header

ຄະນະຜູ້ແທນອາສາສະໝັກ ແລະ ຊ່ຽວຊານຈາກສາມແຂວງ ສສ ຫວຽດນາມ ມາຢ້ຽມຢາມແຂວງວຽງຈັນ

 

ໃນຕອນເຊົ້າຂອງວັນທີ 6 ພະຈິກ 2019 ຢູ່ທີ່ຫ້ອງປະຊຸມ ຊັ້ນ 2 ຫ້ອງວ່າການແຂວງວຽງຈັນ, ທ່ານ ຄຳພັນ ສິດທິດຳພາ ເລຂາພັກແຂວງເຈົ້າແຂວງໆວຽງຈັນ, ພ້ອມຄະນະ, ໄດ້ຕ້ອນຮັບການມາຢ້ຽມຢາມຂອງຄະນະຜູ້ແທນອາສາສະໝັກ ແລະ ຊ່ຽວຊານຈາກສາມແຂວງ: ແຂວງຟູເຖາະ, ແຂວງຕວຽນກວາງ ແລະ ແຂວງຮາຍເຢືອງ ສສ ຫວຽດນາມ, ເຊິ່ງນໍາໂດຍ ທ່ານ ພັນເອກ ຫງວຽນ ຈ໋ອງ ຕັງ ຫົວໜ້າຄະນະປະສານງານຊ່ຽວຊານການທະຫານພາກໃຕ້ລາວ ແຂວງ ຟູເຖາະ, ແຂວງຕວຽນກວາງ, ແຂວງຮາຍເຢືອງ ສສ ຫວຽດນາມ ພ້ອມຄະນະ.
ໃນໂອກາດທີ່ທ່ານພ້ອມຄະນະເດີ່ນ ທາງມາຢ້ຽມຢາມ ແຂວງວຽງຈັນ ສປປ ລາວ ໃນຄັ້ງນີ້ ທ່ານເຈົ້າແຂວງໆວຽງຈັນ ກໍ່ໄດ້ສະແດງຄວາມຍິນດີຕ້ອນຮັບຊົມເຊີຍ ແລະ ຕີລາຄາສູງຕໍ່ທ່ານ ພັນເອກ ຫງວຽນ ຈ໋ອງ ຕັງ ພ້ອມຄະນະທີ່ເດີ່ນທາງມາຢ້ຽມຢາມ ແຂວງວຽງຈັນ ສປປ ລາວ ໃນຄັ້ງນີ້, ຊື່ງທ່ານໄດ້ນຳເອົາຄວາມຄິດຮອດຄິດເຖິງ, ນຳເອົາຄວາມສາມັກຄີຮັກແຮງອັນສະໜິດສະໜົມ ອົບອຸ່ນຈາກສະຫາຍອ້າຍນ້ອງຫວຽດນາມ ມາສູ່ແຂວງວຽງຈັນ. ພ້ອມທັງໄດ້ລາຍສະພາບການໂດຍຫຍໍ້ກ່ຽວກັບປະຫວັດສາດລາວ-ຫວຽດນາມກໍໍ່ຄືບັນດາແຂວງຈາກ ສສ ຫວຽດນາມ ແຕ່ລະປີໄດ້ມີການແລກປ່ຽນຢ້ຽມຢາມຊື່ງກັນແລະກັນ ຢ່າງເປັນປົກກະຕິຂອງຄະນະຜູ້ແທນຂັ້ນສູງ ແລະ ຂະແໜງການ ຈຳນວນໜື່ງ. ຝ່າຍ ສສ ຫວຽດນາມເອງ ກໍ່ໄດ້ເອົາໃຈໃສ່ໃຫ້ການຊ່ວຍເຫຼືອແຂວງວຽງຈັນ ຢ່າງເປັນປົກກະຕິ ແລະ ຕໍ່ເນື່ອງເປັນຕົ້ນແມ່ນການຊ່ວຍເຫຼືອໃນການກໍ່ສ້າງໂຮງຮຽນອະນຸບານ, ໂຮງຮຽນປະຖົມ ແລະ ໂຮງຮຽນມັດທະຍົມ ພ້ອມທັງກໍ່ສ້າງບຸກຄະລາກອນ ໂດຍສະເພາະແມ່ນຊ່ວຍສ້າງນັກຮຽນຮຽນພາສາຫວຽດນາມ ແລະ ນັກສຶກສາວິຊາຊີບ. ພິເສດ ແຂວງວຽງຈັນແມ່ນໄດ້ມີຄະນະສະເພາະກິດເພື່ອຊອກຄົ້ນຮ່າງອັດຖິທະຫານອາສາສະໝັກ ແລະ ຊ່ຽວຊານຫວຽດນາມ ທີ່ເສຍຊີວິດຢູ່ລາວ ໃນປາງສົງຄາມ ເພື່ອສົ່ງກັບຄືນປະເທດ ສະເພາະຢູ່ແຂວງວຽງຈັນ ການຊອກຄົ້ນອັດຖິ ໃນຊຸມປີທີ່ຜ່ານມາແມ່ນຊອກຄົ້ນໄດ້ແລ້ວ 102 ອັດຖິ ແລະ ໄດ້ສົ່ງກັບຄືນປະເທດຢ່າງສົມກຽດ.

ນອກຈາກການພົວພັນຮ່ວມມືສອງຝ່າຍກັບບັນດາແຂວງທີ່ກ່າວມາແລ້ວນັ້ນ, ກໍ່ຍັງໄດ້ປະກອບສ່ວນຢ່າງຕັ້ງໜ້າເຂົ້າໃນການພົວພັນຮ່ວມມືຜ່ານສະມາຄົນມິດຕະພາບ ລາວ-ຫວຽດນາມ ທັງໃນລະດັບສູນກາງ ແລະ ລະດັບແຂວງ ຢ່າງເປັນປົກກະຕິ ແລະ ຕໍ່ເນື່ອງ.

ທ່ານ ພັນເອກ ຫງວຽນ ຈ໋ອງ ຕັງ ກໍໄດ້ກ່າວສະແດງຄວາມຂອບໃຈຕໍ່ທ່ານເຈົ້າແຂວງໆວຽງຈັນ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ລາຍງານໂດຍຫຍໍ້ກ່ຽວກັບການຮ່ວມມື ລາວ-ຫວຽດນາມ ທີ່ຜ່ານມາໃຫ້ຄະນະປະສານງານຊ່ຽວຊານ ທະຫານພາກໃຕ້ລາວ ຮັບຊາບ.