header

ກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນແຂວງວຽງຈັນ

 ກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນແຂວງວຽງຈັນ ຊຸດທີ I ໄດ້ໄຂຂຶ້ນຢ່າງສະຫງ່າຜາເຜີຍ

ກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງວຽງຈັນ ຊຸດທີ I ໄດ້ໄຂຂຶ້ນຢ່າງເປັນທາງການໃນວັນທີ 29 ມັງກອນ 2019 ຜ່ານມານີ້ຢູ່ທີ່ສະໂມສອນໃຫຍ່ຂອງແຂວງ,ໂດຍການໃຫ້ກຽດເຂົ້າຮ່ວມຂອງ ທ່ານ ວິດົງ ໄຊຍະສອນ ກຳມະການສູນກາງພັກ,ເລຂາພັກແຂວງ,ເຈົ້າແຂວງໆວຽງຈັນ,ມີບັນດາຜູ້ນຳພັກ-ລັດ,ອາດີດການນຳ,ບັນດາສະມາຊິກສະພາແຫ່ງຊາດ,ນັກທຸລະກິດ ແລະ ສະມາຊິກສະພາປະຊາຊົນແຂວງວຽງຈັນ ເຂົ້າຮ່ວມຢ່າງພ້ອມພຽງ.

 

ທ່ານ ບຸນເພັງ ສາຍນໍລະດີ ຮອງເລຂາພັກແຂວງ ປະທານສະພາປະຊາຊົນແຂວງວຽງຈັນ,ທັງເປັນປະທານກອງປະຊຸມຄັ້ງນີ້ ໄດ້ກ່າວໃນໂອກາດກ່າວເປີດກອງປະຊຸມວ່າ: ກອງປະຊຸມຄັ້ງນີ້ ຈະໄດ້ສຸມໃສ່ພິຈາລະນາຮັບ ແລະ ຕົກລົງບັນດາບັນຫາສຳຄັນພຶ້ນຖານຂອງແຂວງຫຼາຍດ້ານ ເປັນຕົ້ນແມ່ນ: ບົດລາຍງານຂອງທ່ານຮອງເຈົ້າແຂວງກ່ຽວກັບການ ຈັດຕັ້ງປະຕິບັດແຜນພັດທະນາເສດຖະກິດ -ສັງຄົມ, ແຜນງົບປະມານແຫ່ງລັດຂອງແຂວງປະຈຳປີ 2018 ແລະ ທິດທາງແຜນການປີ 2019.

• ຈະໄດ້ຮັບຟັງການຊີ້ແຈງຂອງ 3 ພະແນກການກ່ຽວກັບບັນຫາທີ່ປະຊາຊົນໃຫ້ຄວາມສົນໃຈຫຼາຍ.

• ຈະໄດ້ຮັບຟັງການລາຍງານຂອງອົງການກວດສອບປະຈຳພາກກາງ ກ່ຽວກັບການຈັດຕັ້ງປະຕິບັດການເຄື່ອນໄຫວວຽກງານປະຈຳປີ 2018 ແລະ ທິດທາງປີ 2019.

• ບົດລາຍງານຜົນການກວດສອບບົດສະຫຼູບຂາດຕົວການຈັດຕັ້ງປະຕິບັດແຜນງົບປະມານແຫ່ງລັດປີ 2017 ຂອງແຂວງວຽງຈັນ ແລະ ຮັບຟັງການລາຍງານຂອງພະແນກກວດກາລັດກ່ຽວກັບການຈັດຕັ້ງປະຕິບັດການກວດກາຕາມຜົນຂອງການກວດສອບໃນປີຜ່ານມາຢູ່ແຂວງວຽງຈັນ.

• ຈະໄດ້ພິຈາລະນາແລະ ຮັບຮອງເອົາບົດລາຍງານການເຄື່ອນໄຫວວຽກງານປະຈຳປີ 2018 ແລະ ທິດທາງປີ 2019 ຂອງອົງການໄອຍະການປະຊາຊົນແຂວງ ແລະ ສານປະຊາຊົນແຂວງວຽງຈັນ.

• ພິຈາລະນາ ແລະ ຮັບຮອງເອົານິຕິກຳໃຕ້ກົດໝາຍ 2 ສະບັບ,ພິຈາລະນາ ແລະ ຮັບຮອງເອົາບົດລາຍງານການເຄື່ອນໄຫວວຽກງານປະຈຳປີ 2018 ແລະ ທິດທາງປີ 2019 ຂອງສະພາປະຊາຊົນແຂວງວຽງຈັນຊຸດທີI.

ກອງປະຊຸມຄັ້ງນີ້ ແມ່ນມີຄວາມໝາຍສຳຄັນໃນການກຳນົດທິດທາງແຜນພັດທະ ນາເສດຖະກິດ-ສັງຄົມ ປະຈຳປີ 2019 ຂອງແຂວງວຽງຈັນ. ສະນັ້ນ,ປະທານກອງປະຊຸມ ຈຶ່ງໄດ້ຮຽກຮ້ອງໃຫ້ບັນດາທ່ານສະມາຊິກສະພາປະຊາຊົນແຂວງວຽງຈັນ ຈົ່ງໄດ້ຍົກສູງຄວາມຮັບຜິດຊອບການເມືອງຂອງຕົນ, ສຸມທຸກສະຕິປັນຍາເຂົ້າໃນການປະກອບຄຳເຫັນ ຕໍ່ບັນດາເນື້ອໃນທີ່ນຳມາພິຈາລະນາຢູ່ໃນກອງປະຊຸມຄັ້ງນີ້ຢ່າງມີຈຸດສຸມ,ມີເຫດຜົນ ແລະ ຮັບປະກັນຄວາມຖືກຕ້ອງ,ສອດຄ່ອງກັບບັນດາແນວທາງນະໂຍບາຍຂອງພັກ,ລັດຖະທຳມະນູນ,ກົດໝາຍ ແລະ ສະ ພາບຄວາມເປັນຈິງແຫ່ງການພັດທະນາເສດຖະກິດ-ສັງຄົມໃນໄລຍະໄໝ່.

ກອງປະຊຸມສະໄໝສາມັນເທື່ອທີ 6 ຂອງສະພາປະຊາຊົນແຂວງວຽງຈັນຊຸດທີ I ຈະໄດ້ດຳເນີນໄປເປັນເວລາ 3 ວັນຄື: ວັນທີ 29 – 31 ມັງກອນ 2019 ຈຶ່ງຈະສຳເລັດ.