header

ເມືອງເກົ່າໄຜ່ໜາມ ລືນາມອ່າງນ້ຳງື່ມ ຕຳນານເດີມລາຍງ້າວ ອູ່ເຂົ້າຊາວເມືອງ ຄົນເຮືອງຂັບງື່ມ ດື່ມດຳທຳມະຊາດ ປະຊາລາດສາມັກຄີ

ແຂວງວຽງຈັນ ເປີດຊຸດຝຶກອົບຮົມວຽກງານກໍ່ສ້າງຮາກຖານການເມືອງ ແລະ ວຽກງານ 3 ສ້າງ ຊຸດທີ 2

 

ໃນລະຫວ່າງວັນທີ 9-11 ມັງກອນ 2018 ແຂວງວຽງຈັນໄດ້ເປີດຊຸດຝຶກອົບຮົມວຽກງານກໍ່ສ້າງຮາກຖານການເມືອງ ແລະ ວຽກງານ 3 ສ້າງຂຶ້ນຢູ່ທີ່ຫ້ອງວ່າການປົກຄອງ ແຂວງວຽງຈັນ.

ໂດຍພາຍໃຕ້ການເປັນປະທານຂອງທ່ານ ວິດົງ ໄຊຍະສອນ ກຳມະການສູນກາງພັກ ເລຂາພັກແຂວງ ເຈົ້າແຂວງໆວຽງຈັນ, ເຂົ້າຮ່ວມມີບັນດາຄະນະຊີ້ນຳລົງກໍ່ສ້າງຮາກຖານການເມືອງ ແລະ ວຽກງານ 3 ສ້າງ 4 ຈຸດສຸມຂອງແຂວງ, ມີນັກສຳມະນາກອນຈາກພະແນກການ, ອົງການ ຂອງແຂວງ ແລະ ເມືອງຜູ້ທີ່ກະກຽມລົງກໍ່ສ້າງຮາກຖານການເມືອງ ແລະ ວຽກງານ 3 ສ້າງເຂົ້າຮ່ວມ.

ທ່ານ ວິດົງ ໄຊຍະສອນ ກຳມະການສູນກາງພັກ ເລຂາພັກແຂວງ ເຈົ້າແຂວງໆວຽງຈັນກ່າວວ່າ: ເພື່ອເປັນການສືບຕໍ່ຈັດຕັ້ງຜັນຂະຫຍາຍບັນດາມະຕິຄຳສັ່ງ ແລະ ແຜນພັດທະນາເສດຖະກິດ-ສັງຄົມຂອງແຂວງ ແລະ ສ້າງຄວາມເປັນເອກະພາບທາງດ້ານເນື້ອໃນ, ບາດກ້າວຂັ້ນຕອນຕ່າງໆໃຫ້ແກ່ພະນັກງານທີ່ຈະລົງເຮັດວຽກກໍ່ສ້າງຮາກຖານການເມືອງພັດທະນາຊົນນະບົດຮອບດ້ານ ແລະ ວຽກງານ 3 ສ້າງຢູ່ທ້ອງຖິ່ນ ແລະ ເພື່ອເປັນການປະຕິບັດວຽກງານກໍຄືການສ້າງບ້ານໃຫຍ່ໃຫ້ກາຍເປັນຕົວເມືອງນ້ອຍຢູ່ຊົນນະບົດໃຫ້ໄດ້ຮັບຫມາກຜົນ ແລະ ເປັນຮູບປະທຳ ແລະ ສາມາດປະຕິບັດແຜນພັດທະນາດ້ານຕ່າງໆໃຫ້ໄດ້ຕາມລະດັບຄາດຫມາຍທີ່ວາງໄວ້ໂດຍສະເພາະກໍແມ່ນການລຶບລ້າງຄວາມທຸກຍາກ ແລະ ນຳພາປະເທດຊາດຫລຸດພົ້ນອອກຈາກຄວາມດ້ອຍພັດທະນາໃຫ້ໄດ້ໃນປີ 2020.

ການຝຶກອົບຮົມຊຸດນີ້ຈະໄດ້ດຳເນີນເປັນເວລາ 3 ວັນ ໃນນີ້ຈະໄດ້ພ້ອມກັນຄົ້ນຄວ້າຮ່ຳຮຽເອກະສານ ເລກທີ 01/ ກມ ສພ ວ່າດ້ວຍການເພີ່ມທະວີການກໍ່ສ້າງຫນ່ວຍພັກປອດໃສ, ເຂັ້ມແຂງ, ຫນັກແຫນ້ນ, ຄຳສັ່ງຂອງນາຍົກລັດຖະມົນຕີ ເລກທີ 34/ນຍ ລົງວັນທີ 23 ສິງຫາ 2016 ວ່າດ້ວຍ ທິດທາງ, ເປົ້າຫມາຍ ແລະ ມາດຕະການສ້າງແຂວງເປັນຫົວຫນ່ວຍຍຸດທະສາດ, ສ້າງເມືອງເປັນຫົວຫນ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວຫນ່ວຍພັດທະນາ, ເອກະສານຂໍ້ຕົກລົງ ເລກທີ 969/ພນ ລົງວັນທີ 26/12/2016 ວ່າດ້ວຍມາດຕະຖານບ້ານຫນັກແຫນ້ນເຂັ້ມແຂງ ແລະ ກົດຫມາຍວ່າດ້ວຍການປົກຄອງທ້ອງຖິ່ນ, ດຳລັດ 348/ລບ ວ່າດ້ວຍ ມາດຕະຖານພົ້ນທຸກ ແລະ ມາດຕະຖານການພັດທະນາ, ເອກະສານບາດກ້າວ ແລະ ວິທີການປະເມີນຄອບຄົວ ແລະ ບ້ານປ້ອງກັນຊາດເຂັ້ມແຂງ, ເອກະສານ ມາດຕະຖານຂໍ້ແຂ່ງຂັນສ້າງຄອບຄົວປ້ອງກັນຊາດເຂັ້ມແຂງ, ເອກະສານ ຂໍ້ຕົກລົງ ເລກທີ 818/ ປກສ ວ່າດ້ວຍ ການສ້າງຄອບຄົວ ແລະ ບ້ານປ້ອງກັນຄວາມສະຫງົບດີ ແລະ ເອກະສານຕ່າງໆທີ່ກ່ຽວຂ້ອງຕື່ມອີກ.ທັງນີ້ກໍເພື່ອແນ່ໃສ່ເຮັດໃຫ້ການຈັດຕັ້ງປະຕິບັດວຽກງານດັ່ງກ່າວໃຫ້ໄປໃນລວງດຽວກັນສາມາດໄດ້ຮັບຜົນສຳເລັດຕາມລະດັບຄາດຫມາຍທີ່ວາງໄວ້.