header

ເມືອງເກົ່າໄຜ່ໜາມ ລືນາມອ່າງນ້ຳງື່ມ ຕຳນານເດີມລາຍງ້າວ ອູ່ເຂົ້າຊາວເມືອງ ຄົນເຮືອງຂັບງື່ມ ດື່ມດຳທຳມະຊາດ ປະຊາລາດສາມັກຄີ

ແຂວງວຽງຈັນເປີດປີທ່ອງທ່ຽວ 2018 ຢ່າງເປັນທາງການ

ແຂວງວຽງຈັນ ໄດ້ເປີດປີທ່ອງທ່ຽວ 2018 ຢ່າງເປັນທາງການ ໃນວັນທີ 21 ທັນວາ ທີ່ຜ່ານມານີ້ ເຊິ່ງງານດັ່ງກ່າວ ໄດ້ຈັດຂຶ້ນພ້ອມກັບງານບຸນກິນຈຽງ ຂອງເຜົ່າມົ້ງຫຼັກ 52 ທີ່ເມືອງໂພນໂຮງໂດຍມີ ທ່ານ ອຸ່ນທວງຂາວພັນ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ທ່ານ ນ.ສິງຄຳ ຄົງສະຫວັນຮອງເຈົ້າແຂວງໆວຽງຈັນ ທ່ານ ຄຳຟອງ ບົວທອງ ຫົວໜ້າພະແນກ ຖວທ ແຂວງ, ທ່ານ ນ. ອິ່ນຄຳ ພັນດາລາ ເຈົ້າເມືອງໆໂພນໂຮງ ມີບັນດາແຂກ ແລະ ມວນຊົນເຂົ້າຊົມຢ່າງຫຼວງຫຼາຍ.

ທ່ານ ນ.ສິງຄຳ ຄົງສະຫວັນ ຮອງເຈົ້າແຂວງໆວຽງຈັນ ໄດ້ກ່າວເປີດປີທ່ອງທ່ຽວລາວ 2018 ຂອງແຂວງວຽງຈັນ ບາງຕອນສຳຄັນວ່າ: ການເປີດປີທ່ອງທ່ຽວ 2018 ເປັນເຫດການສຳຄັນ ທີ່ສະແດງໃຫ້ເຫັນວ່າທົ່ວສັງຄົມລາວ ມີຄວາມພ້ອມພຽງຮຽງໜ້າ ໃນການເປັນເຈົ້າພາບທີ່ດີ ເພື່ອຕ້ອນຮັບນັກທ່ອງທ່ຽວທີ່ມາຈາກທັງພາຍໃນ ແລະ ຕ່າງປະເທດ ຖືເອົາການເປັນປີທ່ອງທ່ຽວ ເປັນການເປີດກວ້າງການພັດທະນາຮອບດ້ານ ແລະ ເຊື່ອມໂຍງຂອງທຸກຂະແໜງການໃນທົ່ວປະເທດ ເພື່ອຍົກສູງກຳລັງແຮງສັງລວມຂອງຊາດ ໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງຊາດ ດ້ວຍການພະຍາຍາມດຶງດູດໃຫ້ນັກທ່ອງທ່ຽວ ເຂົ້າມາທ່ຽວຊົມ ແລະ ສ້າງລາຍຮັບໃນແຂວງວຽງຈັນ ໃຫ້ນັບມື້ຫຼາຍຂຶ້ນ.

ທ່ານຮອງເຈົ້າແຂວງ ຍັງໄດ້ຮຽກຮ້ອງ ໃຫ້ປະຊາຊົນລາວບັນດາເຜົ່າ ເຂົ້າຮ່ວມການຜະລິດ, ການສະໜອງ ແລະການບໍລິການຕ່າງໆ ໃຫ້ແກ່ນັກທ່ອງທ່ຽວດ້ວຍຮອຍຍິ້ມ ແລະ ສຽງຫົວຂອງປະຊາຊົນລາວ, ຮ່ວມກັບການເປັນເຈົ້າພາບທີ່ດີ ປະກອບສ່ວນ ເຂົ້າໃນການປ້ອງກັນຄວາມສະຫງົບ ເຮັດໃຫ້ນັກທ່ອງທ່ຽວມາທ່ຽວດ້ວຍຄວາມເບີກບານມ່ວນຊື່ນ ແລະ ສະບາຍໃຈຄືກັນກັບຢູ່ບ້ານຂອງເພິ່ນເອງ.

ດ້ານທ່ານ ນ.ອິ່ນຄຳ ພັນດາລາ ເຈົ້າເມືອງໆໂພນໂຮງ ໃນນາມເປັນເຈົ້າພາບ ຮ່ວມກັບພະແນກຖະແຫຼງຂ່າວ,ວັດທະນະທຳ ແລະ ທ່ອງທ່ຽວແຂວງ ໄດ້ກ່າວວ່າ: ວຽກງານທ່ອງທ່ຽວ ເປັນຂະແໜງການໜຶ່ງ ທີ່ສ້າງລາຍຮັບ ໃຫ້ສັງຄົມໄດ້ດີສົມຄວນ, ເວົ້າສະເພາະຢູ່ແຂວງວຽງຈັນໃນປີ 2015 ມີນັກທ່ອງທ່ຽວ ເຂົ້າມາທ່ຽວໃນແຂວງວຽງຈັນ560.000 ກວ່າຄົນ ສາມາດສ້າງລາຍຮັບໃຫ້ສັງຄົມ 190 ຕື້ກວ່າກີບ ພາຍຫຼັງເປີດປີທ່ອງທ່ຽວຮອດ 2020 ຄາດວ່າຈະມີນັກທ່ອງທ່ຽວເຂົ້າມາທ່ຽວຊົມແຂວງວຽງຈັນ ເກືອບ 800.000 ຄົນ ຈະສ້າງລາຍຮັບໄດ້ 246 ຕື້ກີບ, ພ້ອມນີ້ແຂວງ ຍັງໄດ້ກຽມກົນໄກໃນການຊຸກດັນ ໃຫ້ວຽກທ່ອງທ່ຽວມີຜົນສຳເລັດຄື: ຊຸກຍູ້ການຈັດຕັ້ງປະຕິບັດນິຕິກຳ ກ່ຽວກັບວຽກທ່ອງທ່ຽວ ໃຫ້ຖືກຈັດຕັ້ງປະຕິບັດ, ສຸມໃສ່ພັດທະນາສິ່ງອຳນວຍຄວາມສະດວກຕ່າງໆ ເພື່ອຮອງຮັບນັກທ່ອງທ່ຽວໃຫ້ໄດ້ເກືອບ 700.000 ຄົນ ໃນປີ 2018, ສ້າງຈິດສຳນຶກໃຫ້ແກ່ສັງຄົມໃຫ້ເຫັນໄດ້ຄວາມສຳຄັນຂອງວຽກງານທ່ອງທ່ຽວ ສົ່ງເສີມທຸລະກິດຂະໜາດນ້ອຍ ແລະ ຂະໜາດກາງດ້ານທ່ອງທ່ຽວ ໃຫ່ມີຄຸນນະພາບ ແລະ ອື່ນໆອີກ.

ສຳລັບກິດຈະກຳປີທ່ອງທ່ຽວ 2018 ຂອງແຂວງວຽງຈັນ ມີບຸນແຫ່ຜາສາດເງິນ ເມືອງແກ້ວອຸດົມ, ບຸນພະທາດດອນແກ້ວ ບຸນກິນຈຽງເຜົ່າມົ້ງ ຫຼັກ 52 ເມືອງໂພນໂຮງ ບຸນພຣະເຫວດ ພຣະທອງສາມສີເມືອງ ທຸລະຄົມ ບຸນປີ ໃໝ່ລາວ (ກຸດສົງການ) ແຫ່ນາງສັງຂານ ເມືອງວັງວຽງ ບຸນບັ້ງໄຟບ້ານໂພນໜີ ບ້ານປາກກະຍຸງ ບຸນດອກໄມ້ສົດ ບ້ານໂນນສະຫວ່າງ, ເມືອງວຽງຄຳ, ບຸນຖວຍຜາທໍ່ໜໍ່ຄຳ ເມືອງເຟືອງ, ບຸນເຜົ່າອິມ່ຽນບ້ານນ້ຳຮອນ, ບຸນກະເກຼິບ້ານນ້ຳເພີນເມືອງໝື່ນ, ບຸນພະເຫວດວັດໃຫຍ່ຜາຫົດ ເມືອງຊະນະຄາມ, ບຸນບັ້ງໄຟບ້ານນາມົນເມືອງກາສີ, ບຸນຊ່ວງເຮືອ ເມືອງແມດ ແລະ ບຸນອື່ນໆອີກ.