header

ຄະນະຜູ້ແທນເມືອງອານຊານ ສ ເກົາຫຼີ ຢ້ຽມຢາມ ແລະ ເຮັດວຽກຢູ່ແຂວງວຽງຈັນ.

ໃນວັນທີ 24 ເມສາ 2019 ນີ້, ທ່ານ ບຸນສອນ ເພັດລາວັນຄະນະປະຈໍາພັກແຂວງ, ຮອງເຈົ້າແຂວງໆວຽງຈັນ, ພ້ອມຄະນະ, ໄດ້ຕ້ອນຮັບການມາຢ້ຽມຢາມຂອງຄະນະຜູ້ແທນເມືອງອານຊານ ສາທາລະນະລັດເກົາຫຼີ ທີ່ມາເຮັດວຽກຢູ່ແຂວງວຽງຈັນ, , ເຊິ່ງນໍາໂດຍ ທ່ານ ຢຸນວາຊັບ ເຈົ້າເມືອງໆອານຊານ ສາທາລະນະລັດເກົາຫຼີ ພ້ອມຄະນະ.

ໃນໂອກາດທີ່ທ່ານພ້ອມຄະນະເດີ່ນ ທາງມາຢ້ຽມຢາມ ແລະ ເຮັດວຽກຢູ່ແຂວງວຽງຈັນ ສປປ ລາວ ໃນຄັ້ງນີ້ ທ່ານຮອງເຈົ້າແຂວງໆວຽງຈັນ ກໍ່ໄດ້ສະແດງຄວາມຍິນດີຕ້ອນຮັບຊົມເຊີຍ ແລະ ຕີລາຄາສູງຕໍ່ທ່ານ ຢຸນ ວາຊັບ ພ້ອມຄະນະທີ່ເດີ່ນທາງມາຢ້ຽມຢາມ ແລະ ເຮັດວຽກຢູ່ແຂວງວຽງຈັນ ສປປ ລາວ ໃນຄັ້ງນີ້, ພ້ອມທັງໄດ້ລາຍສະພາບການໂດຍຫຍໍ້ກ່ຽວກັບການພັດທະນາເສດຖະກິດ-ສັງຄົມ, ໂດຍລວມແລ້ວແມ່ນໄດ້ປະຕິບັດຕາມແຜນການທີ່ວາງໄວ້ໃນປີ 2018 ເຫັນວ່າອັດຕາການເຕີບໂຕຂອງ GDP ຂອງແຂວງເພີ່ມຂື້ນ 8,18% ທຽບໃສ່ມະຕິສະພາຮັບຮອງບັນລຸໄດ້ 97,38%, ສ້າງມູນຄ່າເພີ່ມໄດ້ 6,270 ຕື້ກີບ ລາຍຮັບສະເລ່ຍຕໍ່ຫົວຄົນໄດ້ 15,46 ລ້ານກີບ/ຄົນ/ປີ ຫຼື ເທົ່າກັບ 1,858 ໂດລາສະຫະລັດ ທຽບໃສ່ແຜນການບັນລຸໄດ້ 93,46% ແຜນການທີ່ວາງໄວ້ ຫຼື 1,981 ໂດລາ, ການມາຢ້ຽມຢາມຂອງຄະນະຜູ້ແທນດັ່ງກ່າວໄດ້ເປັນນິມິດໝາຍທີ່ສຳຄັນ ໃນການປະກອບສ່ວນເສີມຂະຫຍາຍສາຍພົວພັນຮ່ວມມື ແລະຊ່ວຍເຫຼືອເຊິ່ງກັນ ແລະ ກັນລະຫວ່າງແຂວງວຽງຈັນ ສປປ ລາວ ກັບ ເມືອງອານຊານ ສ ເກົາຫຼີ ທີ່ມີມາແຕ່ດົນນານແລ້ວນັ້ນໃຫ້ນັບມື້ເພີ່ມພູນຄູນສ້າງຍິ່ງໆຂຶ້ນ, ພ້ອມກັນນັ້ນທ່ານຮອງເຈົ້າແຂວງໆວຽງຈັນ, ຍັງໄດ້ອວຍພອນໃຫ້ມິດຕະພາບ ແລະ ຄວາມສາມັກຄີລະຫວ່າງປະຊາຊົນທັງສອງຊາດລາວ-ສ ເກົາຫຼີ ເວົ້າລວມເວົ້າສະເພາະແຂວງວຽງຈັນ ກັບເມືອງອານຊານຈົ່ງໝັ້ນຄົງທະນົງແກ່ນຕະຫຼອດໄປ, ທ່ານ ຢຸນ ວາຊັບ ກໍໄດ້ກ່າວສະແດງຄວາມຂອບໃຈຕໍ່ທ່ານຮອງເຈົ້າແຂວງໆວຽງຈັນ ທີ່ໄດ້ໃຫ້ການຕ້ອນຮັບຢ່າງອົບອຸ່ນ ແລະ ລາຍງານສະພາບການພັດທະນາເສດຖະກິດ-ສັງຄົມຂອງແຂວງໃຫ້ຄະນະຜູ້ແທນຮັບຊາບ.