header

ທ່ານດາວເຮືອງ ນັນທະວົງ ຮອງເຈົ້າແຂວງໆວຽງຈັນ ຕ້ອນຮັບຄະນະຜູ້ແທນການນຳ ສະຖາບັນການປົກຄອງແຂວງກວາງຊີ ສປ ຈີນ

ໃນວັນທີ 22 ມີນາ 2018 ຢູ່ທີ່ຫ້ອງວ່າການປົກຄອງແຂວງວຽງຈັນ,  ທ່ານດາວເຮືອງ ນັນທະວົງ ຮອງເຈົ້າແຂວງໆວຽງຈັນ ໄດ້ໃຫ້ກຽດຕ້ອນຮັບທ່ານ ສຈ ຫູ ຈ້ຽນຮົວ ຮອງຫົວໜ້າສະຖາບັນການເມືອງການປົກຄອງແຂວງກວາງຊີ ສປ ຈີນ ພ້ອມດ້ວຍຄະນະ ໃນໂອກາດທີ່ເດີນທາງມາຢ້ຽມຢາມແຂວງວຽງຈັນ.

ໃນໂອກາດດັ່ງກ່າວ, ທ່ານຮອງເຈົ້າແຂວງ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການເດີນ ທາງມາຢ້ຽມຢາມ ແຂວງວຽງຈັນ ຂອງຄະນະຜູ້ແທນການນຳ ສະຖາບັນການປົກຄອງ ແຂວງກວາງຊີ ສປ ຈີນ ໃນຄັ້ງນີ້ ເຊິ່ງເປັນການປະກອບສ່ວນເຂົ້າໃນການເສີມສ້າງ ການພົວພັນຮ່ວມມືຂອງ ລາວ ແລະ ຈີນ ໃຫ້ນັບມື້ເຕີບໃຫຍ່ຂະຫຍາຍຕົວ ທາງດ້ານປະລິມານ ແລະ ຄຸນນະພາບ ໂດຍສະເພາະ ຂົງເຂດວຽກງານການສຶກສາ ແລະ ຂົງເຂດວຽກງານອື່ນໆ. ພ້ອມດຽວກັນນັ້ນ, ກໍ່ໄດ້ນຳສະເໜີໃຫ້ຊາບ ກ່ຽວກັບແຜນການພັດທະນາເສດຖະກິດ-ສັງຄົມ ຂອງແຂວງວຽງຈັນ ກໍ່ຄື ບັນດາຄາດໝາຍສູ້ຊົນສຳຄັນຕ່າງໆ ໃນການແກ້ໄຂຄວາມທຸກຍາກຂອງປະຊາຊົນ ແຕ່ນີ້ຮອດປີ 2020 ແລະ ພ້ອມນີ້ກໍ່ໄດ້ສະເໜີ ຄະນະຜູ້ແທນການນໍາ ຈາກສະຖາບັນການປົກຄອງ ແຂວງກວາງຊີ ສປ ຈີນ ພິຈາລະນາ ແລະ ຊ່ວຍຊຸກຍູ້, ສະໜອງທຶນການສຶກສາໃຫ້ນັກຮຽນ, ນັກສຶກສາ ແລະ ພະນັກງານພາຍໃນແຂວງວຽງຈັນ ໄດ້ມີໂອກາດໄປຮໍ່າຮຽນສຶກສາ, ຍົກລະດັບດ້ານທິດສະດີການເມືອງ ຢູ່ແຂວງກວາງຊີ ສປ ຈີນ, ເພື່ອແນໃສ່ການຮັບໃຊ້ວຽກງານການພົວພັນຮ່ວມມື ລາວ-ຈີນ ຂອງແຂວງໃຫ້ມີຄວາມໜັກແໜ້ນ, ເຂັ້ມແຂງຂຶ້ນເລື້ອຍໆໄປ.

ໃນໂອກາດດຽວກັນ, ທ່ານ ສຈ ຫູ ຈ້ຽນຮົວ ໄດ້ສະແດງຄວາມຂອບໃຈຢ່າງສູງ ຕໍ່ການຕ້ອນຮັບອັນອົບອຸ່ນ ຂອງທ່ານເຈົ້າແຂວງ ໃນຄັ້ງນີ້. ພ້ອມທັງ ຕີລາຄາສູງ ຕໍ່ຄວາມເອົາໃຈໃສ່ ແລະ ໃຫ້ການຮ່ວມມືຂອງແຂວງວຽງຈັນ. ນອກນັ້ນ, ຍັງໄດ້ສະແດງຄວາມຊົມເຊີຍ ຕໍ່ລັດຖະບານ ແລະ ປະຊາຊົນລາວ ໃນການສ້າງສາພັດທະນາປະເທດຊາດຂອງຕົນ ນັບມື້ມີຄວາມກ້າວໜ້າທັນສະໄໝ ຢ່າງບໍ່ຢຸດຢັ້ງ.