header

ເມືອງເກົ່າໄຜ່ໜາມ ລືນາມອ່າງນ້ຳງື່ມ ຕຳນານເດີມລາຍງ້າວ ອູ່ເຂົ້າຊາວເມືອງ ຄົນເຮືອງຂັບງື່ມ ດື່ມດຳທຳມະຊາດ ປະຊາລາດສາມັກຄີ

ແຂວງວຽງຈັນ ປາຖະກະຖາ ວັນຕ້ານການສໍ້ລາດບັງຫຼວງສາກົນ ຄົບຮອບ 14 ປີ

ໃນວັນທີ 20 ກຸມພາ 2018 ຜ່ານມານີ້ ແຂວງວຽງຈັນໄດ້ປາຖະກະຖາ ວັນຕ້ານການສໍ້ລາດບັງຫຼວງສາກົນຄົບຮອບ 14 ປີ ຄືວັນທີ 9 ທັນວາ 2003 ຫາ ວັນທີ 9 ທັນວາ 2017 ຢູ່ທີ່ສະໂມສອນໃຫຍ່ຂອງແຂວງ ໂດຍການເປັນປະທານຂອງ ທ່ານ ວີດົງ ໄຊຍະສອນ ກຳມະການສູນກາງພັກ, ເລຂາພັກແຂວງ ເຈົ້າແຂວງໆວຽງຈັນ, ເຊິ່ງມີບັນດາຄະນະປະຈຳ, ກຳມະການພັກແຂວງ, ພະແນກການ, ອົງການ, ກົມກອງອ້ອມຂ້າງແຂວງເຂົ້າຮ່ວມ

ໃຫ້ກຽດຂຶ້ນປະຖະກະຖາວັນດັ່ງກ່າວ ໂດຍແມ່ນທ່ານ ວິນັດ ສີສຸວົງ ຄະນະປະຈຳພັກແຂວງ, ປະທານກວດກາພັກ, ຫົວໜ້າພະແນກກວດກາລັດແຂວງວຽງຈັນ ເຊິ່ງທ່ານໄດ້ຍົກໃຫ້ເຫັນເຖິງສະພາບລວມຂອງການສໍ້ລາດບັງຫຼວງ ແລະ ການກຳນົດວັນຕ້ານການສໍ້ລາດບັງຫຼວງສາກົນ, ການສະກັດກັ້ນ ແລະ ຕ້ານການສໍ້ລາດບັງຫຼວງ ຢູ່ສາທາລະນະລັດ ປະຊາທິປະໄຕ ປະຊາຊົນລາວ. ການສໍ້ລາດບັງຫຼວງ ແມ່ນສະພາບປະກົດການຫຍໍ້ທໍ້ໜຶ່ງໃນກົງຈັກການຈັດຕັ້ງ, ເປັນໄພອັນຕະລາຍຮ້າຍແຮງ, ຊຶ່ງສົ່ງຜົນກະທົບ ແລະ ໜັກໜ່ວງຖ່ວງດຶງເຖິງການພັດທະນາ ເສດຖະກິດ-ສັງຄົມຂອງແຕ່ລະປະເທດໃນໂລກ, ການສໍ້ລາດບັງຫຼວງພວມເປັນໄພຂົ່ມຂູ່ເຖິງຄວາມມີສະຖຽນລະພາບທາງດ້ານການເມືອງ ຂອງການຈັດຕັ້ງທັງພັກ-ລັດ ແລະ ເອກະຊົນ,​ ສ້າງໃຫ້ເກີດມີຄວາມບໍ່ສະຫງົບ, ຄວາມບໍ່ຍຸດຕິທຳໃນສັງຄົມ ເປັນການບັນທອນກຳລັງແຮງ ກໍ່ຄືຄວາມເຊື່ອໝັ້ນ ແລະ ຄ່ານິຍົມຂອງສັງຄົມ ຕໍ່ສະຖາບັນການປົກຄອງ. ຍ້ອນເຫັນໄດ້ຜົນຮ້າຍ ແລະ ໄພອັນຕະລາຍຂອງການສໍ້ລາດບັງຫຼວງຄືດັ່ງກ່າວ ກອງປະຊຸມສະມັດຊາໃຫຍ່ສະຫະປະຊາຊາດ ໃນປີ 2003 ໄດ້ອອກຍັດຕິເລກທີ 58/4 ໂດຍກຳນົດເອົາວັນທີ 9 ທັນວາ ຂອງທຸກໆປີ ເປັນວັນຕ້ານການສໍ້ລາດບັງຫຼວງສາກົນ.

ທ່ານ ວິນັດ ສີສຸວົງ ຄະນະປະຈຳພັກແຂວງ, ປະທານກວດກາພັກ, ຫົວໜ້າພະແນກກວດກາລັດ ແຂວງວຽງຈັນ ຍັງໄດ້ລາຍງານໃຫ້ຮູ້ຕື່ມອີກວ່າ: ສຳລັບຢູ່ແຂວງວຽງຈັນໃນ 1 ປີຜ່ານມາ ໄດ້ເອົາໃຈໃສ່ໃນການຕິດຕາມກວດກາບັນດາປະກົດການຫຍໍ້ທໍ້ຕ່າງໆທີ່ເກີດຂຶ້ນ ເຊິ່ງເປັນໜໍ່ແໜງໃນການສໍ້ລາດບັງຫຼວງເຊັ້ນ: ການຈ່າຍເງິນເດືອນ, ເງິນອຸດໜູນທີ່ບໍ່ຖືກຕ້ອງຕາມຕົວຈິງ ໃຫ້ແກ່ພະນັກງານຢູ່ບັນດາເມືອງ, ການເບີກຈ່າຍເງິນງົບປະມານ ເຂົ້າໃນການກໍ່ສ້າງພື້ນຖານໂຄງລ່າງຂອງແຂວງ ເກີນສາລະບານງົບປະມານທີ່ໄດ້ກຳນົດໄວ້, ການອ່ວຍໜີ້ 3 ແຈ ແລະ ບັນຫາອື່ນໆ ອັນໄດ້ເຮັດໃຫ້ງົບປະມານຂອງລັດເສຍຫາຍເປັນຈໍານວຍລາຍພໍສົມຄວນ ມາຮອດປະຈຸບັນທາງພາກສ່ວນທີ່ກ່ຽວຂ້ອງ ກໍ່ໄດ້ເອົາໃຈໃສ່ຕິດຕາມແກ້ໄຂ ແລະ ກຳລັງສືບຕໍ່ແກ້ໄຂຕາມລະບຽບກົດໝາຍທີ່ໄດ້ກຳນົດອອກ.