header

ການນຳແຂວງວຽງຈັນ ວາງກະຕ່າດອກໄມ້ ຢູ່ອານຸສອນສະຖານ ປະທານ ໄກສອນ ພົມວິຫານ

ການນຳແຂວງວຽງຈັນ ວາງກະຕ່າດອກໄມ້ຢູ່ອານຸສອນສະຖານປະທານໄກສອນ ພົມວິຫານ ເນື່ອງໃນໂອກາດວັນສ້າງຕັ້ງກອງທັບ ປະຊາຊົນລາວ ຄົບຮອບ 70 ປີ.

ເພື່ອສະແດງຄວາມຮູ້ບຸນຄຸນຕໍ່ທ່ານ ປະທານ ໄກສອນ ພົມວິຫານ ວິລະບູລຸດອັນແສນເຄົາລົບຮັກຂອງປະຊາຊົນລາວ ບັນດາເຜົ່າ ແລະ ພະນັກງານ-ນັກຮົບປະຕິວັດຜູ້ເສຍສະຫຼະຊີວິດເລືອດເນື້ອເຂົ້າໃນຂະບວນການ ຕໍ່ສູ້ກູ້ຊາດຍາດເອົາເອກະລາດສັນຕິພາບ ແລະ ຜືນ ແຜ່ນດິນອັນຄົບຖ້ວນມາສູ່ປວງຊົນລາວທັງຊາດ, ໃນຕອນເຊົ້າວັນທີ 22 ມັງກອນ 2019 ນີ້, ການນຳແຂວງວຽງຈັນ, ນຳໂດຍທ່ານ ວີດົງ ໄຊຍະສອນ ກຳມະການສູນກາງພັກ ເລຂາພັກແຂວງ ເຈົ້າແຂວງໆວຽງຈັນ ພ້ອມດ້ວຍຄະນະ ໄດ້ເຂົ້າວາງກະຕ່າດອກໄມ້ຢູ່ຕໍ່ໜ້າຮູບຫຼໍ່ຂອງທ່ານປະທານ ໄກສອນ ພົມວິຫານ ແລະ ວາງພວງມາລາທີ່ອະນຸສາວະລີນັກຮົບນິລະນາມ(ທະຫານແຂວງ), ການເຂົ້າວາງກະຕ່າດອກໄມ້ ແລະ ວາງພວງມາລາຂອງການນຳແຂວງວຽງຈັນ ຄັ້ງນີ້ແມ່ນເພື່ອລະນຶກເຖິງຄຸນງາມຄວາມດີ ຂອງບັນດານັກຮົບປະຕິວັດ, ພະນັກງານ-ນັກຮົບ ລວມໄປເຖິງພໍ່ແມ່ປະຊາຊົນລາວບັນດາເຜົ່າຜູ້ທີ່ໄດ້ເສຍສະຫຼະເລືອດເນື້ອໃນຂະບວນການຕໍ່ສູ້ກູ້ຊາດ ກັບພວກລ່າເມືອງຂຶ້ນແບບເກົ່າ ແລະ ໃໝ່ ໂດຍສະເພາະແມ່ນປະທານ ໄກສອນ ພົມວິຫານ ພ້ອມບັນດາການນໍາໄດ້ເອົາໃຈໃສ່ໃນການປຸກລະດົມປະຊາຊົນລາວ ບັນດາເຜົ່າພາຍໃຕ້ຄັນທຸງຂອງພັກປະຊາຊົນປະຕິວັດລາວ ຈົນສາມາດໄດ້ຮັບໄຊຊະນະຄັ້ງຍິ່ງ ໃຫຍ່ໃນວັນທີ 2 ທັນວາ 1975, ໃນໂອກາດວັນສ້າງຕັ້ງກອງທັບ ປະຊາຊົນລາວຄົບຮອບ 70 ປີ. ຄະນະນໍາແຂວງວຽງຈັນທຸກ ພາກສ່ວນຂໍຈົດຈຳເອົາທຸກຄຳສອນ ແລະ ຂໍສືບຕໍ່ຄົ້ນຄ້ວາ, ຊອກຮູ້ຮໍ່າຮຽນເອົາແບບຢ່າງຄຸນສົມບັດສິນທຳປະຕິວັດ ແລະ ແບບແຜນວິທີນໍາພາເຮັດວຽກຂອງປະທານ ໄກສອນ ພົມວິຫານເພື່ອເປັນເຂັມຊີ້ທິດໃນການວາງແນວທາງຂອງພັກ, ກົດໝາຍຂອງລັດໃຫ້ຖືກຕ້ອງ ເພື່ອສືບຕໍ່ນຳພາພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຕາມແນວທາງປ່ຽນແປງໃໝ່ຂອງພັກຢ່າງໜັກ ແໜ້ນ.

ໃນໂອກາດດັ່ງກ່າວ ທ່ານ ວີດົງ ໄຊຍະສອນ ກຳມະການສູນກາງພັກ ເລຂາພັກແຂວງ ເຈົ້າແຂວງໆວຽງຈັນ ໄດ້ຕາງໜ້າໃຫ້ຄະນະນຳຂອງແຂວງ ຂື້ນອວຍພອນໃຫ້ຄະນະພັກ-ຄະນະບັນຊາ, ນາຍ ແລະ ພົນທະຫານ ທົ່ວກຳລັງປະກອບອາວຸດທ້ອງຖິ່ນແຂວງວຽງຈັນ ຈົ່ງມີສຸຂະພາບແຂງແຮງ, ມີຄວາມຜາສຸກໃນຊີວິດສວ່ນຕົວ ແລະ ຄອບຄົວ, ມີຄວາມສຳເລັດ ໃນໜ້າທີ່ວຽກງານທຸກປະການ, ພ້ອມກັນສ້າງກອງທັບປະຊາຊົນລາວ, ເວົ້າລວມ ເວົ້າສະເພາະແມ່ນທະທະຫານທ້ອງຖິ່ນແຂວງວຽງຈັນ ໃຫ້ກາຍເປັນກອງທັບປະຕິວັດ ມີແບບແຜນທັນສະໄໝ, ມີລະບຽບວິໃນເຂັ້ມງວດ ເປັນກຳລັງຫຼັກແຫຼ່ງໃນພາລະກິດປ້ອງກັນຊາດ-ປ້ອງກັນຄວາມສະຫງົບ, ເປັນເສົາຄ້ຳໃຫ້ແກ່ປະເທດຊາດ ກໍ່ຄືແຂວງວຽງຈັນ ໃຫ້ມີຄວາມສະຫງົບເປັນຫຼັກຮົ້ວອັນແໜ້ນແກ່ນໃຫ້ປະຊາຊົນ ປະກອບສ່ວນຢ່າງຕັ້ງໜ້າເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃຫ້ຈະເລີນຮຸ່ງເຮື່ອງສີວິໄລ, ທັງສືບຕໍ່ປົກປັກຮັກສາມູນເຊື້ອອັນດີງາມຂອງກອງທັບໄວ້ໃຫ້ໝັ້ນຄົງຕະຫຼອດໄປ, ໃນໂອກາດດັ່ງທ່ານ ພົນຈັດຕະວາ ບຸນມາ ວົງດາແສນ ກຳມະການພັກແຂວງ ຫົວໜ້າການເມືອງ ກອງບັາຊາການທະຫານແຂວງວຽງຈັນ, ຕາງໜ້າໃຫ້ຄະນະພັກ-ຄະນະບັນຊາ, ນາຍ ແລະ ພົນທະຫານ ຖືໂອກາດອັນມີຄວາມໝາຍ ຄວາມສຳຄັນນີ້ ກ່າວສະແດງຄວາມຂອບອົກຂອບໃຈ ແລະ ຮູ້ບຸນຄນຢ່າງລົ້ນເຫຼືອ ແລະ ອວຍພອນໄຊອັນປະເສີດມາຍັງຄະນະນຳຂອງແຂວງ, ບັນດາພະແນການ, ບໍລິສັດ, ຫ້າງຮ້ານອ້ອມຂ້າງແຂວງ ທີ່ໄດ້ນຳເອົາກະຕ່າຂອງຂວັນ ແລະ ຄຳອວຍພອນມາອວຍພອນໃນຄັ້ງນີ້, ພ້ອມທັງໄດ້ອວຍພອນໃຫ້ທຸກພາກສ່ວນຈົ່ງມີສຸຂະພາບແຂງແຮງ ມີຄວາມສຸກ ຄວາມຈະເລີນໃນໜ້າທີ່ການງານ, ສືບຕໍ່ຊີ້ນຳ-ນຳພາພັດທະນາແຂວງວຽງຈັນ ໃຫ້ຈະເລີນກ້າວໜ້າຂື້ນເລື່ອຍໆ.