header

ສຳເລັດກອງປະຊຸມເປີດກ້ວາງ ຄົບຄະນະບໍລິຫານງານພັກ ອົງການປົກຄອງ ແຂວງວຽງຈັນ

ສຳເລັດກອງປະຊຸມເປີດກ້ວາງຄົບຄະນະບໍລິຫານງານພັກອົງການປົກຄອງແຂວງວຽງຈັນຄັ້ງທີI ປະຈຳປີ 2019.  

ກອງປະຊຸມເປີດກ້ວາງຄົບຄະນະບໍລິຫານງານພັກແຂວງວຽງຈັນຄັ້ງທີ1 ປະຈຳປີ2019 ໄດ້ໄຂຂຶ້ນແລະອັດລົງດ້ວຍຜົນສຳເລັດຢ່າງຈົບງາມລະຫວ່າງວັນທີ 25-26 ກໍລະກົດ2019 ນີ້, ທີ່ສະໂມສອນໃຫຍ່ແຂວງວຽງຈັນ, ໂດຍພາຍໃຕ້ການເປັນປະທານຂອງທ່ານຄຳພັນສິດ ທິດຳພາກຳມະການສູນກາງພັກເລຂາພັກແຂວງເຈົ້າແຂວງວຽງຈັນ,ມີຄະນະປະຈຳພັກແຂວງກຳມະການພັກແຂວງ, ເຈົ້າເມືອງ 11ເມືອງ, ພະແນກການອ້ອມຂ້າງແຂວງເຂົ້າຮ່ວມ.  

ໃນກອງປະຊຸມໄດ້ຮັບຟັງການລາຍງານຈາກພະແນກແຜນການ-ການລົງທຶນແລະພະ ແນກງານເງິນແຂວງຕໍໍ່ກັບການຕີລາຄາຜົນການຈັດຕັ້ງປະຕິບັດແຜນພັດທະນະເສດຖະກິດ-ສັງຄົມແລະງົບປະມານ 6 ເດືອນຕົ້ນປີ 2019, ກໍຄືຕໍ່ການກໍານົດຄາດໝາຍສູ້ຊົນແລະທິດທາງແຜນການ 6 ເດືອນທ້າຍປີ 2019 ແນ່ໃສ່ເພື່ອຊອກຫາທາງອອກທີ່ສອດຄ່ອງເໝາະສົມໃຫ້ແກ່ການແກ້ໄຂບັນຫາເສດຖະກິດ, ແກ້ໄຂບັນຫາຄວາມຫຍຸ້ງຍາກທາງດ້ານການເງິນ, ກໍຄືວຽກງານໃນຂົງເຂດສັງຄົມໃຫ້ມີຄວາມໜັກແໜ້ນ. ພ້ອມນັ້ນກອງປະຊຸມຂອງພວກເຮົາຍັງໄດ້ຮັບຟັງການປະກອບຄຳເຫັນຊຶ່ງພົວພັນກັບແຜນພັດທະນາເສດຖະກິດ-ສັງຄົມແລະງົບ ປະມານຂອງລັດເປັນຕົ້ນຕໍ່ກັບການຊົດເຊີຍໃນແລວເສັ້ນທາງລົດໄຟລາວ-ຈີນ, ຮັບຟັງກ່ຽວກັບການນຳໃຊ້ເນື້ອທີ່ດິນຫຼືເຊົ່າດິນນໍາລັດ,  ການກຳນົດເຂດອຸດສະຫະກຳ, ການຄຸ້ມຄອງການທ່ອງທ່ຽວຢູ່ເມືອງວັງວຽງແລະອ່າງນໍ້າງື່ມ 1, ການແກ້ໄຂບັນຫາໄພພິບັດຜ່ານມາແລະ ຄາດຄະເນແຜນຮັບມືໄພພິບັດທີ່ຈະເກີດຂຶ້ນໃນຕໍ່ໜ້າແລະຟັງລາຍງານກ່ຽວກັບການປະຕິບັດຄຳສັ່ງ 15/ນຍກ່ຽວກັບໄມ້, ຜ່ານການຟັງລາຍງານແລະການປະກອບຄຳເຫັນຂອງຫຼາຍສະຫາຍເຫັນວ່າໃນ 6 ເດືອນຕົ້ນປີ 2019 ບັນດາພະແນກການ,  ເມືອງແຕ່ລະເມືອງໄດ້ເອົາໃຈໃສ່ໃນການຜັນຂະຫຍາຍແລະຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານຂອງແຂວງໄດ້ປະກົດຜົນເປັນຮູບປະທຳຕົວຈິງຫຼາຍສົມຄວນເຖິງວ່າສະພາບເສດຖະກິດພາຍໃນປະເທດເຮົາໂດຍລວມຍັງມີຄວາມຫຍຸ້ງຍາກກໍຕາມແຕ່ຂະບວນການສ້າງ ສາພັດທະນາໃນທຸກຂົງເຂດວຽກງານແຂວງເຮົາແມ່ນຍັງສືບຕໍ່ດຳເນີນໄປເປັນປົກກະຕິດີອັນໄດ້ເກີດໃຫ້ພື້ນຖານເສດຖະກິດຂອງແຂວງຍັງມີການຂະຫຍາຍຢ່າງຕໍ່ເນື່ອງຈັ່ງຫວະການເພີ່ມຂຶ້ນຂອງລວມຍອດຜະລິດຕະພັນພາຍໃນ (GDP) ເຖິງວ່າມີບາງດ້ານບໍ່ທັນບັນລຸຕາມຄາດໝາຍແຕ່ກໍຍັງເພີ່ມຂຶ້ນ 6,7% ສະເລ່ຍໃສ່ຫົວຄົນບັນລຸ 14,13 ລ້ານກີບຫຼືເທົ່າກັບ 1.703 ໂດລາ, ການເກັບລາຍຮັບເຂົ້າງົບປະມານໄດ້ 54,26 %, ລາຍຈ່າຍປະຕິບັດໄດ້ 45,32%, ຜະ ລິດເຂົ້າໄດ້ນາແຊງໄດ້ 39,188ໂຕນ, ຄວາມທຸກຍາກຍັງເຫຼືອ 9 ບ້ານກວມ 2,15 %ຂອງ ຈຳນວນບ້ານທົ່ວແຂວງ, ຄອບຄົວທຸກຍາກຍັງ 930 ຄອບຄົວເທົ່າກັບ 1,06% ຂອງຄອບ ຄົວທັງໝົດ. ສ່ວນການຈັດຕັ້ງປະຕິບັດວຽກງານໃນຂົງເຂດສັງຄົມ-ວັດທະນະທຳກໍໄດ້ດຳເນີນໄປດ້ວຍຜົນສຳເລັດແລະບັນຍາກາດທີ່ດີອັດຕາເຂົ້າຮຽນຂອງເດັກກ່ອນໄວຮຽນປະຕິບັດໄດ້ 78,5%, ອັດຕາເຂົ້າຮຽນສຸດທິຊັ້ນປະຖົມສຶກສາ 99,4%, ອັດຕາການຕາຍຂອງເດັກລຸ່ມ 1 ປີປະຕິບັດໄດ້ 3,1/1000 ເດັກເກີດມີຊີວິດ, ສະໜອງນໍ້າສະອາດໃຫ້ປະຊາຊົນໄດ້ 85%ແລະ ອັດຕາການໃຊ້ວິດຖ່າຍ 71%, ຄອບຄົວວັດທະນະທຳ 1.127 ຄອບຄົວ, ບ້ານວັດທະນະທຳ 6 ບ້ານ, ນັກທ່ອງທ່ຽວເຂົ້າມາແຂວງ 356.945 ເທື່ອຄົນກວມ 49% ຂອງແຜນການປີແລະ ບັນດາຄາດໝາຍອື່ນໆ,  ກໍໄດ້ມີການຈັດຕັ້ງປະຕິບັດທຽບໃສ່ແຜນການປີບໍ່ທັນໄດ້ຕາມຄາດ ໝາຍກໍຕາມ, ພວກເຮົາຍັງມີເວລາອີກ 6 ເດືອນທີ່ຈະຕ້ອງໄດ້ສຸມໃສ່ບຸກທະລຸໃຫ້ໄດ້. ຜ່ານການລາຍງານປະກອບຄຳເຫັນຂອງບັນດາສະຫາຍເຫັນວ່າມີຫຼາຍໜໍ່ແໜງແລະປັດໃຈໃໝ່ເກີດຂຶ້ນທີ່ຢັ້ງຢືນເຖິງຄວາມຖືກຕ້ອງຂອງແຜນພັດທະນາເສດຖະກິດ -ສັງຄົມ, ແຜນງົບປະ ມານຂອງແຂວງພວກເຮົາກໍຄືຄວາມເປັນເຈົ້າການບຸກບືນສູ້ຊົນຂອງອຳນາດການປົກຄອງແຕ່ ລະຂັ້ນແລະການປະກອບສ່ວນເຂົ້າຮ່ວມຂອງບັນດາອົງການພັກ, ສະພາປະຊາຊົນແຂວງ, ອົງການຕຸລາການ, ແນວລາວສ້າງຊາດແລະອົງການຈັດຕັ້ງມະຫາຊົນ, ຈຶ່ງເຮັດໃຫ້ພວກເຮົາຍາດໄດ້ຜົນສຳເລັດຫຼາຍດ້ານທີ່ພົ້ນເດັ່ນ.