header

ທ່ານເຈົ້າແຂວງໆວຽງຈັນ ເຂົ້າຮ່ວມພິທີ ເປີດກີດຢາງພາລາ ຂອງປະຊາຊົນ ບ້ານໂພນສະຫວາດ

ໃນຕອນເຊົ້າຂອງ ວັນທີ 8 ພະຈິກ 2019 ຜ່ານມານີ້ ທ່ານ ຄໍາພັນ ສິດທິດໍາພາ ກໍາມະການສູນກາງພັກ, ເລຂາພັກແຂວງ, ເຈົ້າແຂວງໆວຽງຈັນ ໄດ້ເຂົ້າຮ່ວມພິທີກີດຢາງພາລາຂອງປະຊາຊົນ ທີ່ຖືກຜົນກະທົບ ຈາກໂຄງການນ້ຳງື່ມ 2 ຂອງປະຊາຊົນກຸ່ມບ້ານໂພນສະຫວາດ ເມືອງເຟືອງ ພ້ອມດ້ວຍຄະນະ. ໂດຍການຕ້ອນຮັບຂອງທ່ານ ສີຕານ ສຸປັນຍາ ກຳມະການພັກແຂວງ, ເລຂາພັກເມືອງ, ເຈົ້າເມືອງໆເຟືອງ, ນາຍບ້ານໆ ໂພນສະຫວາດ, ບັນດາທ່ານ ຕາງໜ້າໂຄງການ ພ້ອມດ້ວຍຄະນະ ແລະ ມີບັນດາອົງການຈັດຕັ້ງບ້ານທຸກກຸ່ມ ຕະຫຼອດຮອດພໍ່ແມ່ປະຊາຊົນ ເຂົ້າຮ່ວມ.

ໃນພິທີ ທ່ານ ບນຸມາ ທຳມະວົງ ກຳມະການພັກເມືອງ, ເລຂາຄະນະພັກຮາກຖານ, ຫົວໜ້າກຸ່ມບ້ານໂພນສະຫວາດ ໄດ້ຂື້ນລາຍງານຜົນສຳເລັດໃນການຈັດຕັ້ງ ປະຕິບັດການສົ່ງເສີມ ການປູກຢາງພາລາ ໃຫ້ຮູ້ວ່າ: ລາຍຮັບທັງໝົດ 16 ບ້ານກ່ອນການຍົກຍ້າຍ ປີ 2007 ມີ 923,230 ກີບ ຫລື ປະມານ 1 ລ້ານກີບ/ຄຄ, ພາຍຫລັງຍົກຍ້າຍນັບແຕ່ປີ 2010 ເປັນຕົ້ນມາລາຍຮັບຂອງປະຊາຊົນມີການເພີ່ມຂື້ນຢ່າງຕໍ່ເນື່ອງ, ມາຮອດປີ 2016 ລາຍຮັບຂອງປະຊົນແຕ່ລະຄອບຄົວໄດ້ບັນລຸຜົນສຳເລັດຕາມສັນຍາທີ່ໄດ້ກຳນົດໄວ້ຄື 150,240 ລ້ານກີບ ຫລື 1,800ໂດລາ/ຄອບຄົວ, ເຮັດໃຫ້ລາຍຮັບໝົດບ້ານບັນລຸໄດ້ 29,8ຕື້ກີບ, ທຽບໃສ່ກ່ອນຍົກຍ້າຍປີ 2007 ເພີ່ມຂື້ນ 29 ເທື່ອຄອບຄົວທຸກຍາກໄດ້ຖືກລົບລ້າງຢ່າງສີ້ນເຊີງ, ມາຮອດປີ 2018 ໝົດບ້ານມີລາຍຮັບ 31,6ຕື້ກີບ, ທຽບໃສ່ປີ 2016 ບັນລຸໄດ້ 106% ແລະ ທຽບໃສ່ປີ 2017 ບັນລຸໄດ້ 102%. ພ້ອມທັງສົ່ງເສີມອາຊີບຕ່າງໆເຊັ່ນ: ຕໍ່າຫູກ, ປູກໄມ້ກິນໝາກ, ລ້ຽງແບ້, ໝູ, ເປັດ-ໄກ່, ຕັດຫຍິບ, ສ້ອມແປງເລັກນ້ອຍ, ຄ້າຂາຍນ້ອຍ ເຮັດການບໍລິການ ແລະ ການປະມົງ ຢູ່ເຂດນ້ຳລິກ, ຈາກການຈັດຕັ້ງສົ່ງເສີມບັນດາກິດຈະກຳດັ່ງກ່າວເຮັດໃຫ້ຊີວິດການເປັນຢູ່ ແລະ ບາຍຮັບດີຂື້ນຢ່າງຕໍ່ເນື່ອງ.

ໃນຕອນທ້າຍ ທ່ານ ຄຳພັນ ສິດທິດຳພາ ເຈົ້າແຂວງໆວຽງຈັນ ກໍໄດ້ສະແດງຄວາມດີໃຈຢ່າງສຸດຊື້ງ, ແລະ ທ່ານຍັງໄດ້ກ່າວຕໍ່ປະຊາຊົນບ້ານໂພນສະຫວາດວ່າ: ຄຽງຄູ່ກັບຜົນງານທີ່ຍາດມາໄດ້ນັ້ນເຫັນວ່າໂຄງການກໍ່ຄື ພໍ່ແມ່ພີ່ນ້ອງປະຊາຊົນ ໄດ້ບຸກບືນ ຊອກຫາແຫຼ່ງລາຍຮັບອື່ນໆອີກ ທີ່ເຫັນວ່າເປັນທ່າແຮງ ແລະ ເປັນລາຍຮັບຈາກອາຊີບທີ່ໝັ້ນຄົງມີລາຍຮັບ ແລະ ຊີວິດທີ່ດີຂື້ນຕື່ມອີກ.

ພ້ອມດຽວກັນນັ້ນທ່ານ ຄຳພັນ ສິດທິດຳພາ ເຈົ້າແຂວງໆວຽງຈັນ ກໍ່ໄດ້ກ່າວເປີດພິທີກີດຢາງພາລາ ຢ່າງເປັນທາງການ, ໄດ້ສາທິດການກີດຢາງ ແລະ ມອບເຄື່ອງອຸປະກອນການກີດຢາງ ໃຫ້ແກ່ປະຊາຊົນ ບ້ານໂພນສະຫວາດອີກດ້ວຍ.