header

ພິທີປາຖະກະຖາ ວັນລັດຖະທຳມະນູນ ແຫ່ງ ສປປ ລາວ

 

ໃນຕອນເຊົ້າຂອງວັນທີ 15 ສິງຫາ 2019 ຜ່ານມານີ້ ຢູ່ທີ່ຫ້ອງວ່າການແຂວງວຽງຈັນໄດ້ຈັດພິທີປາຖະກະຖາວັນສຳຄັນທາງປະຫວັດສາດ ຂອງຊາດລາວເຮົາ ນັ້ນກໍຄືວັນລັດຖະທຳມະນູນ ແຫ່ງ ສປປ ລາວ ເຊິ່ງໃນນີ້ ກໍໝູນວຽນມາ ຄົບຮອບ 28 ປີ. ໂດຍ ການເປັນປະທານຂອງທ່ານ ສຈ. ປອ ຈະເລີນ ເຢຍປາວເຮີ ລັດຖະມົນຕີປະຈຳສຳນັກງານນາຍົນ ແລະ ໂຄສົກລັດຖະບານ, ມີບັນດາແຂກທຸກພາກສ່ວນອ້ອມຂ້າງແຂວງ ເຂົ້າຮ່ວມ.

ທ່ານ ຄຳພັນ ສິດທິດຳພາ ເຈົ້າແຂວງໆວຽງຈັນ ໄດ້ຂື້ນກ່າວເຖິງຄວາມໝາຍຄວາມສຳຄັນຂອງສຳຄັນທາງປະຫວັດສາດ ກໍຄືວັນລັດຖະທຳມະນູນ ແຫ່ງ ສປປ ລາວ ແມ່ນວັນໜື່ງທີ່ມີຄວາມໝາຍຄວາມສຳຄັນ ແລະ ລັດຖະທຳມະນູນ ກໍ່ເປັນກົດໝາຍພື້ນຖານຂອງຊາດ ເປັນການສ້າງສະຕິຊາດ ເອກະພາບອັນໜື່ງອັນດຽວ ພາຍໃຕ້ການນຳພາຂອງພັກ, ເປັນພາຫະນະທີ່ສຳຄັນ ເພື່ອໃຊ້ໃນການຄຸ້ມຄອງລັດ-ຄຸ້ມຄອງສັງຄົມ ແລະ ສິ່ງສຳຄັນຢ່າງໜື່ງທີ່ໄດ້ກຳນົດ ແຈ້ງຢູ່ໃນລັດຖະທຳມະນູນ ກໍຄື ລະບອບການເມືອງ, ພາສາ, ຕົວອັກສອນ, ທຸງຊາດ, ສະກຸນເງິນເປັນຕົ້ນ.

ທ່ານເຈົ້າແຂວງໆວຽງຈັນ ຍັງໄດ້ກ່າວອີກວ່າ ການສະເຫຼີມສະຫຼອງໃນປີນີ້ ແມ່ນຢູ່ໃນທ່າມກາງບັນຍາກາດທີ່ທົ່ວພັກ, ທົ່ວລັດ, ທົ່ວປວງຊົນລາວທັ້ງຊາດ ໂດຍສະເພາະ ກໍ່ແມ່ນປະຊາຊົນບັນດາເຜົ່າໃນແຂວງວຽງຈັນພວມບຸກບືນຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ X ຂອງພັກ ກໍຄືມະຕິກອງປະຊຸມໃຫຍ່ຄັ້ງທີ V ຂອງອົງຄະນະແຂວງວຽງຈັນ ຕິດພັນກັບການຫັນພະນັກງານລົງກໍ່ສ້າງຮາກຖານການເມືອງ ພັດທະນາຊົນນະບົດຢ່າງກວ້າງຂວາງ. ພິເສດກໍ່ແມ່ນການສ້າງຂະບວນການຕ່າງໆ ເພື່ອຕ້ອນຮັບ ການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນໃນທົ່ວແຂວງວຽງຈັນ ຢ່າງເປັນຂະບວນຟົດຟື້ນ.