header

ພິທີມອບ-ຮັບໜ້າທີ່ ເລຂາພັກແຂວງຜູ້ເກົ່າ ແລະ ຜູ້ໃໝ່

ພິທີມອບ-ຮັບໜ້າທີ່ ເລຂາພັກແຂວງ; ເຈົ້າແຂວງໆວຽງຈັນ ຜູ້ເກົ່າ ແລະ ຜູ້ໃໝ່

ໂດຍປະຕິບັດຕາມຄຳສັ່ງຂອງກົມການເມືອງສູນກາງພັກ ສະບັບເລກທີ067/ກມສພ ລົງວັນທີ 23 ເມສາ 2019 ເຊິ່ງໄດ້ໂຍກຍ້າຍ ສະຫາຍ ວິດົງ ໄຊຍະສອນ ກຳມະການສູນກາງພັກ, ເລຂາຄະນະບໍລິຫານງານພັກ ແຂວງວຽງຈັນ ໄປຮັບໜ້າທີ່ເປັນ ລັດຖະມົນຕີ ປະຈຳສຳນັກງານນາຍົກ.

ໃນວັນທີ 12 ມິຖຸນາ ຢູ່ທີ່ຫ້ອງວ່າການ ແຂວງວຽງຈັນ ໄດ້ເປີດພິທີມອບ-ຮັບໜ້າທີ່ ເລຂາພັກແຂງ-ເຈົ້າແຂວງວຽງຈັນຜູ້ເກົ່າ ແລະ ຜູ້ໃໝ່ລະຫວ່າງ ທ່ານ ວິດົງ ໄຊຍະສອນ ເລຂາພັກແຂວງ, ເຈົ້າແຂວງໆວຽງຈັນ ຜູ້ເກົ່າ ແລະ ທ່ານ ຄຳພັນ ສິດທິດຳພາ ເລຂາພັກແຂງ, ເຈົ້າແຂວງໆວຽງຈັນຜູ້ໃໝ່ ໂດຍເປັນກຽດເຂົ້າຮ່ວມເປັນສັກຂີພະຍານຂອງ ທ່ານ ພັນຄຳ ວິພາວັນ ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປປ ລາວ ແລະ ມີບັນດາສະຫາຍໃນຄະນະບໍລິຫານງານ ພັກແຂວງ ແລະ ພະນັກງານຫຼັກແຫຼ່ງພາຍໃນແຂວງວຽງຈັນ ເຂົ້າຮ່ວມຢ່າງພ້ອມພຽງ.

ໃນໂອກາດນີ້ ທ່ານ ວິດົງ ໄຊຍະສອນ ເລຂາພັກແຂວງ, ເຈົ້າແຂວງໆວຽງຈັນ ຜູ້ເກົ່າ ໄດ້ກ່າວມອບໜ້າທີ່ ແລະ ລາຍງານຜົນສຳເລັດສຳຄັນ ຕະຫຼອດໄລຍະຂອງ ການຊີ້ນຳ-ນຳພາ ໃນໄລຍະຜ່ານມາໂດຍສັງເຂບວ່າ: ພາຍໃຕ້ການຊີ້ນຳ-ນໍາພາ ໄດ້ເຮັດໃຫ້ ແຂວງວຽງຈັນ ມີຄວາມສະຫງົບປອດໄພ, ສັງຄວາມມີຄວາມເປັນລະບຽບຮຽບຮ້ອຍ, ວຽກງານພັກ, ພະນັກງານໄດ້ຮັບການກໍ່ສ້າງ ແລະ ບຳລຸງຢ່າງເປັນລະບົບ, ປັດຈຸບັນທົ່ວແຂວງມີ 114 ຄະນະພັກຮາກຖານ, ມີ 1.231 ໜ່ວຍພັກ, ໃນນັ້ນໄດ້ຖືກຮັບຮອງເປັນໜ່ວຍພັກແຂງ-ຮູ້ນຳພາຮອບດ້ານແລ້ວ 508 ໜ່ວຍພັກ, ເທົ່າກັບ 41,26%, ມີໜ່ວຍພັກແຂງ 469 ໜ່ວຍ, ໜ່ວຍພັກກາງ 48 ໜ່ວຍ, ມີລັດຖະກອນທັງໝົດ 11.113 ຄົນ, ຍິງ 5.271 ຄົນ, ດ້ານເສດຖະກິດຂະຫຍາຍຕົວ 8,4% ຕໍ່ປີ, ລາຍໄດ້ສະເລ່ຍຕໍ່ຫົວຄົນມາຮອດປັດຈຸບັນ, ບັນລຸໄດ້ 15.460.000 ກີບ, ເທົ່າກັບ 1.858 ໂດລາຕໍ່ຄົນຕໍ່ປີ, ມີເຂື່ອນໄຟຟ້າທີ່ຜະລິດໄຟຟ້າແລ້ວ 5 ແຫ່ງມີກຳລັງຕິດຕັ້ງ 316 ເມກາວັດ, ພວມກໍ່ສ້າງເຂື່ອນຂະໜາດ 15 ເມກາວັດ ລົງມາອີກ 4 ແຫ່ງ, ປະຊາຊົນໄດ້ໃຊ້ໄຟຟ້າ 100%, ດ້ານວັດທະນະທຳ-ສັງຄົມ. ອັດຕາເຂົ້າຮຽນບັນລຸໄດ້ 99,34% ແລະ ສາມາດປະກາດຈົບຊັ້ນປະຖົມບຳລຸງ ທົ່ວແຂວງ, ສາມາດລຶບລ້າງບ້ານທຸກຍາກໄດ້ 74 ບ້ານ, ໃນຈຳນວນ 433 ບ້ານ, ປັດຈຸບັນຍັງເຫຼືອບ້ານທຸກຍາກພຽງ 9 ບ້ານ, ກວມເອົາ 2,08%, ຍັງມີຄອບຄົວທຸກຍາກ 930 ຄອບຄົວ, ເທົ່າກັບ 1,13%, ສ້າງບ້ານພັດທະນາໄດ້ແລ້ວຈຳນວນ 206 ບ້ານ, ເທົ່າກັບ 47,69%, ພ້ອມນີ້ກໍ່ໄດ້ມີການກໍ່ສ້າງເທດສະບານ ຂອງແຂວງວຽງຈັນ ໃຫ້ເປັນຮູບເປັນຮ່າງຂຶ້ນ ແລະ ກໍ່ສ້າງເສັ້ນທາງສາຍຍຸດທະສາດ ສຳຄັນຕ່າງໆຈຳນວນໜຶ່ງ.

ທ່ານ ຄໍາພັນ ສິດທິດໍາພາ ເລຂາພັກແຂວງ ເຈົ້າແຂວງໆວຽງຈັນ ຜູ້ໃໝ່ໄດ້ຂຶ້ນກ່າວຮັບໜ້າທີ່ຢ່າງສົມກຽດ ພ້ອມທັງໃຫ້ຄຳໝັ້ນສັນຍາວ່າ ຈະພ້ອມກັບໝູ່ຄະນະສືບຕໍ່ຊື້ນຳໆພາ ແລະ ພັດທະນາ ແຂວງວຽງຈັນ ໃຫ້ມີຄວາມຈະເລີນສີວິໄລ ຂຶ້ນເລື້ອຍໆ.

ໃນໂອກາດນີ້ ທ່ານ ພັນຄຳ ວິພາວັນ ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດ ແຫ່ງ ສປປ ລາວ ກໍ່ໄດ້ໃຫ້ກຽດໂອ້ລົມເຊິ່ງທ່ານໄດ້ເນັ້ນໜັກ ບາງບັນຫາເປັນຕົ້ນແມ່ນໃຫ້ບັນດາການນຳທຸກຂັ້ນພາຍໃນແຂວງ ສ້າງຄວາມເປັນເອກະພາບພາຍໃນ ໃຫ້ແໜ້ນແຟ້ນ ເພື່ອນຳພາແນວຄິດ ສະມາຊິກພັກ-ພະນັກງານ ແລະ ປະຊາຊົນບັນດາເຜົ່າ ໃຫ້ເຂົ້າໃຈຕໍ່ການຊັບຊ້ອນປ່ຽນແປງພະນັກງານ ການນຳໃນຄັ້ງນີ້, ສືບຕໍ່ປົກປັກຮັກສາຄວາມສາມັກຄີ ພາຍໃນພັກໃຫ້ໜັກແໜ້ນ ມີຄວາມເປັນເອກະພາບສູງ, ສືບຕໍ່ເປັນຫຼັກແຫຼ່ງ ເປັນຄັນທຸງ ແລະ ເປັນແກນນຳໃນການເຕົ້າໂຮມຄວາມສາມັກຄີ ໃນຖັນແຖວສະມາຊິກພັກ-ພະນັກງານ, ເພື່ອໃຫ້ການຮ່ວມມື ກັບການນຳຜູ້ໃໝ່ ເພື່ອພັດທະນາ ແຂວງວຽງຈັນ ໃຫ້ຈະເລີນກ້າວໜ້າ ຍິ່ງໆຂຶ້ນໄປ.