header

ທ່ານ ຄຳພັນ ສິດທິດຳພາ ເຈົ້າແຂວງໆວຽງຈັນ ລົງຢ້ຽມຢາມ ແລະ ເຮັດວຽກຢູ່ເມືອງເຟືອງ

ໃນຕອນບ່າຍຂອງວັນທີ 8 ພະຈິກ 2019 ຜ່ານມາ ທ່ານ ຄຳພັນ ສິດທິດຳພາ ກຳມະການສູນກາງພັກ, ເລຂາພັກແຂວງ, ເຈົ້າແຂວງໆວຽງຈັນ ພ້ອມດ້ວຍຄະນະນຳ ແຂວງວຽງຈັນ ລົງມາເຮັດວຽກຢູ່ ສະໂມສອນ ເມືອງເຟືອງ.

ໂດຍໃຫ້ກຽດຕ້ອນຮັບຂອງທ່ານ ສີຕານ ສຸປັນຍາ ກຳມະການພັກແຂວງ, ເລຂາພັກເມືອງ, ເຈົ້າເມືອງໆເຟືອງ ເຂົ້າຮ່ວມມີຄະນະປະຈຳພັກເມືອງ, ກຳມະການພັກເມືອງ, ພະນັກງານຫຼັກແຫຼ່ງ, ພະນັກງານອາວຸໂສບຳນານເມືອງເຟືອງ ເຂົ້າຮ່ວມ.

ໃນພິທີ ທ່ານ ສີຕານ ສຸປັນຍາ ກຳມະການພັກແຂວງ, ເລຂາພັກເມືອງ, ເຈົ້າເມືອງໆເຟືອງໄດ້ຂື້ນລາຍງານສະພາບການກະກຽມດຳເນີນກອງປະຊຸມໃຫຍ່ຄັ້ງທີ VII ຜູ້ແທນອົງຄະນະພັກເມືອງເຟືອງ ໂດຍຫຍໍ້ໃຫ້ຮູ້ວ່າ: ຄະນະປະຈຳພັກເມືອງ ກໍ່ໄດ້ຈັດກອງປະຊຸມເຊື່ອມຊືມເອກະສານມະຕິຂອງກົມການເມືອງສູນກາງພັກ ເລກທີ 032/ກສພ, ຄຳສັງແນະນຳເລກທີ 292 ຂອງຄະນະຈັດຕັ້ງສູນກາງພັກ, ມະຕິ 030/ກສພ, ວ່າດ້ວຍການທາບທາມພະນັກງານສືບທອດປ່ຽນແທນ ແລະ ມາດຕະຖານພະນັກງານສືບທອດປ່ຽນແທນ ແລະ ຈັດຕັ້ງການທາມທາມບຸກຄະລາກອນ ຮອບ I ສຳເລັດ, ຈາກນັ້ນກໍ່ໄດ້ຈັດກອງປະຊຸມ ເພື່ອຄົ້ນຄວ້າປຶກສາຫາລືສ້າງຄວາມເປັນເອກະພາບ ແລະ ໄດ້ອອກມະຕິຕົກລົງຂອງຄະນະປະຈຳພັກເມືອງວ່າດ້ວຍການຈັດຕັ້ງຄະນະຮັບຜິດຊອບກະກຽມ ແລະ ດຳເນີນກອງປະຊຸມໃຫ່ຍຄັ້ງທີ VII ຂອງອົງຄະນະເມືອງເຟືອງ. ພ້ອມນັ້ນຍັງໄດ້ກຳນົດພາລະບົດບາດ, ສິດ, ໜ້າທີ່ ແລະ ຄວາມຮັບຜິດຊອບ ຂອງແຕ່ລະອະນຸກຳມະການຢ່າງລະອຽດຈະແຈ້ງແຕ່ດ້ວຍຄວາມເປັນຫ່ວງເປັນໃຍ ຄະນະປະຈຳພັກແຂວງວຽງຈັນ ໃນການກະກຽມ ແລະ ດຳເນີນກອງປະຊຸມໃຫ່ຍຄັ້ງທີ VII ຂອງຄະນະປະຈຳພັກເມືອງເຟືອງ ໃຫ້ຖືກຕ້ອງ ແລະ ສອດຄ່ອງຕາມຂັ້ນຕອນທີ່ພັກໄດ້ກຳນົດໄວ້ນັ້ນ, ໄດ້ມີຄະນະປະຈຳພັກແຂວງວຽງຈັນ ຜູ້ຊີ້ນຳເມືອງເຟືອງ, ມີຄະນະກຳມະການຂອງແຂວງໄດ້ລົງມາໃຫ້ທິດຊີ້ນຳ ແຕ່ລະອະນຸກຳມະການໃນການກະກຽມທາງດ້ານເນື້ອໃນ, ລາຍງານການເມືອງບົດຍາວ, ບົດສັ້ນ, ແຜນພັດທະນາເສດຖະກິດ-ສັງຄົມ ບົດຍາວ, ບົດສັ້ນໃຫ້ໄປຕາມໂຄງຮ່າງທີ່ແຂວງໄດ້ສົ່ງມາໃຫ້ ຊຶ່ງໃຊ້ເວລາ 2 ວັນເຕັມ ຈາກນັ້ນແຕ່ລະອະນຸກຳມະການກະກຽມ ແລະ ດຳເນີນກອງປະຊຸມໃຫ່ຍຄັ້ງທີ VII ຂອງອົງຄະນະພັກເມືອງກໍ່ໄດ້ຈັດຕັ້ງໜ້າທີ່ຂອງຕົນ ຕາມມະຕິຕົກລົງຂອງຄະນະປະຈຳພັກເມືອງ ຢ່າງເປັນເຈົ້າການ ແລະມີຄວາມຮັບຜິດຊອບສູງ ເຊິ່ງມາຮອດປະຈຸບັນເອກະສານທັງໝົດ ທີ່ໄດ້ກະກຽມໃຫ້ກອງປະຊຸມໃຫ່ຍ ແລະ ສຳເລັດຜົນໂດຍພື້ນຖານ ແລະ ເອກະສານທັງໝົດນັ້ນໄດ້ຈັດສົ່ງໃຫ້ຄະນະຊີ້ນຳຂັ້ນແຂວງ ເພື່ອກວດກາ ແລະ ປັບປຸງ ຊ່ວຍອະນຸກຳມະການກະກຽມ ແລະ ດຳເນີນກອງປະຊຸມໃຫ່ຍຂອງເມືອງເພື່ອປັບປຸງຄືນໃຫ້ເປັນເອກະສານທີ່ສົມບູນແບບເພື່ອຮັບຮອງໃຫ້ແກ່ການດຳເນີນກອງປະຊຸມໃຫ່ຍທັນຕາມກຳນົດເວລາ.

ໃນຕອນທ້າຍ ຍັງໄດ້ຮັບຟັງການໂອ້ລົມຂອງທ່ານ ຄຳພັນ ສິດທິດຳພາ ກຳມະການສູນກາງພັກ, ເລຂາພັກແຂວງ, ເຈົ້າແຂວງໆວຽງຈັນອີກດ້ວຍ.