header

ແຂວງວຽງຈັນ, ສປປ ລາວ ແລະ ແຂວງອຽນບ້າຍ ສສ ຫວຽດນາມ ຮ່ວມກັນສະເຫຼີມສະຫຼອງວັນສ້າງຕັ້ງສາຍພົວພັນຮ່ວມມື ຄົບຮອບ 10 ປີ ( 2008-2018)

ໃນຕອນເຊົ້າຂອງວັນທີ 4 ກໍລະກົດ 2018 ຢູ່ທີ່ສະໂມສອນຫ້ອງວ່າການປົກຄອງແຂວງວຽງຈັນ ໄດ້ຈັດພິທີພົບປະເຈລະຈາ ແລະ ເຊັນບົດບັນທຶກການຮ່ວມືລະຫວ່າງ ແຂວງວຽງຈັນ ສປປ ລາວ ແລະ ແຂວງອຽນບ້າຍ ສສ ຫວຽດນາມ ປີ 2018 ໃຫ້ກຽດເຂົ້າຮ່ວມໂດຍ ສະຫາຍ ວີດົງ ໄຊຍະສອນ ກຳມະການສູນກາງພັກ ເລຂາພັກແຂວງເຈົ້າແຂວງໆວຽງຈັນ, ມີສະຫາຍ ໂດ ດຶກ ຢຸຍ ຮອງເລຂາພັກແຂວງ-ເຈົ້າແຂວງໆອຽນບ້າຍ, ມີບັນດາທ່ານຄະນະປະຈຳພັກແຂວງ, ກຳມະການພັກແຂວງ ແລະ ພະນັກງານທີ່ກ່ຽວຂ້ອງທັງສອງຝ່າຍເຂົ້າຮ່ວມ.

ໃນໂອກາດພົບປະຄັ້ງນີ້, ທ່ານເຈົ້າແຂວງໆວຽງຈັນໄດ້ສະແດງຄວາມຍິນດີຕ້ອນຮັບ ແລະ ຂອບໃຈຕໍ່ຄະນະຜູ້ແທນແຂວງອຽນບ້າຍ ເຊິ່ງນຳໂດຍ ສະຫາຍ ໂດ ດຶກ ຢຸຍ ຮອງເລຂາພັກແຂວງ-ເຈົ້າແຂວງໆອຽນບ້າຍ ສສ ຫວຽດນາມ ທີ່ໄດ້ເສຍສະຫຼະເວລາເດີນທາງມາຢ້ຽມຢາມ ແລະ ເຮັດວຽກຢູ່ແຂວງວຽງຈັນຢ່າງເປັນທາງການ, ນັ້ນສະແດງໃຫ້ເຫັນເຖິງ ສາຍພົວພັນການຮ່ວມມື, ສາມັກຄີແບບພິເສດຮອບດ້ານຂອງສອງປະເທດ ທີ່ມີມາດົນນານ ໄດ້ຮັບການສືບຕໍ່ເສີມຂະຫຍາຍຢ່າງບໍ່ຢຸດຢັ້ງ ແລະ ມີໝາກຜົນຕົວຈິງນັບມື້ນັບຫຼາຍຂຶ້ນ, ພິເສດການໄປມາຫາສູ່ຂອງການນໍາຂັ້ນສູງ ຂອງສອງແຂວງນັບມື້ນັບຫຼາຍຂຶ້ນ ເປັນໄລຍະ 10 ປີຜ່ານມາ ນັບມື້ໄດ້ຮັບການພັດທະນາ, ຫັນໄປສູ່ລວງເລິກ, ແທດເໝາະກັບສະພາບເງື່ອນໄຂຄວາມເປັນຈິງຂອງແຕ່ລະແຂວງ ແລະ ມີປະສິດທິຜົນດີຂອງການຮ່ວມມືການເຄື່ອນໄຫວໃນຫຼາຍຂົງເຂດວຽກງານ.

ເນື້ອໃນສຳຄັນຂອງບົດບັນທຶກການຮ່ວມມືທີ່ເຊັນກັນແມ່ນສຸມໃສ່ວຽກງານພັດທະນາການສຶກສາ-ກໍ່ສ້າງ, ສາທາລະນະສຸກ, ກະສິກຳ ແລະ ພັດທະນາຊົນນະບົດ, ພັດທະນາເສດຖະກິດ, ເອົາໃຈໃສ່ກໍ່ສ້າງ-ຍົກລະດັບກຳລັງແຮງ ໃຫ້ແກ່ສະມາຊິກ-ພະນັກງານ ຂອງບັນດາກົມກອງຕ່າງໆ ເພີ່ມທະວີໃນການຈັດຕັ້ງ, ແລກປ່ຽນຄະນະຜູ້ແທນຂອງສອງແຂວງ ແລະ ໃນໂອກາດດຽວກັນແຂວງອຽນບ້າຍ ກໍ່ໄດ້ມອບເຄື່ອງຄອມພິວເຕີຕັ້ງໂຕະ ຈຳນວນ 20 ຊຸດໃຫ້ແກ່ໂຮງຮຽນມັດທະຍົມຕອນປາຍ ຂອງແຂວງວຽງຈັນ ເພື່ອນຳໃຊ້ເຂົ້າໃນການສຶກສາ.

ໃນຕອນບ່າຍຂອງວັນດຽວກັນ ຄະນະຜູ້ແທນການນຳຂັ້ນສູງ ພ້ອມດ້ວຍຄະນະ ໄດ້ເຂົ້າຮ່ວມພິທີສະເຫຼີມສະຫຼອງວັນສ້າງຕັ້ງສາຍພົວພັນການຮ່ວມມືລະຫວ່າງແຂວງວຽງຈັນ ກັບ ແຂວງອຽນບ້າຍ ຄົບຮອບ 10 ປີຢ່າງເປັນຂະບວນຟົດຟື້ນ ຢູ່ທີ່ສະໂມສອນຫ້ອງວ່າການປົກຄອງແຂວງວຽງຈັນ.