header

ເມືອງເກົ່າໄຜ່ໜາມ ລືນາມອ່າງນ້ຳງື່ມ ຕຳນານເດີມລາຍງ້າວ ອູ່ເຂົ້າຊາວເມືອງ ຄົນເຮືອງຂັບງື່ມ ດື່ມດຳທຳມະຊາດ ປະຊາລາດສາມັກຄີ

ທ່ານນາຍົກລັດຖະມົນຕີ ແຫ່ງ ສປປ ລາວ ຢ້ຽມຢາມກອງພົນທະຫານຮາບທີ1 ແລະ ເມືອງວັງວຽງ

ໃນວັນທີ 18 ມັງກອນ 2018 ທີ່ຜ່ານມາ, ທ່ານ ທອງລຸນ ສີສຸລິດ ກໍາມະການກົມການເມືອງສູນກາງພັກ, ນາຍົກລັດຖະມົນຕີແຫ່ງ ສປປ ລາວ, ພ້ອມດ້ວຍຄະນະໄດ້ເດີນທາງມາຢ້ຽມຢາມ, ໂອ້ລົມ ແລະ ອວຍພອນ ນາຍ ແລະ ພົນທະຫານ, ພະນັກງານ, ນັກຮົບ ຢູ່ກອງພົນທະຫານຮາບທີ 1 ເມືອງວັງວຽງ ທີ່ແຂວງວຽງຈັນ, ເນື່ອງໃນໂອກາດວັນຄົບຮອບການສ້າງຕັ້ງກອງທັບປະຊາຊົນລາວ ຄົບຮອບ 69 ປີ.

ໂດຍການຕ້ອນຮັບຢ່າງອົບອຸ່ນຂອງ ທ່ານ ວີດົງ ໄຊຍະສອນ ກຳມະການສູນກາງພັກ ເລຂາພັກແຂວງ ເຈົ້າແຂວງໆວຽງຈັນ, ທ່ານພັນເອກ ພັນຊາຍ ຂັນທະໄຊ ຫົວໜ້າການທະຫານກອງພົນທີ 1, ພ້ອມດ້ວຍຄະນະພັກ, ຄະນະບັນຊາ, ນາຍ ແລະ ພົນທະຫານ ຈາກກອງພົນທະຫານຮາບທີ 1.

ທ່ານ ພັນເອກ ແສງຍືນ ລັດສະໝີ ຫົວໜ້າການເມືອງ ກອງພົນທະຫານຮາບທີ 1 ໄດ້ລາຍງານຫຍໍ້ ການສ້າງຕັ້ງ ແລະ ສະພາບການເຄື່ອນໄຫວວຽກງານທີ່ພົ້ນເດັ່ນທີ່ນາຍ ແລະ ພົນທະການກອງພົນສ້າງມາໄດ້ ໃນໄລຍະຜ່ານມາ, ພ້ອມນີ້ ທ່ານໄດ້ຍົກໃຫ້ເຫັນບາງບັນຫາທີ່ເຫັນວ່າຍັງຄົງຄ້າງ ແລະ ຈະໄດ້ສືບຕໍ່ແກ້ໄຂໃນຕໍ່ໜ້າ ໃຫ້ທ່ານນາຍົກລັດຖະມົນຕີ ແລະ ຄະນະໄດ້ຮັບຊາບ.

ໃນໂອກາດນີ້ ທ່ານນາຍົກລັດຖະມົນຕີ ໄດ້ໃຫ້ກຽດໂອ້ລົມ ນາຍ ແລະ ພົນທະຫານ ຢູ່ກອງພົນດັ່ງກ່າວ ກ່ອນອື່ນທ່ານໄດ້ຍ້ອງຍໍຊົມເຊີຍຜົນງານທີ່ກອງພົນທະຫານຮາຍທີ 1 ສ້າງມາໄດ້ໃນໄລຍະຜ່ານມາ, ຍົກໃຫ້ເຫັນການນຳເນີດ ແລະ ເຕີບໃຫຍ່ຂະຫາຍຕົວຂອງກອງທັບປະຊາຊົນ ໃນໄລຍະ 69 ປີ, ພ້ອມນີ້ ທ່ານຍັງໄດ້ເນັ້ນໃຫ້ຄະນະພັກ, ຄະນະບັນຊາກອງພົນດັ່ງກ່າວໃຫ້ເອົາໃຈໃສ່ ຊີ້ນໍາ-ນໍາພາວຽກງານຂອງຕົນໃຫ້ມີຄວາມໜັກແໜ້ນເຂັ້ມແຂງ, ເນັ້ນໃຫ້ນາຍ ແລະ ພົນທະຫານເອົາໃຈໃສ່ ຕັ້ງໜ້າຝຶກຜົນຫຼໍ່ຫຼອມຕົນເອງ ໃຫ້ມີຄວາມກ້າວໜ້າຢູ່ສະເໝີ ບໍ່ວ່າຈະເປັນດ້ານວຽກງນວິຊາສະເພາະ, ສິລະປະຍຸດ, ຍຸດທະວິທີ, ຄວາມຮູ້ຄວາມສາມາດ, ສິ່ງສໍາຄັນທ່ານໄດ້ເນັ້ນໃຫ້ກອງພົນ ຈົ່ງໄດ້ຖືເອົາປະຊາຊົນເປັນບັນຫາສຳຄັນ ເພື່ອເປັນກຳລັງແຮງປະກອບສ່ວນເຂົ້າໃສວຽກງານ ປ້ອງກັນຊາດ ໃຫ້ມີຄວາມເຂັ້ມແຂງ, ເພາະວ່າເວລາໃດປະຊາຊົນກັບທະຫານຄື ປາກັບນໍ້າ, ພ້ອມນີ້ ທ່ານຍັງໄດ້ເນັ້ນໃຫ້ກອງພົນໃຫ້ເອົາໃຈໃສ່ ເສີມຂະຫຍາຍ ເຮັດພາລາທິການກັບທີ່ ໃຫ້ໄດ້ຫຼາຍກ່ວາເກົາ ເປັນຕົ້ນແມ່ນການປູກ-ການລ້ຽງໃຫ້ຫຼາຍ ເພື່ອຜະລິດກາຍເປັນສິນຄ້າ.

ພ້ອມນີ້, ທ່ານນາຍົກລັດຖະມົນຕີ, ພ້ອມດ້ວຍຄະນະ ຍັງໄດ້ມອບເງິນສົດ ຈຳນວນ 100 ລ້ານກີບ, ພ້ອມດ້ວຍເຄື່ອງອຸປະໂພກ, ບໍລິໂພກຈຳນວນໜຶ່ງໃຫ້ກອງພົນທະຫານຮາບທີ 1 ຕື່ມອີກ.

ຫຼັງຈາກນັ້ານທ່ານນາຍົກລັດຖະມົນຕີແຫ່ງ ສປປ ລາວ ພ້ອມດ້ວຍຄະນະຍັງໄດ້ໄປຢ້ຽມຢາມ ແລະ ພົບປະໂອ້ລົມການນຳ ແລະ ພະນັກງານຫຼັກແຫຼ່ງທີ່ສະໂມສອນຂອງເມືອງວັງວຽງ, ໂດຍມີ ທ່ານວີດົງ ໄຊຍະສອນ ເຈົ້າແຂວງໆວຽງຈັນ, ທ່ານ ຄຳຜອງ ດວງວິໄລ ເຈົ້າເມືອງວັງວຽງ, ພ້ອມດ້ວຍການນຳ ພະນັກງານຫຼັກແຫຼ່ງຂອງເມືອງ, ທະຫານ, ຕຳຫຼວດ, ຕະຫຼອດຮອດອຳນາດການປົກຄອງຂັ້ນທົ່ວເມືອງເຂົ້າຮ່ວມຮັບຟັງ.

ທ່ານນາຍົກໄດ້ເນັ້ນໜັກ ເຖິງບັນຫາການທ່ອງທ່ຽວເປັນຫຼັກ ເຊິ່ງທ່ານໄດ້ສະແດງຄວາມເປັນຫ່ວງເປັນໄຍ ຕໍ່ການທ່ອງທ່ຽວຢູ່ເມືອງວັງວຽງ ໂດຍສະເພາະບັນຫາຄວາມບໍ່ສະຫງົບປອດໄພ ຂອງນັກທ່ອງທ່ຽວ, ບັນຫາຄວາມສະອາດຂອງແຫຼ່ງທ່ອງທ່ຽວ ແລະ ຕົວເມືອງ, ການບໍລິການຕ່າງໆ, ຄ່າອາຫານທີ່ແພງເກີນໄປ ແລະ ບັນຫາອື່ນໆ ທີ່ມີຜົນກະທົບຕໍ່ການທ່ອງທ່ຽວ, ພ້ອມນີ້ທ່ານຍັງໄດ້ຮຽກຮ້ອງ ມາຍັງການນຳຂອງເມືອງ ຈົ່ງໄດ້ພ້ອມກັນສືບຕໍ່ເສີມຂະຫຍາຍອັນໃດທີ່ດີແລ້ວ ສ່ວນບັນຫາທີ່ຍັງຄົງຄ້າງຈົ່ງພ້ອມກັນສືບຕໍ່ແກ້ໄຂໃຫ້ທັນເວລາ ພ້ອມນີ້, ທ່ານຍັງໄດ້ມອບເງິນສົດ ຈຳນວນ 30 ລ້ານກີບ ແລະ ເຄື່ອງອຸປະໂພກ ແລະ ບໍລິໂພກຈຳນວນໜຶ່ງໃຫ້ເມືອງອີກດ້ວຍ.