ້ງທີ XI ຂອງພັກ ແລະ ກອງປະຊຸມໃຫຍ່ຜູ້ແທນອົງຄະນະພັກແຂວງຄັ້ງທີ VI ທີ່ຈະໄຂຂຶ້ນ ໃນຕໍ່ໜ້ານີ້ຢ່າງເປັນຂະບວນຟົດຟື້ນ.

ໃນກອງປະຊຸມຄັ້ງນີ້ ບັນດາຜູ້ແທນກອງປະຊຸມ ຈະໄດ້ພ້ອມກັນສຸມໃສ່ພິຈາລະນາຮັບຮອງເອົາບົດລາຍງານການເມືອງ, ແຜນພັດທະນາເສດຖະກິດ-ສັງຄົມ 5 ປີຜ່ານມາ (2015-2019) ແລະ ວາງທິດທາງຄາດໝາຍສູ້ຊົນໃນຊຸມປີຕໍ່ໜ້າ (2020-2024), ການປະກອບຄຳຄິດຄຳເຫັນຈາກບັນດາພາກສ່ວນຕ່າງໆພາຍໃນເມືອງ ແລະ ບັນດາເມືອງອ້ອມຂ້າງ, ຮັບຟັງບົດສຳຫຼວດການນຳພາລວມຂອງອົງຄະນະພັກເມືອງໝື່ນສະໄໝທີ II , ກອງປະຊຸມຈະໄດ້ພ້ອມກັນດຳເນີນການປ່ອນບັດເລືອກຕັ້ງເອົາຄະນະບໍລິຫານງານພັກເມືອງຊຸດໃໝ່ ເພື່ອສືບຕໍ່ນຳພາຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງນີ້ໃຫ້ປະກົດຜົນເປັນຈິງ, ເລືອກເອົາຜູ້ແທນເພຶ່ອເປັນຕົວແທນຂອງອົງຄະນະພັກເມືອງ ໄປຮ່ວມກອງປະຊຸມໃຫຍ່ຜູ້ອົງຄະນະພັກແຂວງຄັ້ງທີ VI , ພິເສດກອງປະຊຸມໃຫຍ່ຄັ້ງນີ້ຍັງຈະໄດ້ຮັບກຽດຟັງການໂອ້ລົມຈາກ ສະຫາຍ ຄຳພັນ ສິດທິດຳພາ ກຳມະການສູນກາງພັກ ເລຂາຄະນະບໍລິຫານງານພັກແຂວງ - ເຈົ້າແຂວງວຽງຈັນ ເຊິ່ງຈະເປັນທິດຊີ້ນໍາທາງດ້ານແນວຄິດ-ທິດສະດີ, ພຶດຕິກຳຕົວຈິງໃຫ້ແກ່ຄະນະບໍລິຫານງານພັກເມືອງຊຸດໃໝ່ ແລະ ຜູ້ແທນກອງປະຊຸມໃນການປະຕິບັດໜ້າທີ່ວຽກງານກໍ່ຄືການຈັດຕັ້ງຜົນຂະຫຍາຍມະຕິກອງປະຊຸມໃຫຍ່ຄັ້ງນີ້ໃຫ້ປະກົດຜົນເປັນຈິງ. ກອງປະຊຸມໃຫຍ່ຄັ້ງນີ້ ຈະໄດ້ດຳເນີນໄປເປັນເວລາ 2 ວັນ ຄື : ວັນທີ 12-13 ພະຈິກ 2019 ຈຶ່ງຈະອັດລົງ.