header

ກອງປະຊຸມຄົບຄະນະສະມາຊິກສະພາແຫ່ງຊາດຊຸດທີ VIII ປະຈຳເຂດເລືອກຕັ້ງທີ 10 ແຂວງວຽງຈັນ ປະຈຳປີ 2017 ໄດ້ໄຂຂຶ້ນຢ່າງເປັນທາງການ.

ກອງປະຊຸມຄົບຄະນະສະມາຊິກສະພາແຫ່ງຊາດຊຸດທີ VIII ປະຈຳເຂດເລືອກຕັ້ງທີ 10 ແຂວງວຽງຈັນ ໄດ້ໄຂຂຶ້ນຢ່າງເປັນທາງການ ໃນວັນທີ 15 ມັງກອນ 2018 ຢູ່ທີ່ສະໂມສອນໃຫຍ່ຂອງແຂວງ ໂດຍການເປັນປະທານຂອງທ່ານ ບຸນເພັງ ສາຍນໍລະດີ ຮອງເລຂາພັກແຂວງ ປະທານສະພາປະຊາຊົນແຂວງວຽງຈັນ ມີ ສສຊ ແລະ ສສຂ ເຂົ້າຮ່ວມ.

ໃນກອງປະຊຸມຄັ້ງນີ້ທ່ານ ສົມດີ ແກ້ວດາລາວິນ ສະມາຊິກສະພາແຫ່ງຊາດ ຮອງປະທານສະພາປະຊາຊົນແຂວງວຽງຈັນ ໄດ້ຜ່ານບົດສະຫຼຸບການເຄື່ອນໄຫວວຽກງານ ຂອງຄະນະສະມາຊິກສະພາປະຈຳ 2017 ທີ່ຜ່ານມາ ເຊິ່ງໄດ້ຍົກໃຫ້ເຫັນຫຼາຍບັນຫາທີ່ສາມາດເຮັດໄດ້ເປັນຕົ້ນ ແມ່ນການສ້າງ ແລະ ປັບປຸງກົດໝາຍ, ການໂຄສະນາເຜີຍແຜ່ກົດໝາຍ, ການຕົກລົງບັນຫາທີ່ພື້ນຖານຂອງຊາດ ແລະ ຂອງແຂວງ, ການຕິດຕາມກວດກາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ການຈັດຕັ້ງປະຕິບັດໂຄງການລົງທຶນ ຂອງເອກະຊົນທັງພາຍໃນ ແລະ ຕ່າງປະເທດ, ການສ້າງຄວາມເຂັ້ມແຂງໃຫ້ແກ່ສະມາຊິກສະພາແຫ່ງຊາດ.

ໄດ້ຮ່ວມກັບພາກສ່ວນທີ່ກ່ຽວຂ້ອງ ລົງກວດກາການຈັດຕັ້ງປະຕິບັດ ແລະ ປະເມີນຄືນຫົວໜ່ວຍລາຄາໂຄງການກໍ່ສ້າງເສັ້ນທາງແຕ່ສາມແຍກບ້ານຈຽງ, ເມືອງກາສີ ຫາ ເມືອງຊະນະຄາມ, ຕິດຕາມບັນຫາຜົນກະທົບຈາກໂຄງການກໍ່ສ້າງເສັ້ນທາງລົດໄປລາວ-ຈີນ ຢູ່ເມືອງວັງວຽງ, ເມືອງກາສີ, ເມືອງຫີນເຫີບ ແລະ ເມືອງໂພນໂຮງ.

ພ້ອມນີ້ກອງປະຊຸມຍັງໄດ້ຮັບຟັງການສະຫຼຸບການຈັດຕັ້ງປະຕິບັດໂຄງການລົງທຶນຂອງລັດທີ່ມີມູນຄ່າສູງກວ່າ20 ຕື້ຂຶ້ນໄປ ຢູ່ພາຍໃນແຂວງວຽງຈັນ ຈາກ ທ່ານ ສຸກັນ ວິໄລຣັດ ຫົວໜ້າພະແນກແຜນການ-ການລົງທຶນແຂວງ ເຊິ່ງທ່ານໄດ້ກ່າວວ່າ: ຮອດທ້າຍປີ 2017 ມີໂຄງການທີ່ມີມູນຄ່າສູງກວ່າ 20 ຕື້ກີບທັງໝົດ 38 ໂຄງການມູນຄ່າ 5.639 ຕື້ກີບ,ໃນນີ້ປະຕິບັດສຳເລັດແລ້ວ 2.674 ຕື້ກວ່າກີບເທົ່າກັບ 47,42% ໃນນີ້ອະນຸມັດກ່ອນປີ 2017 ມີເຖິງ36 ໂຄງການ ໃນນີ້ອີກເປັນໂຄງການໜີ້ສິນ 2 ໂຄງການມູນຄ່າ 56 ຕື້ກວ່າກີບ,ໂຄງການສືບຕໍ່ 34 ໂຄງການມູນຄ່າ5.212 ຕື້ກວ່າກີບ, ປະຕິບັດສຳເລັດ 2.609 ຕື້ກວ່າກີບເທົ່າກັບ 50,59% ກີບ; ໂຄງການອະນຸມັດປີ 2017 ມີ 2ໂຄງການໃນນີ້ເປັນໂຄງການໃນແຜນລົງທຶນຂອງແຂວງ 1 ໂຄງການມູນຄ່າ 213 ຕື້ກວ່າກີບ, ປະຕິບັດສຳເລັດ 2 ຕື້ກີບ,ໂຄງການລົງທຶນໃນແຜນຂອງກະຊວງ 1 ໂຄງການມູນຄ່າ 156,3 ຕື້ກີບປະຕິບັດສຳເລັດ 6,25 ຕື້ກີບ.